الــسلام عليكم ورحمة الله وبركــاته ..




كــيف حال كول الصبــايا ..والحريمــات ..


طبـعا خبركم ..لابد من مقدمه ..وش طولها وش عــرضها
وبالاخــير يصير مافي لازبــده ولا شئ
حتى مايستفيــد احد لا من حكيي ولا طبخي



لذلكـ قررت انا غلا بنت خــالد ..
اني ماعاد اسولف الا بحكــمه
وأنـي اصير حرمتن سنــعه
وأني اصير قليله هذر
لانهم يقولون ..كثر الضحكـ والقرقره ..قد عيـبـن المــره
>>>ماشاء الله مع هالبــرد شكل اصابعها جامده عشان تسذا ماهذرت


اهااا عرفتوا السر في قل الهذره
اني برداانه ..واصابعي ترتجـف
لذلكـ اعتذر عن كتابه قصه ماقبل النــوم


>>مسكينــه تنرحم ترى ..

نجي للزبــده ..
ومن كثر زبدتي بالموضوع شكله يبي يطفح دهــن


أمس كنت أحــكي مع ألــق..
ومير تقولي ::
غلا الله يخليكـ ويسلم قلبكـ ويخلي لكـ ابوكم
المهم المره مسكت خط دعاوي ..

قلت لها طيب طيب ابشري وش تبين..
صراحه والحق يقال احسبها تبي خمسه ريال لانه ماكان معي الا اربعه

قالت نزلــي حلا .
اثر المره خااقه على طبخااتي ..
>>ألــق ولا كلمــه فاهمه قولي صح وووبس ..

قلت لها ماافي حلا ..فاضين لكـ حنا جمدانين وانتي تقولين حلا ..
معصي ..ماافي >>مااره لو شفتوني رحوومه ماااااره


قلت أبنزل عصيده ..
قالت لااااااااااااااا ماابيها ثقيله ..
قلت ماهيب حقت التــمر ثاانيه ..
الاخت استسلمت للامر ..لان حلقها نشف مع المحاولات


نجي لللعصيده ..
عصيدتي الله يسلمكم ماهيب حقت التمــر ..
ولا هي حلو ..

لا مــالح تحط مع الغداء او العشاء ..
مثل المرقوق والمطازيز ..

بس طعمه عندي أحلى ..واسهل ويدفي

يتــــبع كعــادة مواضيعي

..
21-12-1429 هـ, 08:39 مساءً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
نجي للطريقه ::

اول شئ..
نقطع بصل صغار ونحمسه على شويه زيت ..شوي مااااااره ..
ونحط فوقه قرع مقطع قطع كباار ..عاادي لانه راح يذوب ..
وهو سر النكهه وهو اللي يعطي العصيد الطعم الحلو ..سبحان الله ..

ونضيف معجون الطماطم .وشويه مويه مغليه ..
ونخليه يطبخ شوي ..

ونقطع لنا لحم قطع صغيره وبدون عظــم (هبــر)..
ونحطه فوق القرع ونخليهن مع بعض ..

وبعدين نضيف البهارات ..والملح ..ولكـ الحريه في النكهاات ..
بس مااحبها مع العصيد لانه النكهه كلها بالقرع ..
ونضيف ماااء عااد كثير قيسي على حسب عائلتكم ..
ابعطيكم الوقت بالساعه عشان يكون اسهل ..

مثلا ولعنا على اللي سبق الساعه 11 ونصف الصبح ..
ونخليه يطبخ مع بعض لين الساعه 12..

وبعدين جيبي لكـ طحين ((بــر.))..
وطفي النــار على العصيده ونزليها على الارض..
ليش هالحركه عشان لو حطيتي الطحين وهذا يطبخ على النار يبي يصير يجي عليكـ ..

وحطيته على الارض..
جيبي المعــصاد ..الملعقه الكبيره حقت الجريش والمرقوق ..
وحطي طحين بر وحركي وحطي وحركي لين تحسن انه انخلط كله ..
وانه صار القوام عندكـ ثقيل نوعا ماااا..

وبعدها رجعيه على النار على ناار هادئه ..

اذا جت الساعه 1 شوفيه كيف القوام يعجبك او لا..
اذا كان ثقيل زيدي شوي موويه لاتكثرين ..
واذا كان خفيف اضيفي شوي طحين ..
بس سكري النار اول ..


على حسب رغبتكـ ..
شخصيا احبه ماايكون ثقيل مااااره ولا خفيف ماااره ..
أهلي يحبون ثقييل..

وبعدين خليه يطبخ لين تجي 2 ..كذا يكون جااهز ..
صدقوني لايغركم كثر الهذر ..
لو اني مصوره الخطوات كان قلتم بس كذا شوي

وانتم ومزاجكم ..
وصدقوني يبي يعجبكم .


فيه ناااس من أهــلنا يسمونه الفول ..
يالله لكـ الحمد...يقولون نجيب خبز

تراه يؤكل بالملعقه وماابووه اطعم منه ..

وبس ..

بس انا ماادري وراوه عــالمي ماهوب يخل يموضوعي كامل مقسم يصير

>>من قل هذرتس بلاه يالســنعه
الصور شوفوها ..
وان شاء الله يعجبكم ..
[/color]
21-12-1429 هـ, 08:40 مساءً
 








لاحول ولا قوة الا بالله .
طارن الصور يبي احمل من جديد ..

سوري بناات على التـاخير ..
مير غسالكن بسرعه شكلي منحوته


...................
هذا هو بالقدر يطبخ ..
لاحظوا وشلون يتفقع >>امحق لهجتن عندتس ياغلا



وهذا هو بالصحن ..
حطوه بصحن كبير اول عشان يبرد بسرعه ..
انا عشانكن بس يقالي اني اكشخ
وفوقه بزار عاادي .
بصل محموس بزبده وبهارات ..




وهذي عااد اللي مالها دخل بالموضوع .
بس جايتن تزور قلت ارزها وش ورانــا ..





..

وبالعــافيه .

عاد الله الله بالمدح لااوصيكم
>>اسولف مع روحي لااحد يصدق
21-12-1429 هـ, 08:40 مساءً
 


تــم بــحمد الله هالموضوع اللي مــصل ..


بس وش اسوي كله من وورد ..خبص ابو الدنيا علي ..




مير كود الطبخه ترقع شوي ..

>>تبي مدح افهموني صارت اشحذ

فوتكوا بعــافيه


..
21-12-1429 هـ, 08:41 مساءً
 
كني عرفت طبختك

اعرفها تجي لونها بني مع اخضر مع احمر صح

يالله عجلي علينا

وتسلم يدينك
21-12-1429 هـ, 09:01 مساءً
 


الساعة الآن 01:57 .