السلام عليكم و رحمة اله و بركاته

شوفو يا بنات دي اول مشاركة لي في القسم هنا و اتمنى اعرف اوضحها و تعجبكم

بالنسبة للقلاس كتير ناس متعرفوش و لا عمرها جربته بس انا من اكبر مشجعي و محبي القلقاس في العالم و بحبه بشكل مش طبيعي




ده شكله طبعا للي متعرفوش

اغلب الناس تحبه مع اللحم بس انا بفضله بالدجاج و ممكن تعملي الدجاج مسلوق او تعمليه بطريقتي

و هي طريقة سهلة جدا و طعمها جنان

اولا بتجيبي الدجاج و تقطعيه ارباع و تغسليه تمام و بعدين تتبليه بملح و فلفل اسمر و بصل مفروم خشن مش ناعم و عليهم ليمونة و تسيبيها حوالي نص ساعة و بعدها تحطي الدجاجة و معاها التتبيلة كلها في حلة و ترفعيها على نار عالية بس لغاية ما توصل للغليان و بعدها تهدي النار على الاخر

الدجاجة بتاخد تقريبا ساعة عشان تستوي تكوني انتي جبتي القلقاسة بتاعتك و بفضل دايما تكون واحدة بس مش اكتر من واحدة عشان تاخد سوا واحد متلاقيش منها شوية مستويين حلو و شوية جامدين

و تقطعي الجرء العلوي بتاعها و بعدين تقطعيها شرايح عريضة القلقاسة الواحدة بتعمل حوالي ست او سبع شرايح و بعدين تقطعي الشرايح دي لاصابع و تنظفيها كويس بالسكين تشيلي كل القشرة القاسية و بعدين تقطعي الاصابع كلها مكعبات



بعد ما تقطعيه تغسليه كويس

ناس كتير تحب تغسله لغاية ما المادة اللزجة اللي فيه تروح بس انا بحبها لانها بتدي للشوربة قوام ممتاز

المهم

بعد ما تطلعي الفراخ من الخلطة بتاعتها اللي استوت فيها تسيبيها تغلي شوية و تحطي عليها طماطماية مبشورة و كمون مطحون و لما يغلو تحطي القلقاس فيها و تغطي و تهدي النار و تسيبيه يستوي براحته

نيجي بقى لاهم حاجة التقلية

التقلية غالبا بتتعمل بالسلق و لاني ددايما مش بلاقيه بكتفي بالكزبرة الخضراء

تجيبي ربطتين كزبرة خضارا و تقطعيهم صغير خالص و راس ثوم و تكسريها حتت كبيرة او صغير مش فارقة و تحطيهم مع ملعقة سمن على نار هادية و تفضلي تشوحيها على النار بتاخد تقريبا نص ساعة و يمكن اكتر شوية لغاية ما تبقى هشة و تتنفش و لونها تقريبا بني تاخديها على البراون و تفرميها كويس و لما القلقاس يستوي و يكون طري جدا زي البطاطس المسلوقة زيادة شوية تحطي التقليه دي عليه و تسيبيه يغلي بيها غلوتين بس و تطفي النار و بعدين تعصري عليها ليمونة واحدة كبيرة او اتنين صغار

طبعا انا بحب اقدمه مع رز و لان الاكلة مصرية بشدة بنعمل معاه رز مصري بالشعرية



و دي صورة استلفتها من موضوع اخت هنا بالموقع ربي يديها الصحة يا رب

انا مقداري للرز لكل كوب رز بحط ملعقة اكل كبيرة شعرية و احمر الكمية كلها في سمن و بعدين لما يبقى لونها دهبي غامق شوية احط الرز و المية و الملح و المية بس تغطي سطح الرز و احطه على نار عالية لغاية ما يغلي و كل المية تختفي اول ما تختفي الميه اهدي النار لاقصى حاجة ممكنة

و على ما الرز يكون استوى باخد الفراخ اللي طلعناها من الصوص بتاعها من شوية و نبتدي نحمرها في زيت غزير و طبعا بيكون عليها بواقي بصل و هي دي اطعم حاجة فيها و لما تتحمر تتقدم كلها مع بعض الدجاج و الارز بالشعرية و كمان احلى طبق قلقاس

احنا اربعة و نعمل قلقاسة تقريبا كيلو لان اخواتي بيقومو بالليل يتعشو منه تاني

بس خلاص تعبت بالنسبة للصور ان شاء الله احاول اصورلكم الحاجات كلها بس اعذروني لانه مفيش كاميرا متوفرة حاليا

يا رب اكون وفقت في الشرح و يا رب تعجبكم طريقتي يا رب

في انتظار ارائكم كلها

و بالهنا و الشفا
26-01-1430 هـ, 05:39 مساءً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
تسلم الايادي يا قمررررررررر
26-01-1430 هـ, 06:03 مساءً
 
ياااا حبي لاهل مصر

تسسسسسلم الايادي
26-01-1430 هـ, 06:46 مساءً
 
تسلمولي يا رب انتو الاتنين و يا رب تجربوه و يعجبكم يا رب
26-01-1430 هـ, 07:06 مساءً
 
تسلم الايادي انا اموت بشوربة القلقاس مع اللحم وان شاءالله مرة ثانية اجرب طريقتك
26-01-1430 هـ, 09:00 مساءً
 


الساعة الآن 09:51 .