السلام عليكم ورحمة الله وبركاته
بنات بليز عندي عشاء بعد اسبوعين لاعماتي واهل زوجي وابغى اجهز من الحين من ناحية الطبخات الي راح اسويها
والي جديده اتدرب عليها تكفوووون لاتخلوني بروحي وانا بمنطقه اهلي مو فيها وماعندي خدامه وعندي بنت سنه ونصف وولد ثلاث ونصف مادري كيف اتصرف ومتى ابداء بشغل وكيف اتصرف مع اولادي لانهم مشاغبين مره وهذي صراحه المره الاولى الي يتجمعون كلهم عندي وابغى اسوي سفره ماصارت من اطباق رئيسه وحلو العشاء والمقبلات والسلطات والعصيرات والمعجنات الي مع الشاهي وحلا القهوه اتمنى تكون سريعه وفخمه بنفس الوقت
وهذي اول مره اكتب بالمنتدى اتمنى تسااااااعدوني


ياعمري

ابشري بجمع لك كم موضوع
أستغفر الله العظيم الذي لا اله الا هو وأتوب اليـــــــه








هلا اختي المنتدى مليان اكلات رهيبه وانا عن نفسي جربت للاخت فنون نجد اكلات كانت مره رهيبه وهي صينية دجاج بالخضار وصينية بطاط مهروس دجاج ومندي ابحثي في مواضيعها وراح تلاقي الي يجملك باذن الله وانا اجهز الحلا قبل بيوم او يومين وافرم الي ينفرم واقطع كل شي لحم او دجاج يعني كل طبخه اقطع مثل ماهوه مطلوب منها واحطها في الفريزر لحد اليوم الي بسويها فيه اطلعها من بدري علشان تذوب والخضار اقطعها في اليل واحطها في مويه وشوية ملح واحطها في الفريزر وهكذا اتمنى اني افدك ولو بشي بسيط
أستغفر الله العظيم الذي لا اله الا هو وأتوب اليـــــــه








شوفي حبيبتي بالنسبه للحلا سوي نوعين بس وقطعيهم مربعات زي حجم الكيكه وحطي على سفرة القهوه صحون صغيره على جنب مع شوك وملاعق صغيره وبالوسط صينيتي الحلا وصينيه او سله مرتبه وحطي فيه نوعين تمر يعني مثلا سكري وخلاص وحطي معهم مضير {اقط}هاذي تكون كبيره في الوسط واذا جلسو اعطي كل وحده في الصحن قطعه من كل حلا ومديه له مع الشوكه وبس هاذا للقهوه ..بالنسه للشاهي سوي كيكه بالبرتقال او الفانيلا او بالفستق وقطعيها مربعات مرتبه وسوي نوع واحد فطاير وبيتزا صغيره وممكن تجيبنها من برا اريح لك وحطي نفس الطريقه بسلتين بالوسط واعطي كل وحده قطعة كيكه وفطاير وبيتزا وفي الصحن الصغير وحطيه قدامها مع صحون صغيره مكسرات وحب ..وبس .....
اما العشا سوي رز ابيض وحطي دجاج مبهر وحمريه فوقه مع حمسة البصل والبهارات طبعا اذا هم كثير سوي صحنين وحطي سفرتين وسوي نوعين سلطه وحطيهم بصحن صغير قسمين يعني كل وحده عنده صحن صغير فيه نوعين سلطه مقسوم وسوي حلا وسوي عصير النعناع بالليمون حلو ......وحطي مناديل السفره اللي تجي الوان مربعات حطي عليها ملعقه وشوكه ..وبس احسن شي الترتيب والبساطه انا هالنوع من الترتيب اسوه لاهلي وجماعتي لانه مافيه كلفه ..واذا انتم من النوع اللي كل واحد ياكل في صحن ولازم تسوين اكثر منطبق رئيسي زي مااسوي اذا جانا ضيوف من برا قولي لي وافيدك ..
حبيت بس اقولك بالنسبه للحلاسويه الليله اللي قبل والسلطات بعد غلفيها في الثلاجه واذا بتقدمينها حطي الليمون والملح او الصوص كذا اسهل ..وبعد حبيبتي بالنسبه لعيالك اكليهم قبل مايجون ضيوفك علشان اذا جوا الضيوف موب ياكلون كثير وتنحرجين ونصيحه اشتري كيسة شبس بطاطس تسالي او ليز وعصير صغير اذا جو الضيو ف عطي عيالهم وعيالك الشيبس والعصير وجلسيهم عند افلام الكرتون كذا طريقتي وبترتاحون في القهوه وبهدوا خاصه اذا انتي في شقه ..اهم شي يالغاليه اكتبي كل شي بتسوينه في ورقه وجيبي اغراضك قبل بيومين علشان ماتنسين..
اتنمنى اني افدتك لو بالقليل واي خدمه او استفسار انا حاضره..
لا تنسيني من دعواتك


الساعة الآن 04:05 .