اقتباس مشاركة  (**بنت ناس**)
كم عليك دين علشان نقدر نفيدك.

بانتظارك

هلا حبيبتي وبارك الله فيك واسعدك دنيا واخره انتي والحبايب الكريمات الي يحاولو مساعدتي
اختي الحبيبة ديني في البنك باقي له 6سنين وأنا كل شهر ادفع 2800ريال والمبلغ يمكن ميتين الف ريال باقي للبنك
وأكيد بتستغربي وتقولي وين راحت الفلوس هذي وانا بقلك راحت لهوامير الأسهم ولا استفدت منها بشيء
وكمان 50ألف ريال ديون من زميلاتي وقريباتي لأخلع زوجي من المحكمه والحين محتاسه في ترجيعهم
شفتي الحوسه (( يارب لك الحمد على كل حال ))
يعني ديوني كلها 250 ألف ريال بس البنك بياخذ حقه الباقي ال50 ألف كيف أقتصد وأسددها والله ماني عارفه كيف أسوي
اقتباس مشاركة  (قصيميه%)
احنااا زي حااالك الديووون تأكل ثلاث ارباع الراتب بس الشكوى لله
اللهم يااحي يااقيوم ارزقناا بحلالك عن حرااامك
ويسر اامورناا والمسلمين اجمعين ياامجيب الدعااء آآآآمين

آآآآآآآآآآآآآآآآآآآآميــــــــــــــــــــــن يارب العالمين
جزاك الله الف خير على الدعوه الطيبه هذي
وأسأل المولى لي ولك ولسائر المسلمين تفريج الكروب وسداد الديون عاجل غير آجل
ياأختي الله يفرجها عليك


عندك الجوال والهاتف الثابت لااازم تقتصدين الجوال حطي لك حد 300 ريال موضروري دام عندك ثابت


حاولي ماتستهلكين بالمكالمات والمسجات ياختي ترى محد نافعك ..و استغلي نقاط قطاف بتوفر عليك


والثابت اللي تمونين عليهم قولي لهم هم يدقون عليك وأولادك حددي لهم وقت للمكالمة واشرحي لهم انه هذي فتره مؤقته بسبب الديون إذا هم كبار ويفهمون ..


صدقيني أنتي بيدك كل شي بس يبيلك تمسكين نفسك لين تتعدل الظروف


وأهم شغلة الصدقة خصصي مبلغ شهري وبيفرجها ربك


إذا تبين مساعده دقيقة ارسلي كل تفاصيل مصاريفك ومصاريف أولادك من أكل وشرب وعلاج وملابس وكم عدد أولادك وإن شاءالله بساعدك

ومابي منك إلا الدعـــاء ..
اقتباس مشاركة  (قصيميه بجده)
الحمدلله راتبك راهي ماشالله تبارك الله

بس مع الغلا هالزمن والضروف والمصاريف صارت الرواتب ماتكفي

يختي اولادك مصروفهم المفروض على ابوهم واذا فيه اتفاق بينكم انه مايصرف عليهم الله يعينك

اول شي حاولي تاخذي من راتبك لو ميتين ريال تروح للصدقات والتبرعات مثلا اكفلي يتيم او يتيمين ب 200 ريال

كل شهر ينسحب منك دايركت من البنك ج< هذا شي لله عشان يصير براتبك بركه

ثاني شي خففو من المصاريف يعني مو شرط ملابس كل شهر واغراض

حاولي تقتصدين لاني اعرف ان الحرمه اذا بيدها فلوس ماتجلس ولايوم انا وانتي وكل الحريم بس انتي بوضع مايسمح للصرفيات الزايده

فاتورة المويه مو كل شهر ولا الكهرب

رتبي بحيث شهر للمويه والكهرب وشهر لفواتير التلفونات

خففو من الاتصال بالجوال هذا الشي بيدك انتي وحتى الثابت

اذا قدرتي تستغني عن الخدامه وتجيبي بنقاليه او سريلانكيه بتكون بنص الراتب وبتوفرين 400

حطي حد لمصاريف الاكل وخوذي الضروري والصحي

ادخلي جمعيات لو 500 ريال بالي توفرين وسددي فيها اجار البيت

عودي اولادك ونفسك على الاقتصاد والاعتدال بالامور

انا قلتلك على شي انا اسويه حاليا مع اني مو موظفه بس احاول اوفر من راتب زوجي

واقتصد بحياتي لاننا مثلكم علينا ديون

حتى تلفون ثابت ماعندنا وفاتورة جوالي ماتتعدا الميتين وحدي الائتماني 300

وغير كذا الفلوس الي اوفرها اشغلها بمشاريع صغيره على قدي حتى تسد مصاريفي

والله يعينك وييسرلك ويساعدك ويطرح البركه برزقك

وادعي واستغفري كثير

وتقبلي مروري

فديت روحك يالغاليه واسأل الله يرفع درجاتك في جنان الخلد انه على ذالك قدير
حبيبتي بالنسبه للصدقات والله إن لها ولله الحمد مكانه ليست يسيره في راتبي
وبالنسبه لمصروف العيال فهم خمسه الله يخليهم لي و ابوهم يعطينا بالقطاره كل شهرين 500ريال ويطنش وأنا تعبت من المحاكم فتركته على الله (( هو بياخذ حقي وحق اولادي منه )) ..
وبالنسبه للأقتصاد والله يالحبيبه إني ما أذكر متى اخذت لي ملابس أخر مره ولا لحبايبي أولادي من العيد للعيد أو مابين الفصول ملابس للحر والبرد وبس وأنا ما ني من النوع الي يعشق البذخ والمظاهر
وتصدقين لو تشوفين بيتي تقولي مسجد نظيف ويلمع من الزينات والكماليات
وبالنسبه للجوال ما اقدر استغنى عنه ولا عن التليفون ابد وتصدقين انا والله ما أكلم كثير بس النت يصرف كثير عندنا لعدم وجود الديسي إل والجوال مدري ليه ينتهي حده الأتماني بسرعه وتري حده الأتماني 400ريال
وماشاء الله عليكي مدبره أمورك تمام
أما أنا يارب لك الحمد فجأه لقيت نفسي لوحدي وما أعرف كيف أدبر اموري الله يسهلها
السلام عليكم ورحمة الله وبركاته اختي الغاليه قولي امين..
((الله يفرج همك ويقضي دينك وييسر امورك ويسعدك واهلي والمسلمين والمسلمات))

انا برائي اختي بالنسبه للجوال حاولي تشتركي بالباقات زي باقي اسرتي والاهل والاصدقاء...وغيره تراها تخف الفتوره عليكي والله انا كذا فاتورتي الجوال كانت تجي 800وكنت دايممشاكل انا وزوجي علشان هالموضوع واخر شي حولته من الجوال الى سو وصرت اشحنه ببطاقات..

ثانيا..الملابس انا كان مصروفي كله عالملابس لي ولبناتي واحب الماركات مبعدها قررت ادخل للسوق مره بالشهر واروح للمحلات تقليد الماركات او اروح اوقات التخفيض.

ثالثا..ادخلي جمعيه وحاولي كل مره تسددي شخص وهذي احسن طريقه
اختي موظفه وغااااااارقه بالديون فقالت مالي غير الجمعيه دخلت جمعيه وكل مايجي دورها تسدد شخص والله يااختي انها سددت كل ديونها بها الطريقه(تبارك الله)

الله يقضي دينك


الساعة الآن 11:53 .