السلام عليكم

أم يقين

نعم سوق دبي بالجمله فيه كل اللي تبينه .. و صدقيني ما بتندمين اذا وصلتي للمحلات اللي انتي تدورينهم .. ولا اذا ما وصلتي أو ضعتي في السوق .. بتندمين ليش رحتي و ما بتنسين هذا اليوم

يعني يكون في بالج أهم شي كيف توصلين عند محلات الهدايا في سوق الجمله


طبعا سوق الجمله كبير و أكبر من ما تتوقعين

فيه كل شي ينباع في أي سوق .. من مستلزمات المنزل الى مستلزمات النساء من اكسسوارات وحقائب وأحذيه وملابس نسابيه ( ماركات أو بدون ماركات ) وملابس الرجال وأدوات التجميل وأدوات المطبخ و أدوات البناء وأدوات مكتبيه و هدايا وكلللللللل شي يخطر في بالج

بس كل شي أو كل نوع من محلات يكون في صوب ... يعني مثلا أو ما تدخلين من صوب سوق نايف عند مركز المنال ... بتحصلين محلات من جميع الانواع و ما يبيعون بالجمله و أسعارهم غاليه

لكن روحي داخل ولفي يمين ... بتحصلين سوق عكاظ .. اللي متخصص في ملابس النساء وخاصة الجلابيات الخليجيه والهنديه وبتحصلين محلات على كيف كيفج .. كل شي مال حريم من ملابس الى عطورات .... الخ

اذا رحتي جدام بتحصلين سوق الذهب في ويهج ... الشارع بياخذج على اليسار أول ما توصلين سوق الذهب ... اذا دخلتي سوق الذهب وطلعتي من الجهه الثانيه (( طبعا مشي .. مافي طريق سيارات داخل السوق)) بتطلعين من الجهه الثانيه صوب محلات الادوات المكتبيه والهدايا وألعاب الاطفال

صح معظمهم يبيعون بالجمله و ما يرضون يبيعون بالحبه .. على حسب المحل .. اذا تبين كم حبه .. لا اتعبين نفسج .. روحي أسواق الامارات في عجمان مثل ما قالت الاخت ... أحسن لج

لكن هذا السوق ينفع حق بياعه أو حد يفكر في تجاره

أما من ناحية الجو في السوق .. على حسب الوقت ... وقت الصبح أحسن شي مافي وايد زحمه .. بس لو رحتي بعد العصر أو المغرب بتندمين لان الجو اشوي حر ورطوبه بالاضافه الى زحمة الهنوووووووود في كل شبر ومتر .. وخاصة يوم الخميس

ويوم الجمعه يسكرون الساعه 8 ومحلات الهدايا ما يفتحون يوم الجمعه


وذا بعد تبين شي .. حاضرين للطيبين

وبالتوفيق ان شاء الله
17-02-1425 هـ, 08:49 مساءً
 
مشكورة اختي افراح امه على ردك الوافي واللي عطاني فكرة مفصلة نوعا ما عن هذي السوق
كما سعدت بأن ردك على موضوعي هو اول مشاركة لك وهذا ما اسعدني فعلا وان شاء الله تكون فاتحة خير لك في منتدانا الاكثر من رائع. واذا عندك بعد معلومات عن مدينة دبي ووين الناس تتسوق وبعد وين احسن الاسواق وارخصها موجودة خبريني والله يجزيك الف خير.

أختي الين 1 رديت عليك على الخاص اتمنى ان تكوني استفدت ومسامحة يمكن ماشرحت لك شرح مفصل لأني كنت البارح مشغولة وكنت مستعجلة وحياك الله في بلدك البحرين.

تحياتي
أم يقين
18-02-1425 هـ, 11:11 صباحاً
 
ما شاء الله الاخت افراح امه كفت ووفت الله يعطيها العافيه
وانا بزيدج من الشعر بيت هههههههههههههه
الشيل والعباءات
الشنط
الاحذيه
الجلابيات
الهدايا
ملابس الاطفال
المكياج
الشباصات او الشكالات
قرطاسيات
الراشن
كله بتحصلينه بالجمله
18-02-1425 هـ, 12:10 مساءً
 
اشكر الاخت (السّّّـلم) على اعطائنا هذه المعلومات كما اشكر كل العضوات الاتي شاركن في الاجابة على اسألتي
ولكن وين بنات الكويت انا طرحت نفس الاسئلة عن الكويت هل يوجد عندهم فعلا سوق بأسم سوق الجملة أم لا واذا عندهم نروج التكرم بالتوضيح ولكم جزيل الشكر.

تحياتي
أم يقين
20-02-1425 هـ, 04:34 مساءً
 
يعطيكم العافيه أخواتي ...

أم يقين ... السوق اللي خبرتج عنه هو الارخص في دبي و ينفع للجمله ... أما اذا تريدين تتمشين و نشنرين الاشياء الغاليه .. روحي المراكز التجاريه في دبي و ما أكثرها ... و منها: مركز برجمان - وافي سنتر - الغرير - سيتي سنتر - مركز حمر عين .... الخ



بالنسبه لأسواق الكويت .. رحت مره هناك .. و خبروني عن سوق المباركيه .. والصراحه سوق حلو ... شعبي و فيه كل شي .. بس أسعاره مب رخيصه وايد مثل دبي

و بيني وبينج شفت وايد أشياء هناك هم يشترونها من دبي بالجمله و يبيعونهم بالحبه


و بالتوفيق
21-02-1425 هـ, 08:48 صباحاً
 


الساعة الآن 08:27 .