السلام عليكم ورحمة الله وبركاته
كيف حالكم ان شاء الله بخير اليوم بسرد لكم قصة اعز صديقة لقلبي طبعا بعد مأستأذنت منها فاطمة ومادراك
مافاطمة من وعيت على الحياة وفاطمة جارة لنا بنت يتيمة الام تعيش مع جدتها لابيها اللي كانت تبيع أدوية
شعبية للحريم وتصرف على نفسها وعلى فاطمة طبعا اهل الحي ماكانوا يقصرون معها الكل يساعدها باللي
يقدر ولاتسألوني عن والد فاطمة لانه بحد ذاته قصة طويلة عريضة بس بختصرها بسطور أنسان عاطل ومدمن
نسأل الله العافية وبعد وفاة ام فاطمة تزوج واستقل بحياته بعيد عن فاطمة
عاشت فاطمة حياتها مثل كل الناس!!! الطفولة بحلاوتها وشقاوتها وكنا مانفارق بعض نأكل سوى نلعب سوى
امي رحمة الله عليها تعاملها كواحدة من بناتها وماتفرق بينا المهم دخلنا مرحلة المراهقة وبدات فاطمة تحس
بالنقص عن البنات من ناحية الجمال فهي سمراء البشرة قصيرة القامة تمتلك شعرا اجعدا وأنف كبير
حاولت افهمها اكثر من مرة ان روحها جميلة واخلاقها العالية تخليها شيخة البنات ويكفي تفوقها العلمي
المهم مرضت جدة فاطمة وساءت حالتها والكل خاف عليها لكن القدر كان فوق خوفنا وتوفت جدة فاطمة
عم الحزن قلوبنا وبكينا يوم بكت فاطمة ومرت أيام العزاء ثقيلة وبطيئة لين حصل اللي ماتوقعناه رحلت
فاطمة عن الحي ابوها أخذها بدون مايحاول اي احد منا منعه امي طلبت من فاطمة انها تكلمها يوميا
عشان نطمئن عليها ففراقها ترك بقلوبنا فجوة كبيرة ماحد يسدها وتعبت نفسيتي
لان فاطمة بالنسبة لي تؤام روحي واكثر المهم مرت الايام وفاطمة تعاني من قسوة زوجة ابوها وحياة
الفقر اللي عايشة فيها وكنت اساعدها دايم ماديا لين ربي يفرجها واتحمل حقارة زوجة ابوها اللي
تسحب من أيدي الاكياس اثناء زيارتي لفاطمة وكانت تتمادي بحقارتها وتاخذ مني الحلويات والملابس
اللي ترسلها امي لفاطمة كل هذه وفاطمة تكثر من قيام الليل والدعاء ان ربي يرزقها بابن الحلال
دخلنا الجامعة وصار تخصصنا واحد والمكافاءة اللي تحصلها فاطمة ياخذها ابوها ويصرف على بلاويه
وفي يوم من الايام اتصلت فاطمة وقالت بكلم امك ضروري كانت مضطربة ونبرة صوتها غريبة
وبعد ماخلصت المكالمة كانت امي مذهولة سالت يمة وش فيه تنهدت امي بحسرة وقالت
فاطمة بتزوج بعد اسبوعين والغريب ان العريس واهلة دفعو المهر بدون مايشوفو فاطمة والملكة بعد يومين
امي خايفة من هالزواج خصوصا ان شباب هالايام يشترطون الجمال والطول والرشاقة واشياء كثيرة
والشاب هذا ماشاف ومستعجل لكن وعسى ان تكرهو شي وهو خيرآ لكم .... اقترب موعد الزفاف
وفاطمة ماشترت الا أشياء بسيطة لان ابوها خذا المهر وعطاها مبلغ بسيط وفي ليلة الزواج الكل مع فاطمة
مع أن الزواج عائلي رجال بس لكن قررنا نشاركها ليلة العمر ونزفها كان الفرح والخوف مبين بعيون فاطمة
الله يوفقك يافاطمة دخل العريس واخذ عروستة لبيت الزوجية وهناك حصلت المفاجاءة اللي ماكانت فاطمة تتوقعها
طبعا الحكاية ألان بتكون على لسان فاطمة
واخليكم معاها^
دخل العريس ومعاه ابوه وسلم وجلس بجنبي بس حسيت انه شاد نفسة وانفاسة ثايرة سلم ابوه علي
وبوس راسي ودعاء لي والعريس ما كأنه موجود لاحظت أن ابوه يحاول يغطي علية ويمزح وأستاذن ابوي
ومشينا وصلت شقتي كانت حلوة ومرتبة ومتناسقة مشيت وأنا مستحية ودخلت غرفة النوم والعريس دخل
علق مشلحة وطلع ؟؟؟ جلست على حافة السرير ومنزله راسي بس المسألة طولت مرت عشر
دقائق وربع ساعة ونصف ساعة بعدها دخل وطلب مني اجلس معه بالصالة
غيرت ملابسي وطلعت كان جلس ووجهه أحمر ومنزل راسه سلمت وجلس على أول كنبه قدامي سألني
تبغين عشاء ؟؟ الحزن واضح من صوته رفعت راسي واول مرة اشوفه نحيف ومتوسط الطول واحس ان فية
نعومة ورقة كرر السؤال انت جوعانه قلت لا... سكت بعدين قام وراح المطبخ وقدم لي كوب عصيروجلس كان
ساكت شغل التلفزيون وصر يتصفح المحطات الفضائية وزاد خوفي كاني غير موجودة حسيت بتعب استأذنت
منه ورحت غرفتي جلست ابكي حظي العاثر ومادري شلون غلبني النوم وغفت عيني !!!! صحيت مثل
اللي لدغتة عقرب الحال زي ماهو الانوار مضأة والباب مفتوح والرجال مافكر يدخل الغرفة حسيت اني عطشانه
قمت بشرب مريت من غرفة الجلوس وسمعته يبكي بكاء مر؟؟؟
رجعت خفت يسمعني ياترى وش فيه ليه يبكي مر الليل بطولة ونمت مع طلوع الشمس .......
صحيت الساعة واحدة أخذت دش وغيرت ملابسي وطلعت الصالة وجلست فتح باب الشقة كان جاي من برا
وسلام وقدم لي الكيس اللي معاة كان فية كلاب سندوتش وعصير فرش وقال ان اهلة بيجون العصر يسلمون
علي واستاذن ودخل ينام مر الوقت بطى لين جاء العصر
وانهل موكب اهلة امه وخواته حسيت انه ماهمهم شكلي كثر ماكانو بيعرفون هل نام معي أو لا بس بطريقة غير
مباشرة جلسو نصف ساعة وانصرفو شغلت التلفزيون وجلست اتفرج على القنوات لين المغرب وحسيت انه
صحى من النوم دخلت علية وسالته اذا يبغى اصلح له قهوة قال لابطلع وفعلا بدل ملابسة وطلع استمر الوضع
هذا اسبوع يجيب أكل من برى واغراض من السوبر ماركت ويسأني اذا ناقصني شي ويجلس عند التلفزيون او
يتصفح النت ونفس الحكاية أذا دخلت أنام راح غرفة الجلوس ويبكي على باله اني نايمة آه والف آه على بختي
وين ماطقها عوجا من اشتكي له امي متوفية وأبوي عايش بعالم غير عالمنا ومالي أخت واهلة ماشفتهم غير
مرة يارب رحمتك
مادري وش ذنبي وش اللي سويته قررت اصارحه واترك الخجل على جنب .................
رحت الصالة كان جالس يطالع جواله تكلمت بصوت مبحوح مكسور شوف ياولد الناس ماتبغاني مانت مجبور
تستمر معي انت عذبتني وعذبت نفسك خلاص ماله داعي تجاملني ارحم نفسك وارحمني معاك انا بشر
اللي تسويه معي حرام كنت اتكلم وهو منزل راسة كان يبكي وربي يبكي سألته أنت وش فيك صارحني!!!
أذا بحياتك انسانة انحرمت منها انا بساعدك ترجع لها بس لاتسوي بنفسك كذا كان يبكي بألم سحبت نفسي
وتركته
جلست ساعة وانا افكر بحيرة لين قطع تفكيري ابوه كان يناديني فزيت وطلعت له وسلمت وانا مرتبكة طلب
مني اجلس وأسمعه لين يخلص كلامة هزيت راسي وقلت تفضل قالي انه بعد ماتزوج من ام زوجي ظلت ثلاث
سنوات ماحملت كنا محتارين وش اللي اخر الحمل وبدينا رحلة العلاج حتى حملت وولدت بنت فرحنا جدأ
بهالبنت وبعدها حملت ورزقنا الله ببنات وعيال كبرت بنتنا البكر بس مالاحظنا عليها اي مظاهر البلوغ خواتها اللي
اصغر منها بلغو وهي لا؟؟؟ كانت انطوائية ونادر ماتصارح امها باللي في بالها المهم قررنا عرضها على أخصائية نساء
وولادة ونعرف سبب تاخير البلوغ وكانت المفاجاة انه مو بنت ذكر بس يبغى له عمليات عشان يكون طبيعي
انصدمنا كلنا ويوم صارحناها قالت هي حاسة انها موطبيعية فيها شي غلط وسوت العملية ورجعت ذكر بس
بنفسية تعبانه لانه مو سهل الوضع عليها ونظرة الناس واشياء كثيرة والطبيب اخبرنا انه يبغي لها وقت
حتى تتكيف على الوضع الجديد ولازم مراجعة طبيب نفساني حتى يكون شاب طبيعي اللي هو زوجك يافاطمة
امه اصرت على تزويجه قبل اكمال العلاج عشان تسكت الناس واتفقت مع خطابة تدور بنت عادية واهلها يكونو ناس
على قد حالهم وابوك كان حاط رقمة عند الخطابة اللي نعرفها بالصدفة!!! وصدقيني انا ماكنت راضي بس شسوي
امه والعناد اللي فيها كان يتكلم ودموعي تنزل بصمت زي ماعشت ..وتزوجت.. وانصدمت.. بصمت
فاطمة ابوك كان عارف؟؟؟؟؟؟؟؟؟؟؟؟ وربي عدو مو ابو حسبي الله ونعم الوكيل
أخذت فاطمة اغراضها وطلعت من حياة زوج غامض لدنيا ابوها اللي كلها غش وخداع بس رجعت وهي
راميه الخوف والصمت اللي ضيعاها واكملت دراستها والان معيدة بالجامعة وقدرت فاطمة تصنع من ظروفها
مستقبل قوي تتحدى فيه اي ريح غامضة
وسلامتكم
نسخ ولصق @nskh_olsk
عضوة فعالة
يلزم عليك تسجيل الدخول أولًا لكتابة تعليق.
بثـينة
•
قصه محزنه ...
بس ما ادري كسر خاطري زوجها .. لأنه ابتلى و هذا قسمة رب العالمين فالحمدالله على كل حال ...
والله يعافي الجميع وييسر امور الكل يا رب ويسعد فاطمه و يرزقها الزوج الصالح والذرية الصالحة ..
بس ما ادري كسر خاطري زوجها .. لأنه ابتلى و هذا قسمة رب العالمين فالحمدالله على كل حال ...
والله يعافي الجميع وييسر امور الكل يا رب ويسعد فاطمه و يرزقها الزوج الصالح والذرية الصالحة ..
الصفحة الأخيرة
نحزن لفاطمة وإلا زوجها؟؟
الله يكون بعون الجميع