السلام عليكم ورحمه الله وبركاته

المهم بدخل بالموضوع على طول ملكه بنت عمي الشهر الجاي وهي اختي وحبيبتي وطول عمرنا عايشين مع بعض
عشان كذا انا المسؤله عن ملكتها

طبعا العشى مفطح اكييد بس المشكله انا مشتته ابي اعرف وش اسوي على السفره من حلى وسلطه واي شي
يكوون حلو ومرتب ومو لازم مكلف بس ابي سفره الكل يتكلم عنهاااا

عاد همتكم يا طباخات تساعدوني بافكاركم واقتراحاتكم ولكم مني دعوه بظهر الغيب
انا بقولكم وش فكرت فيه طبعا قلت بسوي ورق عنب وايدام ومكرونه بالباشميل وعيش السراي وسلطه
وحلى كاسات مثل الجلي والكاسترد والبسكويت بس ماعرف طريقته مضبوط

بس احس افاكري شوي قديمه خخخخ

و فكرت اسوي عند الحريم على القهوه بسبوسه شفتها هنا حلوه مره وطبعا بقلاوه من برى وشولاته وش رايكم
الف مبروك ملكت بنت عمك والله يتمم لها على خير
وانتي الله يبارك لك يارب وتقدرين تسعدين الضيوف

ويارب البنات يساعدونك والطباخات
لان مالي خبره بالمطبخ وداجه ولا المصيبه زواجي بشهر 8 يعني مالت على خشتي
لذلك دخلت علشان ارفع لك الموضوع ياعسل وادعي لي معك ^_^

الف مبروك والله يتمم لها

حطي على العشا محشي كوسا وسمبوسه وسبرنق رول

و صينيه بطاطس بالجبنه

وسوي فطاير التوست تفرديها وتحشيها بدجاج بذره ومايونيز وجبنه وتحطيها بقطاعه الفطاير وتقليها مره حلوه

لازم اطباق شعبيه هريس باللحم او الدجاج او جريش

حطي تشيز كيك انا نزلت طريقته مصوره ابحثي بمواضيعي شكله مره حلو ويضبط

حطي مصقعه مره حلوه ويحبونها الناس

وسلطه خضراء وتبوله

اتمنى اكون افدتك
المقبلات تبولة ـ متبل ـ حمص ـ فتوش ـ ورق عنب ـ محشي كوسة
اطباق شعبية جريش ـ مرقوق ـ
صينية مكرونة بالباشميل ـ مكرونة بالقشطة والجبنة ـ
حلى العشاء ـ حلى الكاسات ـ حلى التوكس ـ حلى طبقات البسكوت مع الدريم والجلى ـ
وأحسن شي يكون نظام بوفية أحلى وارتب
واذا تبين اي طريقة انا جاهزة


الساعة الآن 05:18 .