السلام عليكم ورحمة الله وبركاته




أخواتي بنات حواء السنعــــــــــ ـــــــات


اصالة عن نفسي وعن اخواتي الرفلات .... نرحب بكن


وبصراحة قررن نصير سنعات وكلنا أمل بأن تاخذوننا بأدينا نحو السنع .....

وبصراحة انا قررت ماعاد اودي مفاطيح زوجي المبجل الى المطاعم .. لانها بصراحة ماتنوكل ...أدري بتقولون


اول ماشطح نطـح بس ماعليه هههه

بالفعل ابي تعلموني شلون اسوي الذبيحة؟ وياليت بالصور ؟؟

شاكرة لكم تعاونكم

وأتمنى كشفت عن طلب باقي زميلاتي الرفلات



بانتظاركن

ماشاء الله تبارك الله الحمد لله

والله لو عرفت بدري كان صورت ونزلت لك لان امي وبيت اهلي دايم عزايمهم من شغل يدينهم
واغلب جماعتي كذا وبصراحة مفطحات اهلي ماينشبع منها ونعمتهم يحسنونها الناس ياربي لك الحمد
بس بأذن الواحد الاحد لااصور لك طبخ المفطح وانزلها<<<اصبري لين يجي ضيف

عموما حبيتي راح اقول لك طريقتنا بطبخ الذبايح
طبعا تجيبن القدر الكبير يشيل ذبيحة او ذبيحتين
على حسب ضيوفك حنا احيان كذا واحيان كذا
المهم تملينة موية وترفعين النار طبعا الغاز ارضي وكبير ويكون حلقات
دائرة ورى دائرة علشان يستوي الرز على مهلة
انا راح اكلمك الان على الرز الابيض اوكية
خلاص الان بدت الموية تغلي انتي تكونين منظفة المفطح مظبوط من الشعر
اللي يلصق فية بعد السلخ وطبعا تشلوطين الراس بعد
ماتغسلينة عن الدم وبعد ماتشلوطينة تحكينة بسكين لين ينزل السواد اللي فية
غسلية بموية وحطية هو والمفطح بالقدر بس بشويش لايطير عليك الماء الحار
عاد تكونين مقطعه بصل ملي قدر وسط صغااار جدا
وارمي البصل بالقدر تقريبا البصل(خيشة بصل صغيرة كاملة) اضيفي بعد قرفة وخولنجان وملح
وخلية يطبخ وعلي علية النار وكل شوي تعالي وشيلي الريم
اللي يطلع على سطح القدر


يتبع
خلاص فاهمة علي لاتفضحيني عند رجالك وضيوفك افهميني ززززيييين!!!!!!

لازم كل شوي تجين تشيلين الريم لانة يسود بالللحم وبالرز وتطلع ذبيحتك طعمها مو زين
تجلس الذبيحة تطبخ تقريبا من ساعتين ونص الى ثلاث ساعات يعني لو غدى ركبي قدرك
من 10 الصباح <<<< يالله صباح خير
ولو عشى من قبل المغرب بنص ساعة طبعا هذي الاوقات دخلي معاها الزمن اللي بتطبخ
فية موية القدر لحاله لان هذي يبغالها وقت حتى تطبخ وصلنا عند الريم طبعا كيف تختبرين
الذبيحة هي استوت او لا غزيها بس مو من فوق لا مع الجنب علشان العادات والتقاليد ماتخربين
مفطح الضيف <<<< مسوية فاهمة بالعادات
المهم اذا طلع دم توها مااستوت اذا لا معناها لازم تطلع حالا من القدر روحي هاتي الشنكار حق اللحم
يجي طولك تقريبا <<< كني اشوفك المهم هاتية وطبعا لازم يجي رجال يشيلة معاكي لو تشيلينة
لحالك تكرفستي انتي ومفطحك بالقدر وصاروا اثنين <<<< تررى امزح لاتزعلين والا مااكمل هههاي
اح يدي عورتني من الكتابة


يتبع
طلعتي الان المفطح والراس والجنبين واليدين والكبد كل هذي تحطينها نسيت اقول لك بالبداية
كلها تطبخ مع المفطح واذا استوت وطلعتيها هاتي صينية الفرن الكبيرة تجي مع الفرن كبيرة مرة
حطي فيها كل الاشياء السابقة واخلطي بصحن وسط ملعقتين هرد ملعقتين بزارات وملح ملعقة صغيرة
او اذا ملحك للقدر كان زين خلاص لاتضيفين وطبعا صبغة الزعفران ضرورية تعطي نكهه خياااااال حطي على قد
حاجة ذبيحتك اذا صغيرة او كبيرة وطبعا ملي فنجان الشاهي زيت واخلطي كل هذي الاشياء مع بعض
وابدأي بدهن المفطح مع كل الجهات وكل باقي اللحم اللي مع االمفطح ودخليه الفرن وشغلي الفرن من فوق بس
وقصري علية
الان نرجع للقدر طبعا انتي تكونين من بدري من بعد ماركبتي القدر قد غسلتي الرز ونقعتية طبعا حنا نحط تقريبا
3 خياش صغيرة رز وممكن نزيد خيشة بعد المهم روحي للقدر وخلي احد يمسكة معاك وحطي مصفاية بقدر ثاني
وصبي المرق بشويش الين يتصفي ويصير بقايا الطبخ بالقدر الكبير خوذي القدر الكبير وغسلية وارجعي رجعيه على النار وصبي المرق اللي صفيتية علية روحي قطعي بصل مثل الكمية الاولى وارجعي اضيفية على القدر وخلية يطبخ
كذا عشر دقايق وذوقي الملح لاتنسين! ممكن تضيفين فلفل بارد مقطع صغار مرة تقريبا ملي قدر صغير
يعطي نكهه روعه او ارمي حبتين فلفل كبيرة بنفس القدر من دون تقطيع...
طبعا اذا كانت الذبيحة سمينة مرررررة حاولي تشيلين الدسم او الزيت اللي يطلع على وجة القدر
حتى ماتصير الوجبة دسمة بالحيل وعلى فكرة امي تضيف بزارات وقت طبخ المفطح لانها تقول تقطح ريحة
اللحم انتي حطي بهارات تقريبا قد فنجال الشاهي ثلاث مرات المهم الان القدر اخذ عشر دقايق طبخ

اه والله تعبت بكرة اكمل
ما شاء الله عليك يا ام شهد . . .

انتظرك كملي . . .

سبحان الله وبحمده سبحان ررب العظيم

سبحان الله وبحمده سبحان الله العظيم








الساعة الآن 07:21 .