تراها صح زي مايقولوا بعض الناس جامعة كويسة وسمعتها ممتازةبس العيب فيها نظام السنة التحضيرية والدكاترة كلهم الا من رحم ربي . طبعاً ما أخفي عليكم أغلب الطلاب يعني 98% من الطلاب يسموها سنة زفت أو نخليها على حسب الوزن (( سنة تعجيزية)) . بصراحة شي يقرف ويجنن . والله نحن مظلومين ما يسير يا عالم ، لا ويقولوا السنة الجاية بيشولوها يعني ما في (( سنة تعجيزية )) . هيا قولولي بالله مو نحن مظلومين إيش ذنبنا نضيع في هادي السنة وما ندخل الكلية اللي نبغاها والطلاب اللي يجوا بعدنا في السنة الجاية يدخلوا الكلية اللي يبغوها وهما مرتاحين ونحننتهجولونتبهدل ونتمرمط من اختبار قدرات لاختبارات تحصيلية وغير نظام التراكمي اللي يطيح أم النسبة وبعدها تجينا السنة التحضيرية((النكد والقرف والهم) واللي فيها من مواد بالإنجليزي واغلب الدكاترة زي الزفت . وهادا غير الكليات اللي قاعدة تتفلسف وتشترط درجات معينة أو نسب معينة أو تشترط B+ في مادة كدا ، أو B في مادة كدا , أو زفت في مادة كدا , والله ما يسير يا عالم . هيا تصدقوا بالله يجينا دكتور الفيزياء يشرحلنا الدرس ونجي يوم الاختبار نلاقي في اسئلة يبغالها قوانين ونحن ما أخدناها ولا نعرف عنها ولا شي . وبعدين يجيك يوم و يقعد يحل اسئلة الاختبار وقاعد يطلعلنا قوانين عمر أبونا ما أخدناها ولا شفناها في الترم كلُو , نقلُوا إيش هادا يا دكتور؟؟ إيش دي القوانين؟؟ (( أتوقعوا إيش رد؟؟
**(( قال : أنا مو كل شي أقلكم عليه))** شوفوا بالله متى يقلنا هادا الكلام . بعد ما ضعنا في الاختبار .
و أزيدكم من الشعر أبيات . يجينا في الترم التاني دكتور الأحياء أو بالأصح البروفيسور في الأحياء <<< قم بس قم والله انك منسِِم(( وربي مافي راسو ولا شي Nothing )) . يجينا كل محاضرة بلاب توبو الضعيف (( HP من عام الفيل )) ويقعد يعرض علينا المحاضرة وبس بعدها يقعد يردح ويبربر وإنتوا لو تشوفوا الطلاب في القاعة وربي القاعة كلها يبغالها تصوير اللي نايم واللي يكتب ذكريات واللي يسمع أغاني بالـ iPod و اللي يتكلم بالجوال . و البروفيسور شغال بربرة (( ول عليه ما يفتر)) . ولا!! اللي يضحِك كمان لما يجي يشرح الدرس عن طريق الـ Power Point يجي مثلاً عالشريحة الأولى يقعد يقلنا (( هادا طبعاً زي ما إنتوا عارفين أخدتوا أول )) . ويقعد يقرا سطرين أو 3 وبعدين يقلب عالشريحة التانية . طيب يا هووو!!! نحن ما شفنا شي ما قرينا شي . لا لا!! مافي خلاص إنتوا أخدتوا أول يعني عارفينوا . طبعاً هادي المادة عندنا كل أحد وتلوت فتعالوا وشوفوا النظام الجديد اللي اخترعوا البروفيسور . إيش يقول هادا النظام؟؟؟ . يقول النظام الجديد : (( يا شباب ترى يوم الأحد مافي تحضير بس يوم التلوت , يعني إذا جيت أو حضرت المحاضرة يوم الأحد وما حضرت المحاضرة يوم التلوت تُعتبر غايب يوم الأحد و التلوت .)) <<(( لا تعليق)) . واللي يخليك نفسك تلطش الدكتور لما يقلك تعال المحاضرة الفلانية في يوم كدا في وقت كدا وإنت تضرب مشوار الين الجامعة وآخرتها ولا يجي الدكتور . وسواها البروفيسور التعبان دا . دحين نحن عارفين إنو أيام الاختبارات مافي محاضرات إلا بعض الشعب حسب الدكتور طبعاً . المهم أيام الاختبارات نختبر و نمشي , هادا البروفيسور قلَنا تعالوا يوم كدا عشان في محاضرة في نفس الوقت والقاعة . وأضربلك مشوار في عز الظهر الساعة 12 الين الجامعة و أروح القاعة وأقعد استنى مع اصحابي هناك , وآخرتها ولا جا سحب علينا . هيا بالله ايش يكون شعوركم لما دكتور يسوي كدا . ولا !! يقلنا في تحضير وفي أشياء مهمة .
هيا تعالوا بعدها عالكيمياء . بصراحة دكتور روعة دكتور ممتاز دكتور بحق وحقيقة ما عليه أي شي ولا عيب . بس!! العيب في اللي يحط الأسئلة . اللي يحط الأسئلة دكتور زي الزفت . يحط أسئلة تعجيزية تنكيدية يحب ينكد عالطلاب دايماً وكل سنة كدا . أصلاً الدكتور حقنا دايماً يحذرنا منو يحذرنا من أسئلتو يقلنا شدوا حيلكم تراه يحب ينكد عالطلاب كل سنة . هيا أقلكم أنا والله يوم اختبار الكيمياء ذاكرت تمام وشديت حيلي بس!!؟؟ . المهم وقت الاختبار جات الأسئلة وبديت أحل . حليت أول 7 أسئلة قلت في نفسي كدا تمام اذا باقي الأسئلة كدا يسير مرة تمام <<< في أحلامك يا حبيبي . المهم وأجيلك عالسؤال 8 لا خليه شوية!! السؤال 9 شوية و أرجعلو!! طيب السؤال 10 خليه في النهاية!! <<< إيش حليت ماني داري . أقلبلك الصفحة ولا شي ماعرفت إلا 4 أسئلة <<< أقول أحمد ربك إنك عرفت شي . و الله أنا في السؤال 15 وبقي عالوقت نص ساعة <<< متى أحل الباقي أنا ماني داري؟؟ . وهادي تُعتبر مشكلة تواجه كل طلاب الجامعة . وقت الاختبارات مرررة قصييير . يعني تجينا أسئلة في الرياضيات ولا في الفيزياء ولا في الكيمياء يبغالها حل طويل وتلاقي الوقت ساعة ونص بس .مرررة مافي وقت كافي . المهم نرجع لأسئلة الكيمياء , جانا سؤال عن الرسمات أو الأشكال اللي تخالف قاعدة هُند . أنا طبعاً من الثانوية عارف إنو قاعدة هُند نوزع الاليكترونات في الغرف أول شي فوق وبعدين على تحت . إنتوا لو تشوفوا الأشكال اللي حاططها وربي كلها غلط (( اللي إليكترونين فوق واللي إليكترونين تحت واللي غرف فاضية ما فيها ولا شي )). مافي ولا شي صح والمشكلة إنو مافي مرة في الخيارات جملة All of these . هيا بالله إيش نحط؟؟ خليها على الله. والله من شعبتي أنا بس 5 طلاب سحبوا ملفاتهممن الجامعةهادا غير الباقين والسبب !!؟؟ . الأسئلة اللي زي الزفت. في واحد صاحبي في شعبة تانية يشتكي من دكتور الكيمياء نفسو. يقلي أول شي خطو كإنومؤشر نبضات القلب اللي في المستشفيات. يقلي والله ما نفهم ولا شي ما نشوف في السبورة إلا طلاسم . تاني شي يقلي طبعا زي ما إنت عارف كل قاعة فيها سبورتين فوق بعض وحدة تطلع ووحدة تنزل. لما يجي يكتب وربي يقعد يسويلك تقاطعات ودوار ويقلب على اشارات . يعني لو ما انتبهت معاه تضيع نهائيا. حتى لما نقلوا استنى شوية يا دكتور يقول لا مافي وقت. والله يقلي معظم شعبتي اخذين مدرس خصوصي بدل التعبان اللي عندهم. يعني والله يا ناس حرام دكتور زي دا ياخد راتب على اللي بيسويه. بالله التعليم صار سئ لهادي الدرجة عندنا ؟؟ . لا حول ولا قوة إلا بالله. هيا دكتور الرياضيات أنا ماني داري على ايش صار دكتور. وربي مالو نفس يشرح دايما كل محاضرة يجينا ويقعد يتكلم معانا 5 دقايق ولا 10 دقايق بعدين يقعد يحللك مسألة أو مسألتين وبعدها يمشي. ويجي يوم الاختبار ونحن ما ندري ايش المنهج. الشي الحلو فيه انو ما بيحضر ولا بيغيب.
وتعالوا نزيد الطين بلة ونكمل الناقص. يجيلك بعدين الدكتور حق الانجليزي اللي يدرسنا Grammar section . وربي لو تشوفوا تدريسو مو قاعد يدرسنا انجليزي قاعد يدرسنا فلبيني . دخلنا اليوم الأول وهو قاعد يبربر ويشرح. طبعا نص الكلام مو مفهوم . شكلو عندو ثقل في اللسان بسبب لغاليغو اللي في وجهو . المهم , شوفوا المصيبة الأكبر, لما جا يكتب عالسبورة القلم طلع مغلق. هيا قولولي بالله إيش المفروض يسوي الدكتور؟؟ طبعا يغير القلم. لا لا لا!!! هادا ماغير ولا شي قاعد يكتب في السبورة ويشرح. يابووو!!!ياهووو!!! القلم مغلق , ألووو!!!(( لا حياة لمن تنادي )). واللي يقهر إنو لما يجي يكتب كلمة مهمة يقعد يحبر عالكلمة , (( هو القلم أصلا يكتب علشان تقعد تحبر عالكلمة يا فتش )). وتصدقوا, إنو لما يجي المحاضرة التانية , نفس القلم المغلق حق أول . في النهاية ما أقول غير: ترى هادا كلو اللي قلتو بس بس بالنسبة لشعبتي وشعبة صاحبي وأنا متأكد مليون في المية إنو الشعب التانية بتشتكي من نفس الشي : الدكاترة و الأسئلة وغيرها وغيرها من المشاكل. والله مايسير ياناس كدا, يعني ليش هادا التعقيد كلو؟؟. يعني حتى لو بنروح جامعة أم القرى برضو ما ينفع لأنو بصراحة حسب ماسمعت التدريس هناك مرررةطااااااايح التدريس تعبان بنسبة كبيرة. يعني حتى الطلاب اللي هناك ما أدري إيش ذنبهم يضيعوا. أنا ما أتمنى غير إنو الوضع يتعالج بسرعة و إن شاء الله يطلع حل مناسب لهادي المشكلة اللي حيروح ضحيتها آلاف الطلاب. وخاصة مشكلة أوقات الاختبارات. بصراحة الوقت مرررة ما يتناسب مع الأسئلة. أسئلة طويييلة وصعبة والوقت تلاقيه ساعة ونص يعني حتى ما يمديك تقعد تفكر وترتب الحل والله مشكلة. و أنا ما أقول غير: (( الله يعدي هادي السنة على خير )).
· صورة مع التحية والتقدير لوزير التعليم العالي : أ. خالد العنقري.
· صورة مع التحية والتقدير لمدير جامعة الملك عبدالعزيز: أ.د. أسامة بن صادق طيب.
· صورة مع التحية والتقدير لعميد كلية العلوم.
· صورة مع التحية والتقدير لمدير مركز اللغة الإنجليزية.
وربي صعبه وكلها مواد علميه اكثرها
المشكله اننا انتساب
وادبي :angry2:
مستحيل يبعدو السنه التحضيريه
كلام بشر بس :(
الان الكتب الي ندرسها جديدة
السنه التحضيريه كانت اول سهلة
لانها اجتماعيات
ودين
وعربي
الان لا كلها علميه
كتب جديدة
يعني مستحيل يبعدو السنه التحضيريه
حسبي الله ونعم الوكيل