السلام عليكم ورحمة الله
كيفكم بنات حواء عساكم بصحة وخير
:icon35:
حبيت ابشركم بولادتي
بأحلى واجمل بنوتة
وسميناها العنود
في 4-5 العصر
الحمد لله يارب
:icon28:
وهذي قصة ولادتي
كان من المقرر بطريق الحسبة ان ولادتي تكون بنهاية شهر 4
وانا معاي ولد من قبل فديت عمره فعندي شوي خبره بالموضوع ضنيت من دخلت التاسع
اني مارح اكمله نفس ولادتي الأولى وخاب ضني وخلصت التاسع وولا شي بس على بداية شهر خمسة من اول يوم تقريبا صارت تجيني طلوق مره تكون منتظمة ومره لا بس ألمها يشبه الى حد ما الاام الدورة
وكل يوم اقول هذي هي اليوم ان شاء الله بولد
عطتني الدكتورة موعد في 4-5 مراجعة عادية
وانا كل يوم ادعي مااوصل لهالتاريخ واولد
.. قبلها بثلاث ايام خلاص الصبر عندي وصل للصفر
وكانت تطلع معاي افرازات سائلة احسبها ماء الجنين
رحت بعد ماتوكلت على رب العالميين عند دكتورة بمستشفى خاص
وقلت لها عن الافرازات والالام
شيكت لي من تحت وحصلت الرحم فاتح 3 سم
ارتحت بصراحة قالت لي يومين بالكثير بتولدين ان شاء الله
وتغيرت نفسيتي للاحسن الحمدلله ربي
على حملي هذا كنت احرص اكثر من حملي الاول
كنت حريصه في حملي الاخير على المشي السريع من الثامن للنهاية التاسع تقريبا
نص ساعة
المهم قبل لا اولد بيوم بالليل سويت لي كوب عصير مانجو وحطيت فيه زيت خروع شوي
ونمت مع زوجي افهموا يعني:35:
على الرغم من الطلق اللي كنت احس فيه اختفى فجأة قبلها بيوم
قبل لا اروح سويت لكم موضوع هنا اطلب منكم تدعوا لي اني ما اطلع من عند الدكتورة الا وانا والده
رحت الصبح موعدي بدون مانام من الخوف والارتباك ولا احس بأي الم
:mad:
ولساني ماوقف من الدعاء وذكر الله
بعد مادخلت للدكتورة قلت عن سالفة الدكتورة الخاصة
قالت بنسوي لك تخطيط اذا فيه طلق او لا انا هنا جاني احباط لاني مافيني الم
يعني بترجعني للبيت وكأنك يابو زيد ماغزيت
سدحوني على السرير وحطتلي الممرضة التخطيط ومن جلست بدت عندي الام مثل الدورة منتظمة سبحان الله
شافت الدكتورة التخطيط قالت عندك طلق خليني افحصك من تحت لقت الرحم مفتوح بين 3 و 4
قالت يلاا جيبي اغراضك وتعالي ولادة
طرت من الفرحة بس جسمي تعبان قلت بروح انام وان زاد الألم عندي بجيكم قالت لي زين رحت البيت وقلت لزوجي السالفة
ونمت معاه مره ثانية لاني سمعت انه يعجل ويحمي الطلق وكمان يفتح الرحم
ونمت بعدها هذا الظهر مانمت غير ساعة وصحاني الم فضيع مثل المجنونة
وقلت لزوجي يللا ابي اروح عند امي المسافة بين بيتنا وبيتهم 5 كيلو بس
وكنت ناوية اجلس شوي بس كان الألم لا يطاق واحس
ان الطفل بيطلع اي لحظة والماي طلع
ماخلوني رحنا المستشفى يمكن على الساعة 3 تقريبا
جلسوني بكرسي متحرك لأن خلاص ماعد اقدر اوقف على رجولي دخلوني
غرفة الولادة وفحصتني الممرضة لقته 5 سم قلت اوووهوووو السالفة مطولة
وكنت اترجاها تعطيني شي يخفف الالم ولو شوي بس مالحقت
حسيت ذيك اللحظة بشي بيطلع مني صحت قلت باتطلع بنتي
شافت من تحت حصلت الراس باين خلاص قالت ادفعي قلت ليش مفتوح الرحم كله قالت ايه استغربت ماشاء الله
توها تقولي 5 سم وحاولت ادفع وانا ادعي ربي يهون علي حسيت كأن قلبي بيوقف من شدة الألم
قلت لها مارح تقصين لي البيبي ماقدر قالت مافي داعي انتي والده من قبل
وكل ماقالت لي ادفعي ادفع وادفع وادفع الين طلعت روح مامتها عنوووده
بس حسيت هالمره اختلفت ولادتي عن بكري حسيت بكل الم وكل شي
بدون تخدير ولا مساعدة كاني والده بالبيت
حسيت انه في شي مو طبيعي بنتي خذوها وما عطوني اياها والممرضة مربوشة قلتلها وش فيك
قالت عندك نزيف ارتعت انا عندي فقر دم والنزيف مو لصالحي
بعدها اكتشفت انه المهبل عندي تشطر من كل مكان من داخل وبرع بسبب الولادة كان المفروض تقص بس هي عندت ولا سوت لي شي
والنتيجة التمزق قالت لازم اخيط لك وجلست تخيط بدون تخدير
حسبي الله عليها صرخت من الألم وبكيت حسيت انه لا حول لي ولا قوة وانا اتلوى تحتها
وهي تصرخ بوجهي لا تتحركين قلت لها حرام عليج
توني والده وتألمت بما فيه الكفاية على الأقل سوي لي تخدير موضعي ارحميني حرام عليج
عطتني شوي تخدير ولا نفع معاي بعد كنت احسب بكل شي قالت
شكلي بنادي الدكتورة انتي صعب التعامل معاج والله قهرتني بس مالي خلق ارد عليها
جت الدكتورة مصرية تشوف وتكلم الممرضة بالإنجليزي عشان ما افهمهم
مايدرون ان تخصصي ترجمة انجليزي خخخخخخخ
المهم تقول لها وش ذا وش سويتي وخبرتها
قالت عطيني مخدر اقوى لأن هذي المنطقة تكون مؤلمة كثير
فسوت لي تخدير وكملت خياطة
وخلصوا انتظرت يجيبون بنتي
وكنت احس بأعياء فضيع غير طبيعي بسبب كمية الدم اللي فقدتها
وعطوني النونو وطلعت من عندهم
لغرفتي بالمستشفى
بصراحة حرمت اولد فيه مره ثانية
وبس هذي قصتي من طق طق للسلام عليكم
مجنونة كروشية @mgnon_kroshy
عضوة فعالة
يلزم عليك تسجيل الدخول أولًا لكتابة تعليق.
الف حمدالله على السلامه وتتربى بعزكم ياربالف حمدالله على السلامه وتتربى بعزكم يارب
الصفحة الأخيرة
بس ليه سوت معاك الممرضه كذا حسبي الله عليها المفروض تعمل نتوسيع .... وبعدين ليه الدكتوره ما اشرفت على ولا دتك ...ياليت تذكرين اسم المستشفى والدكتوره عشان نستفيد ....