::
السلام عليكم ورحمة الله وبركاته

لو سمحتم احتاج مساعده
انا اموت في صينية الفراخ على الطريقه المصريه
سالت عن طريقتها بس افضل شي تكون من مصريه عشان تكون على اصولها
ينقل من الساخنة الي الاطباق
مفهمناش معلش تقصدى ايه بصينية الفراخ؟
قصدك صينية بطاطس بالفراخ؟ ولا قصدك اللى بتكون شكلها ازاى؟
اقتباس مشاركة  (la rosa)
مفهمناش معلش تقصدى ايه بصينية الفراخ؟
قصدك صينية بطاطس بالفراخ؟ ولا قصدك اللى بتكون شكلها ازاى؟
نعم حبيبتي اقصد صينية بطاطس بالفراخ
والف شكر لك
صينية البطاطس بتتعمل اما بالفراخ او اللحم
اللحم يستحسن تسلقيها سلق كامل ولو بالفراخ يبقى الفراخ تتسلق نص سوا بس
بتجيبى البطاطس تقشريها و تقطعيها حلقات متوسطة السمك وتحطيها فى حلة (طنجرة) وتجهزى الصلصة بتكون طماطم مضروبة فى الخلاط معاها بصلة وفلفل اسود وملح وبهار مشكل مش كتير ومعلقة كبيرة صلصة (روب بندورة) اضربى الطماطم مع الاضافات دى فى الخلاط لغاية ما تحصلى على طماطم بيوريه ولو احتاج شويه مية حطى عشان يقدر يتحرك فى الخلاط
صبى الطماطم على البطاطس وشغلى النار عليها لغاية ما تبتدى تغلى
اطفى وحطيها بصينية الفرن وتكونى مجهزة الفرن على درجة متوسطة ومسخناه
حطى البطاطس فى الصينية والصوص معاها بس خلى بالك متمليش الصينية للاخير عشان لما تغلى متنكبش فى الفرن
قطعى على الوش حلقات بصل وحلقات طماطم وحطى الفرخة بعد ما تقطعيها اربعة او 8 اجزاء
حطيها فى الفرن نص ساعة او ساعة الا ربع حسب فرنك وبالهنا والشفا
ملحوظة لو خليتى البطاطس تغلى شويه فى الحلة يبقى هتقعد فى الفرن نص ساعة ولو طفيتى عليها اول ما بدات تغلى يبقى خليها ساعة الا ربع


الساعة الآن 09:01 .