[
FONT=Arial] لو سمحتم خواتي سيدات الاعمال الامارات
اناعندي مبلغ من المال افكر اشتري فيه اسهم بس ماعندي ادنى فكره عن الاسهم وكيفيه التعامل بها فرجــــــــــــــــــــاء من الاخوات الي عندها فكره ما تبخل علي بها وبشو تنصحوني ولكم جزيل الامتنان والله يوفقكم ان شاء الله
[/FONT
]


لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
الاخت فصــــــول:

في البدايه لازم تعرفين أشياء أساسيه و عامه قبل لا تدخلين سوق الاسهم

أولا لازم تحددين نوعية المعاملات اللي تبينها في الاسهم

و منها نوعين:

ناس يشترون الاسهم وغالبا هم أصحاب المبالغ الكبيره ( نص مليون وفوق ) و يبيعونهم ثاني يوم أو أقرب فرصه بمجرد يرتفع السهم مبلغ بسيط وياخذون الارباح

واعطيج مثال بسيط:

سهم اتصالات سعره هاليومين 125 درهم للسهم الواحد

انتي عندج نص مليون درهم واشتري فيهم اسهم اتصالات اليوم

500000 تقسيم 125 = 4000 سهم

يعني بمبلغ نص مليون اشتريتي 4000 سهم

ثاني يوم أو بعد يومين أو بالكثير اسبوع زاد سهم اتصالات خل نقول درهمين بس

يعني في كل سهم حصلتي عليه درهمين ... يعني لو بتبيعين نفس الاسهم اللي اشتريتيها بكون سهر الواحد 127 و بتحصلين 2 ضرب 4000 = 8000 درهم ( ربح )

اتخيلي ربح 8000 درهم خلال يوم أو يومين أو اسبوع بالكثير

يعني اخر الشهر خل نقول 30 الف ربح

يعني اخر السنه 360 الف أرباح

طبعا اللي يخل هذا المبلغ خلال سنه من الاسهم بكون عبقري زمانه

لان نحن حسبنا الارباح بشكل دايم وهذا مستحيل .. لان الاسهم ترتفع و تنزل على حسب السوق وفي عدة أسباب تغير الاسعار يبالها شرح بروحها

المهم هذا مثال على اللي يتداولون في الاسهم بشكل يومي .. يشتري بسعر رخيص .. وأول ما يزيد السعر يبيعه وياخذ الارباح .. وهكذا

طبعا لا تنسين ان على كل صفقة بيع أو شارء لازم تدفعين رسوم اللي هي 0,005%

يعني اذا اشتريتي ب 100 الف درهم .. تدفعين رسوم للسوق المالي مبلغ 500 درهم فقط

ونفس الشي في صفقة البيع .. 0.005% من قيمة المبلغ


النوع الثاني للي يشترون اسهم:

يشترون أسهم و يخلونها الى نهاية السنه القادمه لتحصيل الارباح .. طبعا الارباح تكون على حسب نشاط الشركه أو البنك .. مثلا بنك ابوظبي الاسلامي وزع هذه السنه تقريبا %75 من قيمة السهم الواحد الاساسيه


طبعا السهم الواحد قيمته الاساسيه ( 10 دراهم ) أما الحين سعره في سوق الاسهم يوصل 30 درهم

يعني مثلا لو اشتريتي اليوم أسهم بنك أبوظبي الاسلامي واللي قيمته الحين 30 درهم بمبلغ 100 الف درهم .. بيطلع لج تقريبا 3330 سهم

اذا كانت الارباح في السنه القادمه بنفس النسبه ( عادة كل سنه تكون الارباح أكثر من قبل الا اذا خسرت الشركه ) بتحصلين أرباح على الاسهم اللي عندج مبلغ 2497.5 دؤهم أرباح فقط بالاضافه الى الاسهم يمكن يكون سعرها واصل في السوق السنه القادمه 40 درهم للسهم الواحد مثلا
تقدرين حزتها تبيعين الاسهم اللي عندج و بتحصلين منهم 133300 درهم من الاسهم نفسها بالاضافه الى الارباح اللي ذكرناها قبل 2497.5

يعني من 100 الف حصلتي مبلغ 133300 + 2497.5 = 135000 و اشوي

يعني خلال سنه دخلتي 35000 ارباح وهذا مبلغ واااايد حلو

بس حبيت اذكرج ان المبالغ مجرد امثله وفي الوقت نفسه احب اقولج ان سعر سهم بنك ابوظبي الاسلامي السنه اللي فاتت نفس هالشهر كان تقريبا بين 20-23 درهم والحين وصل 30 درهم يعني زاد اكثر من 7 دراهم

كل ما تحطين فلوس أكثر .. كل ما بتحصلين أكثر

بس السؤال المهم والاهم .. كيف تعرفين الشركه اللي بتدخل أرباح وما بينزل سعرها عشان ما تخسرين ؟ يبالها شرح أكثر و مفصل في وقت ثاني ان شاء الله

نصيحه: لا تشترين أسهم شركات التأمين أو البنوك الربويه لانها حرام وبعض الشركات الاخرى اللي تتعامل في الربا

في شركات اسلاميه و ما شاء الله أرباحهم عاليه وسهمهم دوم يرتفع مثل: بنك ابوظبي الاسلامي و بنك دبي الاسلامي وشركة ( أملاك للتمويل ) و غيرهم


اذا تبين تستفيد أكثر ويكون عندج شي تقرينه على راحتج .. طرشي أي شخص يروح سوق أبوظبي المالي في برج الغيث في أبوظبي - شارع حمدان أو سوق دبي المالي ( ما متأكد من مكانه ) و ياخذ كتيبيات عن الاسهم . في كم كتيب في سوق ابوظبي يشرح الاشياء الاساسيه وبعض المعلومات عن الشركات المتداوله في السوق ومعلومات بتستفيدين منها وااااايد

في النهايه

هذه موقع سوق ابوظبي المالي على الانترنت www.adsm.co.ae
سوق دبي المالي www.dfm.co.ae

ولي عوده

وبالتوفيق ان شاء الله
ما شاء الله عليج يا أفراح أمه ... كفيتي ووفيتي...
افراح امه ألف شكر على هالمعلومات ومثل ماقالت الاخت Blush
كفيتي ووفيتي بس لوعندج زياده مب مشكله
بس السؤال المهم والاهم .. كيف تعرفين الشركه اللي بتدخل أرباح وما بينزل سعرها عشان ما تخسرين ؟
يبالها شرح أكثر و مفصل في وقت ثاني
كلنا اذان صاغيه اظاهر عندج خبره ممتازه في هالمجال
واذا ما فيها كلافه تعرفين كيف اشتري الاسهم عن طريق الانترنت الله يوفقج وان شاالله يكتب لج عن كل حرف خطيتيه 5000000 حسنه والله لا يحرمج ويوفقج في كل شي قولي آآآآآآآآآآمين


الساعة الآن 08:19 .