كل عام و انتو بخير.. تعالوا استفيدوا من طريقة عنايتي في بشرتي

قوة خواتي ..

رمضان كريم و كل عام و انتو بالف خير يااا رب

حبيت بمناسبة هالشهر اني اهديكم هدية بسيطة و هي طريقة عنايتي ببشرتي

و اتمنى اني افيدكم و ما ابي منكم الا الدعوات الطيبة..

طبعا معظم خلطاتي ماخذتها من المنتدى و مغيرة فيها شوي على حسب حاجتي .. و الخلطات هذي تفيد في توحيد لون البشرة.. و تفتيح الاماكن الداكنة مثل المنطقة الحساسة و الركب و الاكواع.. و الاهم انها تشد البشرة و تعطيها نضارة و لمعة رائعة..

و هالخلطات هي محصلة تجربة شخصية امتدت لست اشهر بالضبط... و النتيجة توحيد لون جسمي بنسبة 100%.. مستحيل تلقون عندي منطقة اغمق من منطقة.. و تفتيح المناطق الغامقة بنسبة 90% .. باقي حبة شويتين و يختفي السمار تماما باذن الله ...

لوني يا بنات.. حنطي مايل للابيض... مع الخلطات لوني صار ابيض نقي.. بس انا ابي افتح اكثر ..:) طمااعة

الخلطة الاولى يا بنات هي خلطة الاخت المهاااا بلا مناااازع.. خلطة رائعة بكل معنى الكلمة... و الخلطة الاصلية عبارة عن الاتي...

ملعقة كبيرة من كل من : ماي ورد + فازلين + فكس + نشا + زيت زيتون + كريم جليوسليد + 6 ليمونات خضر صغار

بس انا للامانة غيرت كثير في الخلطة .. لاني قللت كمية الفكس للربع لان بشرتي حساسة.. و غير زيت الزيتون لزين جنين القمح.. و استخدمت بدل الجليوسليد جلسرين سائل و اضفت كريم فازلين بزبدة الكاكاو عشان اثقل الخلطة و ااكتفيت بليمونة و نص من الليمون الاصفر الكبير.. و اضفت كمية قليلة من الاكسجين السائل السمتخدم لتعقيم لجروح..

هالخلطة تنعم الجسم و توحد لونه و مع الاستمرار تعطي تفتيح رائع للبشرة..

طبعا تحطين الخلطة كل ليلة قبل النوم.. و تنامين فيها للصباح... و تسبحين و تستخدمين الخلطة الثانية و طبعا هي عبارة عن مقشر..

هالمقشر للاخت عذاري من منتدى عروس.. و هو عبارة عن سائل الاستحمام من بيبي جونسون البنفسجي + كوبين شاي صغار رز مطحون + ملعقة جلسرين + اي زيت عطري

في هالخلطة انا استغنيتعن الزيت العطري لانه للتعطير فقط و خفت على بشرتي لا تتحس منه.. و زيدت كمية الجلسرين لخمس ملاعق كبيرة...

طريقته انج تبللين جسمج بشوية ماي و تاخذين منه كمية و تفركين جسمج فيها بشكل خفيف و تركزين على الاماكن الغامقة..و ما تحتاجين تستخدمين قبله او بعده اي صابون او غسول او مقشر لان هو كافي..

تطلعين من الحمام و تنشفين جسمج و تستخدمين الخلطة الثالثة و هي خلطة للاخت حور الجنان.. و هي عبارة عن مغلي قشور البرتقال و الليمون + كمية من ماي الورد << ما اتذكر الخلطة عدل بس اظن هي هذي مكوناتها الرئيسية..

عاد انا اضفت لها كمية قليلة من سائل الاكسجين المستخدم لتعقيم الجروح.. و تحطين الخلطة في علبة رشاش و من طلعين من الحمام و تنشفين جسمج.. ترشين منها على كل الجسم و تنتظرين ثواني على ما تنشف..

عقب تستخدمين الخلطة المرطبة... و هي نفس خلطة الاخت المهااا بالضبط لكن استغنيت فيها عن النشا و قللت كمية الفكس لاقل من الربع عشان الريحة ...

و للعلم بنات انا استخدمت خلطة لمدة شهر تقريبا لتفتيح الاماكن الغامقة عندي.. و كانت عبارة عن ليمون مع زيت زيتون شوية من زيت جنين القمح.. بصراحة رائعة و نتيجتها فورية... بس للاسف ما استمريت عليها.. لكنج تحسين الفرق من اول استخدام.. و ناوية ارجع لها لان الاماكن الغامقة عندي متفتحة كثييررر و يبي لي حبة شويتين و تصير مع لون الجسم.. و هالخلطة نتيجتها سريعة...

هم في فترة من الفترات كان عندي تكسر في الاظافر و سمار في مفاصل اليد.. استخدمت خلطة خذيتها من تامنتدى ما اتذكر حق منو من الخوات.. و هي عبارة عن خل + ماي ورد + ليمون + عسل..وتدهنين منها على يدج كل ليلة قبل النوم.. بصراحة يا بنات استخدمتها لفترة بسيطة... اقل من شهر بس يدي و اظافري كانوا ووووووين و الحين وين... لون موحد و اظافر الحمدلله قوية و شكلها حلو... ما شاء الله لا قوة الا بالله..

هذي كل خلطاتي الدائمة و اللي استخدمتهم لمدة قصير و اللي حصلت منهم فايدة بشكل كبيررررررر..

حبيت افيدكم و اتمنى انه الكل يستفيد...

و اي سؤال انا حاضرة..