والله ان موضوعك جا في وقته لاني اكثر انسانه بالدنيا وضعها ملخبط ولا اعرف شي اسمه توفير
انا معك خطوه بخطوه
اقتباس مشاركة  (سندريللا 2000)
انا زوجي قال لي ابسلمك المصروف وانتي تصرفين لكني رفضت لاني عارفة نفسي ما اقدر اسيطر على نفسي من ناحية الصرف

ايضا ما اقدر ارفض لعيالي طلب ..

حاولت اني اتعدل لكن من غير فايدة واتوقع ان السبب اني ماعندي مبادئ في الصرف ..

الله يرضى عليكم كيف اعرف ان اللي اشتريه كمالي ولا ضروري ؟؟؟ والله ماني عارفة..


مثلا بعض الاحيان اتنازل عن شراء بعض الملابس على اساس عندي ملابس وماعندي مانع من تكرارها ..

طيب متى اعرف انه يلزمني اشتري لي ملابس جديدة سواء لي او لابنائي ؟؟

هل اذا اعجبني اشتري ولا فيه قاعدة امشي عليها ؟؟ مثلا تحديد عدد معين من اللبس ؟؟

والترفيه كيف بيكون ؟؟ لان اهلي وصديقاتي يحبون يطلعون استراحات كثييير .. وبعض الاحيان اروح مجاملة وبعض الاحيان يكون انا نفسي بالطلعة

وبعض الاحيان اروح تحت ضغط الابناء وطبعا اذا رحت لابد من قطة ماتقل عن مئة ريال اجار الاستراحة والعشاء واذا فيه مناسبات حفلات النجاح بتكون القطة اكبر ..

طيب فيه حاجة ثانية زوجي يعطيني مصروف للملابس وفسحة الابناء وقت المدارس .. بعض الاحيان اصرف منه على حاجيات لابد منها مثل شراء حليب للرضيع او دفع كشفية الطبيب

او شراء خبز ولبن او حتى طلبية عشاء من المطعم .. ولاني استصغر المبلغ فما اطلب من زوجي يعوضني فما يمر اسبوعين على استلامي للمصروف الا وهو مخلص

لاتضحكون علي والله هذا اللي قاعد يصير معي ...

فانا افكر لو يوجد مبادئ او قاعدة امشي عليها في الصرف كان ارتحت كثير
حبيبتي لابد من التدبير وبخصوص الملابس لاتشترين إلا إذا فيه مناسبة ومش كل مناسبة كرري بعض الملابس بتغيير تنسيقها السابق يعني البسي التنورة مع بلوزة ثانية أو العكس غيري الإكسسوار أو ركبي معاها إيشارب مناسب بطريقة تغير في شكلها السابق والبنات بدلي بينهم وغيري في التنسيق بعدين الإستراحات تعدم الملابس يعني لاتشتريلهم شي غالي
خاصة الأطفال ومو ضروري دايم تروحين استراحة خلوها مرة في الشهر وخلو جمعتكم بسيطة من غير تكلف
صدقيني لو قررنا ندبر نقدر رغمة متعب أما التبذير فهو سهل جداً يبذر الواحد توكلي على الله وخططي والله يخلي الورقة والقلم كل شي في الورقة عشان تعرفين المصاريف والضروريات وبالنسبة للضروريات هي الأشياء اللي ما نستغنى عنها مثل الأكل والشرب بس بدون تبذير أما الكماليات مثل الأشيا إللي يمكنك الإستغناء عنها مثل اكسسوارات في البيت وغيره أشياء كثير أقدر أستغنى عنها أوأجلها للشهر الجاي والله يعين الجميع
اللهم لك الحمد حتى ترضى ولك الحمد إذا رضيت ولك الحمد بعد الرضى
يا الله يا بنات كل وحده تقول تجربتها مع التوفير وتذكر مصاريفها ووش كثر ممكن انها توفر او اقل شي تغطي وضعها وتكمل كل طلابتها بدون ما ينقص شي او تاجل شي للشهر الجاي نبي نستفيد من تجارب بعض

انا اليوم جلست مع زوجي بغينا نتهاوش بس قلت له مو كل ش يجي بالهواش خلنا نتناقش

طبعا كلمته عن مصاريفنا واننا محتاجين وان الوضع مو مريجني انا وعيالي

وهذ انا باسوي خطه وان شالله باقول لكم على النتجيه بس ان شالله يوافق على خطتي الخمسيه هههههههههههه وش اسوي لازم نخطط بس عسي يعطونا وجه
سبحان الله والحمد لله ولا اله الا الله
السلام عليكم

انا كتبت تجربتي قبل فترة مع تقسيم الراتب والتوفير في هذا الموضوع
http://forum.hawaaworld.com/showthread.php?t=1162761

طريقة لتقسيم الراتب...

ونجحت هالطريقة معاي بس طبعا تختلف عندي باختلاف الراتب عن التقسيم الموجود بالموضوع...

ومشيت بعد في التوفير على عدة بنود...

1- ما اشتري من المواد الغذائية الا نما احتاجه بعد ماكنت اشتري في بداية الشهر من كل شي حتى لو ما احتاجه مثل مقادير حلى شوكولاتات مقادير اكلات ممكن ما اعملها الا اذا جاني ضيوف وممكن ينتهي الشهر ما استخدمتها...وغير من انواع المواد الغذائية من الغالي للأرخص بس يكون نوعية جيدة ..
لكن الأشياء اللي ما تقدري تستغني عنها مثل البامبرز وحليب الأطفال والمواد الغذائية الازمة للطفل طبعا ما تركتها..بس على قدر الحااااااااااجة ...

2- بالنسبة للملابس....اشتري في الأعياد وموسم الصيف وموسم الشتاء...
الأطفال ما اشتري لهم الغالي لأنهم يكبرو ويتركوه وهو ما لبس الا كذا مرة حرام تحطي فيه ذيك القيمة وفي النهاية ما تستفيدي منه ولا تقولي للطفل اللي بعده انا جاني ولد بعدين بنت مو معقولة باحتفظ بملابسهم لحد ما يجي الثالث والرابع ازمة...وعندك سيتي ماكس والهرم ملابس الأطفال عندهم روووووووووعه وسعر معقوووووول...
وبرضة قبل ما انزل السوق لشراء الملابس اتفحص كل واحد ايش ناقصة واسجلها في ورقة مثلا بنتي تحتاج 2 طقم داخلي 2 هيلاهوب ابيض مثلا جزمة باللون ...وكما سجلت في الورقة لا ازيد عنها
ونفس الطريقة للولد ولي انا مثلا ناقصني كحل وماسكار وبودرة وسجلتها ورحت لقيت روج عجبني ما اشتريه لأنه مو مسجل بالورقة...هذي طريقتي ممكن تقولي تعقييييييد لكن وفرت لي الكثير بعد ما كنت مبذرة انزل السوق بلا هدى.,...

3- وبالنسبة للفواتير حطيت حد ائتماني 200 وزوجي 300 والكهرباء 200 كل شهر طبعا اذا جاء الراتب وفاتورتي جات مثلا فوق 200 اسددها 200 فقط والباقي مع الفاتورة القادمة واحاول اقتصد في المكالمات....وهكذ ا

4 - خليت لكل اسبوع ظرف فيه 300 ريال للمواذ الغذائية لو انتهى الاسبوع ولسا باقي في الظرف مبلغ كان قليل او كثير اكافأ نفس بعشاء او قهوة مع دونات من كافي او اي شي يسر الخاطر حتى يكون لك الهمة الاسبوع الجاي توفرين في مصرووووف الغذائية......

وللمعلومية اطفالي ما احرمهم من شي ابدا لكن بعد مو كل يوم وهم بالمولات يلعبون ويشترون من هالمأكولات الا ما جابت لنا الا المرض........ومو كل يوم اشتري لهم لعبة يعني في الشهر مرة.....

آسفة للإطالة لكن حبيت اشارك في الموضوع وفكرة خيمة المستعمل رووووووعه ياليت تنفذ ونراها على الواقع....
مندوبة المدينة النبوية لقهوة أم الفاتح للرطوبه والسدد والاحتباس والهوا والعديد من التجارب الناجحه
للتواصل الإتصال أو الرسايل الواتس على الرقم 0530578089
مرحبااا يالغاليات

اعتذر عن التاخير لكن اشغااال ربي يسهل علي وعليكم يارب

والا والله ما نسيتكم وادخل اقرا التفاعل واطلع

عملت اقتباس لبعض ردودي عشان اتذكر ايشكنت بتكلم وذكروني انتم ان كان في خاطركم شي نتناقش فيه

اقتبست ايضا ردود لبعض البنات راح نتكلم عنها

جميع الردود قريتها مرتين وثلاث ولا اهملت ولا رد ولا مشكله بس راح نطرحها بشكل عام وباذن الله راح نطلع بنتايج حلوه ...

كثير بنات شاركونا بتجاربهم وبصراحه كانت اكثر من رائعه
وفيه بعض الاخوات اعطووو عبارات انا اسميها (( درر)) علمت لها اقتباس

ونبدء بسم الله الرحمن الرحيم

اقتباس مشاركة  (نيــــــــــراز)
الرد القادم راح اتكلم عن يوم الخميس بالتحديد وعن المدرسه ومصروف المدرسه وبقولكم وش صار مع ولدي عشان المصروف ....

والرد اللي بعده باذن الله راح اقولكم اذا نزلت المول فليش انزل وايش الاولاد تبرمجوو عليه .....
اقتباس مشاركة  (نيــــــــــراز)
انا بدئت الان بالحديث عن تغير نمط الحياه بشكل عام وراح نتكلم بعدين عن تغير نمط قائمة المشتروات بس حطو في بالكم ماراح اقولكم بدلي الشركه هذي لانها غاليه بالشركه هذي لانها رخيصه انا ضد هالنقطه تماما بالعكس اشتري الزين حتى لو كان غالي والاكل حتى لو كان غالي بس اعرفي الكميه اللي تحتاجيها وراح نفرد لها رد كامل ...

وخلك بين الناس بكل رقي من ماكولات ونوعيات جيده الى ملابس راقيه مهي مبهذله وتعليم راقي وترفيه راقي وتوفير ايضا رائع

ونراكم على خير
للتذكير فقط عشان ارجع للنقاط


اقتباس مشاركة  (ام فهد وخالد)
طولت عليكم ولاكن فعلا لابد من وقفة حازمة مع العائلة كلها مش مع النفس وبس
قلتيها وجبتيها صح وقفه حازمه مع كافة العائله وليس مع النفس

لان الراتب يمس العائله باكملها وكل فرد له دخل فيه فلازم كل فرد من افراد العائله يحس باهتمام العائله بتوفير الحياه الكريمه الغير مبتذله ...
اقتباس مشاركة  (raianh2007)
التبذير صار عاده حتى الخدم صاروا مثلنا يبذرون ولا يهتمون بباقي الاكل مع انهم جااايين من دول فقيرة بس مثل ما يقول المثل من عاشر القوم
يووووووه والله يطلعت قرون ابليس في راسي يوم جات خادمة قريبه لنا في بيتي وتروح ترمي الخبز مثل ماهوو القرص بكبره .... طاااار عقلي انااا قلت ليه كذا مو حرام عليك قالت يا مدام هذا مو داخل كيس وتقولها وهي واثقه كنها تقول خير يا طير ورميته وش الجديد ليه ليه ليه ليه ليه كذا ليه يتعلمون التبذير ليه يحسون ان نحن شعب ما نقدر النعمه اللي الله اكرمنا فيها ليه ؟؟؟ ابي افهم انا زين اللي مسكت نفسي والا بغيت ارجف دماغها على طريقة ردها وكانها هي اللي جالسه تصرف علي لعنبووو ابليس لا يكون عند بيت كل واحد صراف خاص فيه يسحب متى ما اشتهى مدري علموني اذا نحن كذا والعالم شايفتها كذا قولولي اخاف انهم نسيوو تبيتي يحطون قدامه صرافه خاصه فيني والفلوس حلالي اللي فيها ..
لازم نعلمهم الاهتمام في الاكل وبااقي الاكل والخبز حتى الخبز فيه ناس تقولك ما اكل الا حق اليوم اذا بات ما اكله آمنا بالله خليك على مودك بس انتي يا صاحبة البيت خليك مدبره خي الخبز وقطعيه مربعات وحطيه بالفريزر واقليه وقت ما تبين تسوين فتوش والا فته قطعتي حواف الخبر التوست حطيها بالفرن شوي الين تنشف واطحنيه بمولينكس وحطيه بالفريزر بقسماط للمقليات او قطعيه مكعبات واحمسيه بالزبده والاعشاب الايطاليه وخليه للسلطه السيزر صح او انا غلطان لا ترمين شي عودو الشغاله لا ترمي شي كل شي له فاااائده يا جماعة الخير كل باااقي له استخدااام ولنا في مصانع الدول الاجنبيه عبرررره بدل ما نشتري بواقيهم بذاك القيمه من السيفوي وغيرها نسويها في البيت ايش اللي يمنع ...

اقتباس مشاركة  (عروبه ام مجد)
وانا اقترح انه كل ام عندها اطفال من عمر يوم لحتى اي عمر تفتح له حساب بالبنك يكون بولايه احد الابوين وتوفر به لو 100ريال كل شهر وتاكدوا هدا المبلغ رح يلاقونه ويساعدهم بحياتهم وبدراستهم ****لله
والله يوفق الجميع ويعينا على فعل الخير
برااافووو عليك

افتحي حساب لعيالك ولو يكون باسم الام افضل لان النظام وانا اسميه النظام السفيه عندنا لو فتح حساب الطفل تحت اسم ابوه الام ما تقدر تتصرف فيه ابد رغم اني اشوف ان الام هي الاحرص على مصلحة عيالها بس نظام سفيه عشان كذا انتي يالام افتحي حساب لعيالك باسمك خلي كل واحد له حساب في بنك ماشاء الله المملكه فيها اكثر من كم بنك متجهزين لسرقه الناااس انتي افتحي حساب باسمك وقولي لولدك او بنتك ترا انا فتحتلك حساب في البنك وخليته باسمي عشان ما تلعبي فيه او احد يضحك عليك من اصحابك ووفري فيه فلوسك اللي من مصروفك والا من العيديات اللي تجيك وقت الاعياد او اذا كانت بنوته وتعمل اكسسوار وتبيع على صاحباتها تجمع الملغ وتعطيكي هواا توديعه لها والله يلاقوو خير وانتي يا الام حددي لهم مبلغ في السنه مستقطع حطيه لهم على الحساب ان شاء الله لو 300 بالسنه مش بالشهر لا بالسنه حتلاقي خير
بنتي عامل لها ابوها حساب وكل ما جاها شي بابا حطو بحسابي اذا وفرت مصروفها حطته اذا جاها عيديه حطته لها تقريبا ثلاث سنوات من فتحنا لها الحساب قبل شهر اخذت بطاقة الصراف حقتها اشوف حسابها تتوقعوو كم لقيت على انها لسى خامس ابتدائي والله يا بنات 13 الف ريال ماشاء الله لا قوة الا بالله وفعلا لقيت انووو حتى هي طلعت مدبره وكل طلباتها مجابه واذا فيه شي مو حابين نجيبه لهااا تقول خلاص انا بسحب من فلوسي واشتريه او اذا شافت شي عند عيال عمتها فتقول بابا اسحب من حسابي كذا واعطيه عمتي عشان تشتري الحاجه الفلانيه اعجبتني .. والحمدلله يارب
وصارت حتى تنبه اخوها طبعا ولدي وسالفة المصروف اللي باول نقطه قلت لكم راح اقولها

يموت بشي اسمه سيارة رنجروفر او أودي طبعا كلكم عارفين السيارتين فااارههه وغاليه جدا فعلا ودينا الولد للمعارض وشافها وركبها وانبسط عليها وخلاص يابابا راح تشتريها لنا قال لا انا ما اعجبتني بس اذا اعجبتك تقدر تشتريها جمع فلوسك ومصروفك واذا كبرت راح يصير معاك فلوس كثير تشتريها طبعا ولدي عمره 5 سنوات انا مدخلته مدرسه ومصروفه ريالين فاني يقول لا يا ماما ابي كذا وياشر بيده يعني 3 ريال قلت ليه خلاص 2 يكفي قال لا ابي 3 قلت اوكي صراحه قلت يمكن اصحابه يكايدونه في المدرسه ان مصروفهم اكثر فقلت مهي مشكله خلنا نشوف يش السبب واناقش الموضوع مع معلمته جلست اسبوع الاقي ريال زايد في جيبه يعني فعلا 2 مكفيته بس ليش الريال الثالث على كذا ماراح اعطيه قلت خلاص يابابا راح ارجع مصروف ريالين الثالث شوفو جالس ما تستفيد منه قال لا يا ماما هذا عشان ارفعه اذا كبرت اشتري الرنجروفر ... صراحه ما تخيلت انه طفل صغير ممكن يتاثر بالكلام ويفكر كيف ممكن يجمع فلوسه وفعلا صرت اخليه 3 ريال وخليت له حصاله واعياده كلها يجمعها لا وابشركم صاير يعزمنا على عشاء هههههههه اذا مالنا خاطر بالطلعه فيقول مين يبغى يعزمنا اليوم نقول مافيه احد قال خلاص انا اعزمكم اليوم وبكذا يعرف انه فلوسه حتنقص وحيتاثر التخطيط اللي في باله ويفكر كيف ممكن يعوض خسارته ...

اقتباس مشاركة  (طيرة شلوى العز)
انا اشهد ان الجمعيات بنت ففففففففففففففف فففففففلللللللل للللللللللللللل لللللل وعمارات
فعلا بنت فلل وعماير اعرف لك وحده تقول بدل ما اشتري سياره لولدي بالتقسيط دخلت جمعيه بــ 5 الاف ريال وطبعا هي راتبها كان فوق 12 الف ريال تقول واستلمت فوق 100 الف ريال واشتريت لولدي سياره من غير اقساط وخرابيط وفعلا الجمعياااات لها مميزات راح اذكرها في تعليق اخر


اقتباس مشاركة  (dalia.dream)
أختي ما أحد عارف ظروفك زيك إنتي و زوجك ، اجلسي أنتي و زوجك وجيبو أوراق وقلم و رتبو أوضاعكم المادية
برااافو عليك .. مافي احد يرتب وضعك غيرك انتي وزوجك لانك انتي الوحيده اللي تعرفين ايش محتاجه وكم محتاجه وايش وضع بيئتكم اللي انتوو فيها وهذي احدى الدرر


اقتباس مشاركة  (ألماسة براقة)
مرحبا حبايبي وأشكر كل من علق على رايي وأعطاني فكرة جديدة
أعتقد إن أول خطوة في ترتيب حياتك المادية إنك تستشعري نعمة الله عليك بهالمال اللي رزقك الله
الامر الثاني إنك مسؤولة تمام المسؤولية عن مالك بصفة عامة سواء كان راتب أو ورث
الأمر الثالث إذا مابدأت بداية جدية مع نفسك مافي أحد يجي وياخذ بيدك ويقول تعالي أدلك أقصد إذا مافيه قناعة إنك تغيرين طريقة صرفك مستحيل أحد بيقولك تعالي أدلك شتسوين بأموالك إلا إذا كان له مصلحة في ذلكـ ـ طبعا أقصد الأقارب
الحقيقة المرة إن الدنيا مابتمشي على كيفنا على طول لأبد من أن تتغير الظروف ونقول ياليت سوينا وسوينا
معليش قمت أهذي لكن هذي كلمات لاتحسبونها فلسفة كل حرف يساوي تجربة مرة عشان كذا نبي آلية لترتيب الراتب والمشروع وأنا تراني متحمسة بسرعة ياحبايب
اقف احترام لهذه الخلاص الرائعه والنقاط الوافيه ..


اقتباس مشاركة  (العطاوية)
ترانا متحمسين يالغالية عطينا المشروع ولاتراني بخترع مشروع من راسي لأني من يوم ماقريت الموضوع وأنا جالسة انتقد نفسي على التبذير
هاتي الاختراع ...
تعرفي فيه مقوله تقول الحاجه ام الاختراع
اعجبتني فيك الصراحه من قريت الموضوع وانا جالسه انتقد لنفسي فعلا هذا اللي نبيه انتقدي نفسك راح تطلعي بسلبيات كثيره ابدئي صححيها ما اقولك دفعه وحده بعدين تملين وكمان تحطين العين عليك لكن خطوه بخطوه حتوصلي صدقيني ...
فيه اشياء كثيره نتعامل فيها بالدين بس للاسف ما نجملها ايضا بحياتنا

حاسب نفسك قبل ما يحاسبك رب العباد ....

وانا اقول خلونا نحاسب انفسنا على التبذير قبل ما نحاسب انفسنا واحنا في عز معمعة الحاجه ... وقت ما ينفع الحساب مثل قصص كثير من الاخوات في الموضوع فرج الله لهم كربهم وبارك الله لهم في مالهم وهداهم للطريق الصحيح الخالي من التبذير

اقتباس مشاركة  (عبق الأقحوان)
حبيت أقول لو كل وحده حطت لها هدف كبير وخططت توصل له باللي تقدر عليه من مهاراتها وبعد تخطيطها راح توصل له وهي في أتم فرحه بإنجازها الكبير
ليكون همنا الأكبر في هالدنيا العيش للآخره ونرضى بما قسمه الله لنا من الرزق ولا نشوف اللي فوقنا فالقناعه كنز لايفنى ودمتم
رااائع جدا جدا جدا

الاهداف .... ما اقولك حطي هدف صغير وابني عليه لا

حطي هدفك كبير واشتغلي عليه لا تقولين القناعة كنز لا يفنى انا مع القناااعه لكن في امور معينه ولكن اضرب بقناع القناعه عرض الحائط في تحقيق الاهداف والسعي ورائها

واقول من قال القناعة كنز لا يفنى فهذا شخص غني ثري اناني يريد ابقاء الفقير على حاله حتى لا يشاطره الهبره او الحياه فدعوو عنكم القناعه في السعي وراء الرزق والعلم والكفاح ودعو القناعه برواز لما اصبح بين ايدكم ...

بتقولون وش ذا التناقض اقولكم لا تناقض ولا شي

اللي معاك وفي بيتك خليك قنوعه فيه واحمدي الله واشكريه لكن ابحثي عن المزيد ان حصلت الزياده فالحمدلله خير وبركه وان لم تحصل فالحمدلله انتي قنوعه بما قسمه الله لك من رزق ...

*** المال يفقد قيمته الحقيقه مع مرور الزمن ***

يعني لا تقولين عندي الف ريال هذي ثروه ترا هي فعلا ثروه قبل 30 سنه والان اصبحت لا شيء ولو جلستي مقفله عليها راح تلاقي بكره اللي بريال اصبح بالف وبكذا ماعاد للالف قيمه فاشتغلي عليها حتلاقي انها اصبحت ثروه لك في المستقبل اللي ابيكم تعرفونه هي القاعده الاساسيه للمال

*** المال يفقد قيمته الحقيقه مع مرور الزمن ***


اقتباس مشاركة  (نوت11)
والله يالعبير الهادي ان كل ما صارت المبالغ كثيره في الحقيبه كل ما صارت الطلبات اكثر سبحان الله تتفتح عليك اشياء ما كنتي تبينها قبل يكون عندك المبلغ
لان من الاساس تربينا على اذا كان عندك اصرف قبل لا يطيرالمبلغ ههههههههههههههه
يعني اذا صرفتيه ما طار
عجبي !!!

تفكير ما ادري من زرعه فينا

ههههههه

هذا لا تفكير ولا شي هذي هي القاعدة الاقتصاديه العلاقه طرديه بين المال المكتسب واحتياجات الفرد لكن الذكي هو اللي يزيد من النسبه المقتطعه من الراتب و الزياده وجعلها في صندوق الادخار فلا تزعلي هذي قاعده في علم الاقتصاد

اقتباس مشاركة  (بدريه هانم)
السلام عليكم بنات اعججججججججبني موضوعكم مررررره
وبقولك عن نفسي غيرمتزوجه وغير موضفه
ومصروفي اخذه من اهلي شهريا 100 او 200 << لا تضحكووون علي
ورغم انه مبلغ قليل جدا الا ان بعد موضوعكم راح احاول التدبير فيه << ياحليلك تحزنين
لي عوووووووووووووو ووده
ما راح نضحك كنت اخذ انا مصروفي في صغري 100 وكنت اوفره تعرفي كيف
دخلت بجمعيه انا وبنات العيله على 100 ريال وكنت احصل على 800 ريال اشتري اللي ابي فيه وافر البااقي
فادخلي انتي بجمعيه مع بنات عيلتك والمبلغ اللي بيطلع اشتري فيه شغلات خاصه للبنات وبيعيها على بنات عيلتك ودبلي القطيه ايش قلتي فكره حلوه صح ..جربي راح تنفعك كثير
اقتباس مشاركة  (بين الأطلال)
دعواتكم الطيبه
يسعدك ربي على طرحك لتجربتك و طريقة توزيعك خلينا نستفيد وهالشي طيب بصراحه كل الشكر على تواصلك الفعال

اقتباس مشاركة  (نحلة طنانة)
اسمحولى اقول رائى في صراحه انا معكم من اول الموضوع المشروع فكرته حلوه لاكن من الزبين لا تنسون انى كن نتكلم عن تبذير يعنى اغلب الشعب السعودى شعب مبذر واسامحونى انى اقول الغالبيه فيه التعالى شويتين اجل من اللى يبى يشترى حتى لو الواحد محتاج متوصل الامور انه يشترى ملابس مستخدمه بعنى ممكن اثاث ممكن موعين لاكن ملابس احسها صعبه حتى من الناحه الصحيه ادرى كلامى مو مرتب بس هذا اللى طلع معى
يا حبيلك يا نحله طنانه فعلا نحكي عن التبذير والمشروع يحكي عن تصريف هالتبذير بس فيه ردود لي كنت اقولك الطرف الاخر من المدينه لا يجدون ما يسدون بيه جوعهم فهل تتوقعين ان الملابس متوفره
لو اقولك انه فيه اسره شافتهم خالتي رجعت للبيت حاشت عيالها حوووش وانواع الخصااام فيهم تقول دقيت الباب على حسب وصف وحده من الصديقات ان هالعائله تقبل بقايا الطعام للامانه خالتي ماتصدق انه فيه شعب جائع بالسعوديه راحت بس عشان تكذب الكلام بعينها تقول شالت بقية الاكل وركبت السياره مع السواق راحت الا عماره قديمه نزلت ومعها السواق طبعا للحمايه دقت الباب تقول تفاجئت لما فتحوو الباب قطعة حصير في وسط الصاله كم طفل جالس على الحصير وطفل عمره لم يتجاوز الثلاث سنوات يدور عاااري ما عليه الا اللي يستر عورته يدور حولين الحصير
تقول مافيه ثلاجه مافيه فرن مافيه فرش مافيه ملابس مافيه اكل مافيه شي تقول قلت ليش يبكي ليه تخلينه عاااري الدنيا برد طبعا وشتاء الرياض اكيد تعرفونه ما يرحم قالت الام يدور من الجوع يبكي وما عندي غير هاللبس له تقصد السروال الابيض الصغير هل فيه ناس تشتري نعم فيه ناس تشتري تودي للناس المحتاجه والناس المحتاجه ما فكرت بالصحه لانها تفكر اشلون توصل لاقل مستوى من مستوى الانسانيه انها تحس انها بشر واللي احنا غافلين عنه الاحساس بقيمة البشر في الجانب المظلم من المدينه

اقتباس مشاركة  (raianh2007)
وترى السيارات تاخذ تقريبيا مرة 1200 ومرة 1000 ومرة 3000 فقر والله
بغض النظر عن علاقتك بزوجك لكن3000 مصاريف على سياره عمرها ما صارت الا اذا السياره اصبحت تطلب مبالغ انا مع بيع السياره واتهنى بسياره جديده اوفر لي
النقطه الثانيه والاهم يا مأمنه للرجال يا مأمنه للميه في الغربال

لا تنزهين الزوج ابد والله يحفظه لك يارب لكن احرصي احرصي احرصي وترا اغلب البنات اللي شكوو وصحيوو كانت بسبب الشعره اللي قصمت ظهر البعير وهو الرجل لانه ما يحط لك مقدمات عشان ما تحسبين لليوم الاسود هو يجي يفاجئك كذا الا انتي طالعه على قولتهم من المولد بلا حمص لا لميتي قرشين لك ولا انتي اللي تقدري ترجعي له

ما ابي ادخل الشك فيك ولا ابي اغير عليك نظرتك بزوجك لكن ما احب االمرأه تكون معمي على عيونها وطيبتها تخليها تعيش في خيال واسع وحلوو شوي

خلي خيالك سيئ عشان تحسبين له حساب واذا اصدمتي بكره تقولين الحمدلله اني حاسبه لهاليوم حساب ...

على فكره مو شرط يكون الزوج فيه المشكله بس لا قدر الله صار لزوجك شي كيف راح تتصرفي فهمتي علي ..

اقتباس مشاركة  (ساروونا55)
معاكم حق بكل الي قلتوه ان الفلوس ما فيها بركه ابدا ...

بس انصح الأخت الي بتدخل جميعه والله شغله الجمعيه شغله وما راح تستفيدين ..

وكل شهر تقولين يالله خليني اصرف بقبض الجمعيه واذا حبيت تشترين شي تقولين لين اقبض الجمعيه

وتروح الجمعيه قبل ما تمسكينها بيدك ... اسألي مجرب ..

وانا احس اني ما ني قادره اوفر يعني مو مجنني الا شي واحد اذا نزل الراتب اربع الاف نعيش على قدهم

واذا نزل خمسه ما نقدر نوفر هالألف الزايده لا بالعكس نصرف ونقول ما كفو مع ان عشنا الشهر الي قبل باربعه بس

.. من يحل هالمعادله ؟؟؟؟؟؟؟؟
يا حبيلك شكلك متعقده مع الجمعيه .. الخطاء مش بالجمعيه الخطاء من فكرتك في الجمعيه

الجمعيه لها اهداف اول هدف لها اما لتسديد دين لقروض وتتخلصي منها دفعه وحده واحرصي تكون الجمعيه تعطيكي المبلغ كاااامل يعني توفي الدين بشكل كامل

الجمعيه هدفها انك توفرين في حساب بعيد عن عينك ويدك للتوفير
الجمعيه هدفها لباية مشروع تجاري تزيدي فيه دخلك لو ما معك راتب جامد وتبي تبدئي مشروع ادخلي جمعيه وخذيها اول الناس وابدئي مشروعك حتلاقي نفسك دخلتي المبلغ اللي تطلعينه واكثر منه كمان نصيحه وهذي من تجربتي الشخصيه ..

الجميعه طلعيها من قائمة مصاريف البيت والمتطلبااااات نهاااائي والا كانك يا ابو زيد ما غزيت صح او انا غلطانه

اقتباس مشاركة  (أم لطوووف)
بعدالتحيةوالسلا م احب ادخل معكم في الحملةوالله انكم اذارتبتوني بتكسبون اجري وتتصدقون علي وعلى عيالي المساكين وانااصرف الفلوس مااحس بها واحس انها ضروريات لكن اذاطفرت بديت اندم واكتشف اني صرفتها على اشياء تافهه
وعليكم السلام ورحمة الله وبركاته

قلتيها ياحلوووه مشكلتك انك ضيعتيها بالتوافه بقولك قاعده حطيها في بالك

اذا نزلتي للسوق وكنت محدده انتي وش تبين لو شفتي شي ثاني ونفسك فيه روحي وخليه لا توقفين قولي بشاور نفسي الين اخلص من السوق حتلاقين نفسك رحتي وتركتيه واذا له اهميه راح ترجعين له غصب

جدي كان يقول الله يرحمه ويعفوو عنه عن جميع اموات المسلمين اجمعين اللهم امين

كان يقول لاخوي اذا جيت تاكل من الصحن كل واذا شفت انك مديت يدك على الصحن عشان انت نفسك في اللقمه هذي احمد الله وقم بسرعه تراك منت بحاجتها وما تزيدك الا سمنه لانك اكلت كفايتك وفعلا احنا اذا جينا نقوم من السفره تلاقين نقول والله نفسي بس بهذي اللقمه يعني مو جوعانين لس بس نبي ناكل عن خاطرنا بتقولي وش دخل الاكل في اللبس بقولك هي قاعده لازم نجمع امور حياتنا عليها

اذا شفتي ان نفسك بالشي قولي بدور وروحي والا حتى اطلعي قولي برجع له بعد يومين اذا انتي بحاجتها بترجعين غصب تاخذينها واذا انتي مو بحاتها بتروحين وتخلينها صدقيني وتحمدين الله وقتها في البيت انك ما اخذتيها خذي هذي النصيحه من اختك

اقتباس مشاركة  (*المتأملة*)
موضوع راااائع ومتميز.. أتابع بجدية .. نتمنى الإستمرار وشد أكفنا بأكف بعض..ولاننسى إحتساب الأجر..
قال تعالى " ولا تجعل يدك مغلولة إلى عنقك ولا تبسطها كل البسط فتقعد ملوما محسورا"
أسأل الله لنا التوفيق..
قال تعالى " ولا تجعل يدك مغلولة إلى عنقك ولا تبسطها كل البسط فتقعد ملوما محسورا"

قاعده لو اتبعناها بكل امرو حياتنا لما وصلنا لما نحن عليه

لا تبخلي على نفسك ولا تسرفي على نفسك وخلي لقريب لك محتاج رزق من اللي الله رزقك هوااا
اقتباس مشاركة  (*الشيماء*)
السلام عليكم

انا كتبت تجربتي قبل فترة مع تقسيم الراتب والتوفير في هذا الموضوع
http://forum.hawaaworld.com/showthread.php?t=1162761

....
الشيماء جزاك الله خير على الدرر اللي كتبتيها الله يكتب لك اجرها يارب

فعلا نقاط وتقسيم راائع بارك الله لك مالك وحياتك ومعيشتك يارب


الحياه فوضى عندي
خلاص ستوب


الساعة الآن 02:47 .