اخر اخبار النشرة الاقتصادية عندي مايلي :

... استهلكنا الميزانية قبل العيد بيومين فقط باقي معانا .. 700 ريال وش رايكم بتكفي لاخر الشهر ولا لا ؟؟؟

ما ادري وش اللي صار نزلت للسوق كم مرة لملابس الشتا.. اشتريت للبنات الصغار فقط وبنتي الكبيرة شريت لها للعيد بلوزتين اب70 ريال فقط ..

التحليل الاقتصادي
الاول عزيمة ابو الشباب اللي قلت لكم عليها كلفت الف ريال بملحقاتها شرى ذبيحة وطبختها وما بقى شيء لي يعني ما استفدت ابدا الا الطبخ والنفخ والمدح فقط اما عائدات واستثمارات مالية من العزيمة ما استفدت .

الثاني .. الاضحية اشتريناها بالف ريال فقط لانها صغيرة جدا والحمدلله ذبحنا بالبيت وقلقلنا اللحم وشوينا الكبدة وانبسطنا مرة ولله الحمد
الثالث .. اخوي الحبيب رزق بمولودة قمر فكان لابد من اداء الواجب وتقديم هدية بقيمة الف ريال موزعة كالتالي ..
250 شريت فيها هدية للبيبي
250 شوكولاته
500 هدية يابسة .

الان زوجي على الحديدة .. وانا كالعادة بديت اسحب من مدخراتي الخاصة ...

الله يعين مع بداية محرم ستزيد الرواتب ان شاء الله اتوقع 15 بالمية

وفيه خبر غير سار سمعت عنه مادري عن صحته من كذبه يقولون اسعار البنزين بتزيد ؟؟؟

الله يستر شكل المواطنين مستهدفين لشفط مافي جيوبهم يعني هالزيادة استخسروها علينا وقالوا نسترجعها برفع البنزين يارب الطف بنا وارفع عنا الغلا .
وما توفيقي إلا بالله
ياهلا وغلا بسندريلا الله يعوضكم خير
الحمد الله ان الفلوس ضاعت في تادية واجب مو خرابيط هذا الشيء يخفف من الحسره
انا الا الان ماتقضيت للبيت لان باقي من الشهر اللي فات واللحم حق العيد بس باقي خضره وفاكهه واحنا ايام العيد مانجلس في البيت
بس الفواتير قصت ظهورنا فاتوره الثابت 585 لانها ست شهور ماسددت وفاتوره خالتي للجوال 700 ريال يعني قضي على بند الاتصالات مع سلف ب300
الكهرب رافعته مصروفي قضي عليه عشان الجمعيه ولبس العيد لو ماشريت اصرف هذاني بين اربع جدران احش الذباب
اهلي اليوم مشوا لشرقيه وعماني راحوا لسدير وخالاتي في سدير زوجس يقول اوديك عند اهلي قلت لا والف لا لاني مره كنت اروح لهم يوم حماتي والده يوميا عشان اوسع صدورهم بعد فتره سافر اهلي قعدوا يقولون لو اهلك ماسافروا كان ماشفناك ماحطوها على نيتي الزينه مع ان كان بمكاني اروح لي مكان بس عاد بعض العقليات وزوجي سافر اليوم الله يرجعه بالسلامه

بربرت واجد من الحره اللي فيني
الاياسندريلا الزياده 5% بس يعني كل 1000 فيها 50
بس فيه العلاوه السنويه للرسمين وهي حلوه للي مرتبته مرتفعه
اتوقع ان البنزين ارتفاعه اشاعه

اللهم ارزقني الوظيفه عاجلا غير اجل واشفي بنتي واجعل مابيها كأن لم يكن وارحم ابي واجمعنا به في جنانك

هلا بالحلوة
احسنتي برفضك الذهاب فعلا بعض الناس يفهمون العمل الطيب انه لازم وراه مصلحة
لكن لابد من اداء الواجب والمعايدة واللمة معهم وقت الاجتماع واذا شفتيهم خليهم يفهمون ان اهلك مسافرين
الا ورا ماتسيرين علي انا اهلي مسافرين وماعندنا احد طفشانين مرة

الشئ الثاني زيادة البنزين الله يستر ان شاء الله انها اشاعة وبس .

بالنسبة للزيادة هي 15 % مو 5 %
يعني اللي راتبه عشرة الاف مثلا بيزيد الف ونص

يعني كل الف فيها مية وخمسين ريال

ايه نسيت اكمل لكم السالفة عادة اروح بايام العيد للبراجون ودخوليتهم 25 ريال وانا وبزراني نستهلك تقريبا 150 ريال

هالمرة اقترحت اختي نروح مركز غرناطة ورحنا شحنت للاطفال ب60 ريال وكفتهم والحمدلله وعندهم عروض حلوة على الشحن بس ماحطيت بالي زين لاننا رحنا متاخرين والناس زحمة وازعاج ماصدفت انهم خلصوا لعب وبعدين تعشينا عشا خفيف يمكن بحوالي ب 50 او ستين وبس .. صارت تكاليفها افل من البراجون بكثير وبس ..
وما توفيقي إلا بالله
من اللي قال لك ان الزياده 15% انت قصدك بدل معيشه صح هي كل سنه 5% واللحين لنا 3سنين يعني هالسنه بتصير 5% بس اذا انا فاهمه غلط اشرحي لي

اللهم ارزقني الوظيفه عاجلا غير اجل واشفي بنتي واجعل مابيها كأن لم يكن وارحم ابي واجمعنا به في جنانك

وين ريانه وجالكسي مالح ومكاويه وسعوديه ذوق والاموره الحلوه وغادة والباقين من زمان مارديتوا
مغير انا وسندريلا ونيراز مسنترين هنيا

اللهم ارزقني الوظيفه عاجلا غير اجل واشفي بنتي واجعل مابيها كأن لم يكن وارحم ابي واجمعنا به في جنانك



الساعة الآن 11:53 .