Analysis Services
السلام عليكم يا بنات الحمله وكل وحده جديده دخلت على فكره لقيت مشروع الاخت ريانه موجود من 17 سنه بس بطريقه غير رسميه ؟؟؟ كيف انا عندي صديقه عايشه في جنوب جده في حي اسمه (كرنتينه ) قريب من الحراج ورحت عندها زياره وحكيت لها عن مشروع ريانه فضحكت علي وطلبت مني اني اجلس عندها لقريب الفجر انا رحت عندها الساعه تسعه بليل يوم الخميس فكلمت زوجي ولانها عزيزه وتمون فما كان هناك مانع من ابو الشباب والله العظيم يا بنات ان من الساعه وحده حصلت حركه غريبه في الحاره لين الساعه سته الفجر الا اسمع اصوات ناس كثيره وجت صحبتي وقالتلي قومي البسي عباتك وانا حوريكي انه المشروع ذى قايم له اكثر من 17 سنه وخرجت معاها لشارع والله يا بنات لقيت امم خارجه من بيوتهم يعني من الساعه وحده البياعين يجهزو بسطاتهم ويفرشو ا بضايعهم والبايعين اغلبهم حريم من النيجيريات يبيعو ملابس مستعمله واغراض مطبخ واغراض بيت وكل شي تبيه ولما سالت صحبتي ايش ذى قالت هما يروحوا لشمال ويدقوا الابواب ويقولوا ما عندكم ملابس او اي شي ما تبغوه وطبعا اكثر الناس يعطوهم ملابس او عفش مستغنين عنه وهما يجوا يبيعوه هنا يوم الجمعه واسعارهم رخيصه والله من الزحمه ما قدرت امشي تقولي جده كلها جت لغايه الساعه 12 الظهر وبعد كذى يضفو عفشهم ويرجعوا بيوتهم الفكره ان اغلبيه الحاره هذي من الفقرا فالكل بيشتري والله اني اشوف الفرحه في عيونهم يعني احنا نفرح بالتخفيضات الي في المولات وهما بيكونوا في قمه السعاده لانهم بيشتروا بريال وريالين ملابس احنا اشتريناه في يوم من الايام بالف او اكثر والي مش مصدقاني تروح الحاره يوم الجمعه بس قبل صلاه الفجر عشان تلحق مكان لسيارتهم واسمه سوق الجمعه وطبعا من غير اوراق رسميه واذا جت عليهم البلديه يسيبوا كل شي ويهربوا
30-01-1431 هـ, 07:19 مساءً
 
جزاك الله خير
30-01-1431 هـ, 08:03 مساءً
 
ننتظر جديدكم ؟وننتظر مشاريعك يانيراز
30-01-1431 هـ, 08:23 مساءً
 
أخاف ادخل الكرنتينه والهنداوية باليل فما بالك بالفجر أحس كلهم نيجريين وكلهم من مخالفي نظام الأقامة
30-01-1431 هـ, 09:29 مساءً
 
الله يعطيكم العافية جميعا

ماشاء الله كثروا الجدد الله يحييهم عشان تنتعش الحملة اكثر

نيراز ومكاوية تسلمون ياعسلات

وباقي البنات تراني مسافرة خميس جمعة صراحة التخفيضات في كل المحلات واشياء حلوة

واللي علموني للذال تسلمون لانو عاللاب مكتوب تحت الدال لاكن بعد ماضغطت اللي جنب الواحد مع ان مافيه الحرف طلع

يعني الله يعطيكم العافية

والله مااقدر اكتب الا اني اسلم عليكم جميعا

ام طلال التسديد في البقالة ممنوع لانهم احيانا يزيدون واحيانا الله يهدي الشباب يباشرون

من غير داعي على حساب اهاليهم اللي حارمين انفسهم

الله يعينكم
30-01-1431 هـ, 09:40 مساءً
 


الساعة الآن 05:25 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏