السلام عليكم
مبارك عليكم الشهر والله يجعلنا فيه من العتقاء من النار
هذا برنامجي الرمضاني والله الشاهد ما كتبته إلا من أجل تستفيد منه ولو وحدة منكم
فأنال الأجر من الله من غير أن ينقص من أجرها شي
أولاوقبل دخول رمضان أكون خلصت من ملابس العيد عشان ما أضطر أنزل السوق في هالشهر الفضيل
حتى الكتيبات والمنشورات اللي تتوزع على المصلين وخاصة النساء أكون مجهزتها قبل
بعد السحوريعني قبل الأذان بشوي لأنه من السنة تأخير السحور أقرأ أربع صفحات من القرآن الكريم ثم أصلي الفجرثم أذكار الصلاة
وبعدها أقرا أربع صفحات ثانية من القرأن وهكذا في كل الصلوات اقرا قبلها أربع صفحات وبعدها أربع صفحات
ولوكنا عازمين أحد على الفطور أأجلها إلى بعد منتصف الليل أهم شي إني ما أفوتها وبكذا أكون قريت باليوم الواحد جزئين
على نهاية رمضان أكون ختمت القرآن مرتين غير القراءة العادية مع العائلة كلها لأنا في رمضان كلنا نتنافس مين يختم أول حتى أولادي
كل واحد على حسب عمره يعني الصغير يقرى جزء عمَ كل يوم صفحة وهكذا
وبعد ما اخلص الصفحات الاربع اللي بعد الصلاة أبدأ بأذكار الصباح ولا أنسى أسبح الله 33واحمده33واقول الله اكبر33
حتى يمدني الله بالقوة والنشاط في اعمال البيت لأنوماعندي شغالة
وبعدها أنام
أقوم قبل آذان الظهربنص ساعة عشان الحق على صلاة الضحى وبعدها أدخل المطبخ وأسوي العجائن وأطلع اللحم وأي شي أكون مفرزنته
عشان يسيح عنه الثلج وأصحي النايمين للصلاة وبعدها أقرأأربع صفحات من القرآن ثم أصلي وبعدها أذكار الصلاة
تم الصفحات الاربع الثانية بعد الصلاة وهكذا في كل صلاة
بعدها غسيل ملابس ولف سمبوسة لو ماقدرت الفها من الليل ومن الساعة ثنتين لين ثلاث أنسوي حلقة بالصالة لكل العائلة ونقرا قرآن وبعدها أذكار واستغفار واللي يعرف يعلم اللي مايعرف
نصلي العصر وما أنسى الصفحات اللي قبل الصلاة وبعدها
بعد كذا أكون مجهزة كم كيسة وأروح للمستودع وأحط من كل شي عندي حبة من تمروعصير وعلبة شوفان وحبة مكرونة وكيسة لحمة من الفريزر
يعني أشياء مابعد انطبخت ويوزعها زوجي على العمال
والأكثر أنه يشتري شاورما وموية وتمر وعصير ويحط كل وحدة بكيسة لحالها ويوزعها وهالشي مسوين له ميزانية خاصة
أما معركتي اليومية مع المطبخ فدائما تنتهي مخلفة خلفها أواني وصحون توصل لحد الباب بس بفضل الله ثم بفضل
( سبحان الله33والحمدلله33والله أكبر)أكون المنتصرة في النهاية
بعدها أحضر الفطور الاول وأكون مجهزة صينية فيها فطائر ولقيمات والأشياء هذي يوم نوديها المسجد ويوم للجيران
ونجلس على سفرة الإفطار نذكر الله حتى يؤذن المغرب وانبه عيالي على ضرورة البدء بالتمر أولا تأسيا بالنبي صلى الله عليه وسلم
بعدها أقراالأربع صفحات وبعد الصلاة ثم الأذكار ثم باقي الصفحات
بعدها أحضر الفطور الثاني يكونوا الاولاد وأبوهم جو من المسجد وبعد ها الى المطبخ أنظف كل شي قبل صلاة التراويح وأريح شوي وأقرا الاربع صفحات اللي قبل الصلاة
ثم استعد لصلاة التراويح وبعد ما أرجع أكمل الاربع صفحات اللي بعد الصلاة وأحضر القهوة والشاي مع شوي أشياء خفيفة وهذا الوقت خالبا أقضية مع العائلة نجتمع فيه أو نشوف برامج هادفة
وعند الساعة 12أسألهم وين وصلوا في قراءة القرأن (التنافسية)>>>أخاف يسبقوني هههههههههههه
وإذا خلصت أجهز الحلى حق بكرة لو حابين اسوي لهم حلى والف السمبوسة وأصابع الجبن ولو عندي فانليا أسوي المعجنات باليل بدون ما أدخلها الفرن
لأن الفانليا ماتخلي ريحة الخميرة تبين إنها بايته بس أخلصها أدخلها الثلاجة وبكرة أدخلها الفرن وهذي الطريقة تريح كثير وتوفروقت وجهد
بس لو ماعندي فانليا أعجن من لظهر وأسويها العصر
بعدها أرتب البيت كله عشان ماياخذ مني وقت وجهد بكرة
بعدها أصلي اللي ربي يقدرني عليه وبعدها أحضر السحور وعادة"يكون أشياء خفيفة أو من بواقي الفطور
وبعد غسل الصحون أبخرالبيت بعد السحور وقبل آذان الفجر لأنه يفطر
وسامحوني على الإطالة
28-08-1431 هـ, 10:26 مساءً
 
مرحباااا بنااااات حواء الحلوات

وبنات الحمله على وجه الخصوص

كل عام وانتم بخير بمناسبة الشهر الكريم جعلنا الله واياكم من صوامه وقوامه يارب ومن عتقاء النار

+++

ماشاء الله الجميع متواجد ان شاء الله دوم يارب

اما انا اعذروني لان المنطقه اللي انا فيها النت مافيها واذا ان وجد فهو جدا سيء

لكن لي عوده مع المدارس لاني ما حرجع من السفر الى مع المدارس

بس عن جد بنات الاجواء في الجنوب خرااااافيه خيااااال امطار وخير وبراد الله يديمها يارب


جالكسي مالح الف الف الف مبروك المولود الجديد الله يطرح فيه البركه يارب ويبلغك بره يارب

والحين استودعكم الله جميعا
28-08-1431 هـ, 10:57 مساءً
 
جميع الأخوات السلام عليكم ورحمة الله وبركاته
مبارك عليكم الشهر وأسأل الله ان يرزقنا صيامه وقيامه ويجعلنا من المرحومين فيه والمغفور لهم والمعتوقين فيه من النار
ما شاء الله تبارك الله برنامج راااائع جدا واكثر من رائع يا اخت جوجو
29-08-1431 هـ, 03:30 صباحاً
 
ابارك للجميع شهر رمضان جعلنا الله واياكم من صوامه وقوامه

في رمضان الكل يسعى لكسب هذي الاوقات الثمينة ولاحظت انه اكثر الاشياء اللي تضيع الوقت في رمضان هي

المطبخ والسوق والزيارات العائلية بالا ضافة الى القنوات الفضائية .. طبعا الاشياء الثلاث الاولى تحسين انك مجبرة عليها تسوينها لكن لو قلبنا المفهوم واحتسبناها كان صارت منبع خير لنا كيف ؟؟ انا اقولكم كيف ..

فالمطبخ اوفر فيه مسجل او رادو اسمع اذاعة القران وقت ما انا قاعدة اشتغل فيه او احضر اشرطة محاضرات واسمعها واشرطة بلغة الشغالة اللي عندي تسمع كلمتين تنفعها بدينها واكسب اجرها

السوق .. ايضا انظر له من مفهوم اخر وهو ادخال السرور على ابنائي وبناتي وافضل شيء انك تخلصين من اغراض العيد قبل رمضان لانه من جد يلهي الوحدة عن الذكر ويشغلك بكثرة المناظر ويشوش ذهنك فيقطع عليك الخشوع بالصلاة

الزيارات العائلية .. احتسب فيها صلة الارحام وادخال السرور على قلب المسلم وخصوصا كبار السن والمرضى واحرص على تجنب الغيبة والاحسن اني ما اطول عندهم علشان ما اضيع على نفسي وعليهم فرصة التزود برمضان من الاعمال الصالحة وايضا اقتصر زياراتي على الاشخاص اللذين يجب علي وصلهم مثل الوالدين والاخوان والاعمام والاخوال وهؤلاء الاشخاص بالتحديد هم الاشخاص اللي يلزمني وصلهم يعني حتى في صلة الارحام يوجد ناس محددين واجب علي وصلهم ..
بالنسبة لوصل الارحام الاشخاص اللي امون عليهم اخذ فطوري واروح افطر معهم لان وقت الفطور غالبا يكون مخصص لعائلتي والجلوس معهم .. اما اللي مانمون عليهم نروح لهم بعد صلاة التراويح مباشرة .. بعض الاشخاص ما اقدر اروح اسلم عليهم فهؤلاء اخصص وقت لجلسة المكالمات انا وزوجي بحيث يتصل على اقاربه ويسلم عليهم ثم يعطيني السماعة اكمل تبريك وسلام واقاربي نفس الشئ اتصل واسلم عليهم واذا خلصت عطيته السماعة يكلم طبعا قائمة المكالمات عندي طويلة جدا خصوصا اقاربي الله يقدرني على اداء حقهم ووصلهم

القنوات الفضائية.. اكبر سارق للوقت وخصوصا برمضان مادري ليش هالقنوات مايطلعون ابداعهم الا بهالشهر الفضيل والحمدلله ان كل اللي عندي قنوات اسلامية لكن حتى لو لان اكثر البرامج اللي نتابعها غير مهمة مثل بعض المسلسلات وبرامج المسابقات .. يعني حاجات ترفيهية لا اكثر ولا اقل فلازم اشوف جدول القناة اللي عندي واحاول اني لما اكون اتابع برنامج ترفيهي اؤدي عمل اخر بنفس الوقت مثل لف السمبوسة او كوي الملابس او اي عمل اقدر استغل فيه هالوقت الضائع بانجاز عمل اخر ...
طبعا هذا حل للي ارادتها ضعيفة وما تقدر تسيطر على موضوع القنوات عندها اما الناس اللي ارادتهم قوية هذي مايبي لها كلام تقفل التلفزيون من اساسه وتريح عمرها .
29-08-1431 هـ, 10:06 صباحاً
 
مكاوية
ماشاء الله عليك برنامجك الرمضاني حلو راح أطبق منه سماع إذاعة القرآن وأنا بالمطبخ بإذن الله
سندريلا
المنيو رااائع تسلمي يالغلا وصدقتي كل الاشياء اللي ذكرتيها فعلا تسرق الوقت من غير مانحس وأضيفي عليها النت بعد
وزي ماقلتي اللي ماتقدر تقاوم من الاصل ماتشغله من أساسه
نيراز
حياك الباري والله يسعك وين ماكنتِ وفعلا أجواء الجنوب شي خيالي بالمرة
دفىء البووح
تسلمي يالغالية وحياكِ الباري معنا في حملتنا حملة الخير
الجميع
كل عام وأنتم بخير
راح تكون دخلاتي للنت قليلة في هالشهر الكريم لأنو النت يسرق من أوقاتنا الشي الكثير
وإحنا في أمس الحاجة لتوفير أكبرقدر منه
للتفرغ لعبادة رب العباد
29-08-1431 هـ, 11:40 صباحاً
 


الساعة الآن 03:03 .