السلام عليكم


ابي اتكلم شوي عن الزواجات , اكيد كلنا نروح زواجات ونشوف العجايب
بس انا كلامي لا عن الزواج وديكوره ولا عن العروسه ولا عن شكلك في الزواج كيف يكون ؟


ابي افضفض وانتقد بعض اللي اشوفه في الزواجات

► أول ماتدخلين ►

كثير مننا نلقى العاملات اللي يفتشون عن الجوالات والشنطة في مدخل الصالة .
اذا كان جوالك فيه كاميرا راح ياخذونه
لا تتناقشين معها وتتفرعنين عليها , وتحرجين اهل العرس وتقولين ابغى ادخل جوالي معاي

بعض الحريم ما عندها في وحده تقعد تتبلحط وتصارخ الا تدخل جوالها !! يارب سترك بتموت لو جوالها ما يدخل معاها!!
خليك راقية في دخولك وهاديه واذا اخذوه منك قفليه واعطيها اياه ماراح يطير

► خليك بشوشه وابتسمي ►

فيه نوعين من البنات في الزواج

بنت تعقد حواجبها وتحسب نفسها احلى وحده في القاعة ولاحد يكلمني !
و بنت خفيفه وتقط وجهها على الرايح والجاي يعني تراني حبوبه

إنتي خليك عفويه واجلسي في الطاوله واذا شفتي امك تسلم على احد قومي من غير لا تقولك وسلمي ..
ولا تجلسين تدققين في بنات الناس وتصير عيونك 6×6
واذا اعجبك شي لا تنهبلين وتفقين خشتك

► السوالف ►

لا تسولفين كثير وقت الطق .. عشان ماتصارخين وتنقطع احبالك الصوتيه
تصيرين كأنك غير لبقه كذا و عربجيه

لا تحشين بأي شي في القاعة او شكل العروسة او التقديم
تذكري انهم ناس مقدرينك وعازمينك يعني عيب تنتقدينهم وتتمصخرين عليهم

وياكثر مانشوف هالنوعيات اللي من وساعة الوجه يحشون وقت زفة العروسه بعد

► الرقص ►

لا تصيرين انتي والطقاقه واحد
وكل ماطقوا قمتي وردحتي .. كلنا ننبسط على الطق بس تذكري انك مو في بيت اهلك لحالك

ارقصي على كم اغنيه بس .. واذا جاتك وحده تغلى عليك وقالت لك قومي ارقصي
لا يصير دمك ثقيل وتقولين لا .. قومي ارقصي معها شوي
عشان لا تجلس تسحب فيك ويصير شكلك غبيه
مو كل من قالك ارقصي قمتي اعتذري بلباقه

► كلمة ماشاء الله ►
زي ما انتم عارفين شعبنا موسوسين من ناحية العين والحسد .
كل ما احد سئلك عن شي قولي ماشاء الله

وش رايك بالعروسه ؟ ماشاء الله
اعجبك الطق ؟ ماشاء الله
وش رايك بالبوفيه ؟ ماشاء الله

بوفيه العشاء ►


تذكري ان فيه اكل في بيتكم
واذا قالوا يلا العشا وشفتيه زحمه اصبري شوي لين تشوفين الزحمه خفت .
واذا دخلتي لا تعبين الصحن وفي الاخير ماتاكلين .. واذا فيه قدامك حرمه كبيره خليها تجي قبلك وتغرف من باب الاحترام
ولا تكثرين اكل .. كلي بس لا تشبعين , واذا خلصتي وشفتي احد من اهل الزواج قولي اكرمكم الله

► قبل لا تطلعين ►

انتبهي تطلعين وانتي ماسلمتي على اهل العروسه او المعرس
وترجعين تباركين لهم مره ثانيه .. وتسلمين عليهم وتقولين الله يعافيكم انبسطنا ... الخ


وخلصنا

واللي عندها ملاحظات تضيفها يمكن انا نسيت شي





بااايوو


أنتقاداتك في محلها ..
عجبني موضوعك ..
ولو أني أعتزلت الزواجات خلاص
سوووووووووووووووري مشرفات ممكن تنقلون الموضوع لقسم جمال عالم حواء اسفه بالغلط حطيته هينا


يعطيك العافيه اختي انتقاداتك كلها في محلها

ومفيده جدااااااااا

جوزيتي الجنان
..اللهم توجني بخلقي وستري امام خلقك فوق ارضك ويوم عرضك..
..سبحان الله وبحمده سبحان الله العظيم..
الله يخلف علي نسيت شكل الطقاقات والزواجات مودعتها لي 6 سنين حتى الرقص اللي كنت محترفه فيه الحين مااقدر اعفط ايدي لوجت اغنيه يابنات تصدقون انه ماعندي فساتين زواجات ابد حتى قرابتنا صارت زواجاتهم بس رجال من ناحيه اقول الحمدالله اللي انقطعت عنهم


الساعة الآن 10:03 .