مرحبا
اتمنى من بنات الامارات ما يفشلوني
سمعت ان عندكم بالامارات اسواق تبيع اشياء حلوه وسعرها مو غالي لان عندنا بالسعوديه
كثير يروحون للامارات ويجيبون منها اشياء حلوه واسعارها مره رخيصه
فلو تكرمتوا تقولون لي شنو اسماء ها الاسواق واماكن تواجدها ؟؟؟؟
انا ما عرف وايد في اسواق دبي غير المراكز بس اسمع ان الوصل ويمكن الكرامة يبيعون فيها اشياء حلوة ورخيصها
خاطري ارروح وشوف شو يبيعون

وان شاء الله بنات دبي يفيدونك اكثر

السوق القديم في الشارقة تحصلين فيه كل شي واسعارة كويسة من حيث القماش والاحذية والحقائب وملابس الاطفال والنساء الجاهزة والعبايا والطرحة واغراض المولود الجديد وتوكات الشعر 000000 الخ
أنا مب من دبي بس اعرف وايد من اسواقها .... مثلا سوق مرشد(خاصة مقابل المسجد الكويتي) احسن شي للجلابيات و ملابس البيت اسعارهم وايد حلوة بس خلي بالج يعرفون انج من السعودية لانه يغلون السعار شوي زيادة (حتى لو غلو اتم رخيص) بس اقصد هم يعرفون ان اهل الإمارات عارفين الأسعار .... على كل حال اذا صاحب الدكان قالج 30 درهم ... قوليله 15 درهم في نفس سوق مرشد في عندهم مركز اسمه عكاظ يبيع جلابيات بعد على فكرة سوق مرشد قريب من سوق الذهب ... قبل لا ان نتقل لسوق الثاني في مرشد ممكن تحصلين أدوات حلوة للمطبخ(فناجين.. دلال ...)

السوق الثاني سوق نايف (قريب من سوق الوصل) فيه ملابس قطنية لنومو ملابس طلعة للصغار و الكبار بعد عندهم شنط ... بس انتبهى على النوعية ... عندهم زين و شين ...

مقابل نايف في مركز المنال ... اغلي بس تحصلين عندهم قماش راقي للفساتين و الحراير و اقطان التييوبو ... هذا في الطابق الاول ...بس عندي لج نصيح ... يوم بيعرضون عليج الأقمشة ... لاتنبهرين فيها .. ودايما قوليلهم طلعولي شي احلى .. هذا فكرة عادية .. ابغي شي فكرة غريبة ..لانهم دايما يخلون الأشياء الحلوة في الستور و يحاولن يمشون الأشياء القديمة ... و إن همتج معاهم ...سورين و لبنانين وكلامهم كله عسل ...على فكرة مركز البستان عندهم اقمشة فساتين وايد حلوة بس شوي غالين .. المحل الي دهيما اشتري عنده اسمه المارينا ... صاحبه خلوق وايد وماينزعج يوم تطلبين منه يعرضلج اكبر عجج من الأقمشة

الوصل بعد عندهم أشياء حلوة ... مري عليهم

للعبي و الشيل في مركز اسمة ابو هيل .. اسعارة مب رخيصة بس معقولة ... عندة ديزينات وايد حلوة ...

مركز الملا بلازا يسون فيه معارض حلوة ايام المهرجانات بعد

مثل ما تفضلت الإخت a7laa_3yoon الشارقة سوقها منتعش و صاير عندهم اشياء وايد خاصة الوق القديم و مركز سارة (جنب بعض على فكرة)

المراكز الي فدبي طبعا غنية عن التعريف و حتى الي في الشارقة ( وايد مراكز جديدة فتحت)

هذا غيض من فيض ... دبي كلها تجارة في تجارة .. محد يقدر يحصيها ...

على العموم اذا عندج اي استفسار انا حاضرة .... والله يوفقش ان شاء الله و تستانسون في بلادنا ... ويا مرحبا فيكم
هلا فيك اختى بدبى

والبنات صراحة ما قصروا بس حبيت اضيف اشياء

روحى سوق الكرامة كله محلات تبيع شنط تقليد بس حلوين وما يبين انهم تقليد
واذا تحبين اللبس الهندى روحى سوف مينا بازار مليان من شغلات الهند بس اشياء حلوة فى اسعار غالية واسعار متوسطة وبعد الاكسسسوارات الهندية تخبل

اما المراكز فهى كثيرة فى بر دبى مركز الواحة وهو دايم تلاقين العائلات فيه فى محلات للاطفال وللكبار وايضا لوازم البيت فى هوم سنتر ومحل متنوعة

بعد فى مركز بالم سترب ومركز الشاطىء وميركاتوا والحين اخر مركز انتفتح ما صار له اسبوع مركز القرية وفى محلات متنوعة

فى مركز برجمان طبعا شوية الاسعر اغلى وبعد مركز وافى اغلى بس اشياء تستاهل
بس لا تقولين انج سعودية مثل ما قالت الاخت اللى قبلى لانه طبيعى السعر بيرتفع من قبل البياع
واى خدمة احنا حاضرين واذا جا ء على بالك اوسمعت عن محل وما عرفت مكانه بس اسلى وانا حاضرة ادلج عليه بدبى طبعا
اللهم تولنا في من توليت واصرف عنا شر ما قضيت

فأنك تقضى ولا يقضى عليك

استغفرك ربى واتوب اليك
ماشاء الله البنات ما قصرو ما تم شي اكتبه
من جميــــــــــــ ــــــرا ،،،


الساعة الآن 01:28 .