هلا اختي ريمان ترى ياقلبي هذي الاسئلة اللي سألتيها لايمكن احد يبرد قلبك في الرد عليها الا لما يطلع زين على العائلة
بعدين علاقة الاخوات بين بعضهم تختلف من اسرة لأسرة وايضا زوجات الاخوان.

اعرف ناس لهم بنات متزوجات بعضهم يجون مايخلون على امهم قاصر يشيلونها شيل ويعاونونها ويزينون الشغل اللي بيدها ويجيبون معهم اكلة ولا لبس من اللي تعرف ان امها تحبه وفي المقابل بنات يجون بس عشان يتقهون ويخدمونهم اهلهم والمصيبة انهم يخلون عيالهم يسرحون ويمرحون في البيت بدون رقيب والعجب العجاب ان قلب هالام يحب كل هالنوع من الخدومه والمخدومه .

بس في نظري ان الاخت تحب اختها تجي ولا تنفر منها الا اذا كان بينهم عدم توافق .

اما مرة الاخ زين انها تسلم اذا جت تطلع اذا شافتكم في وجهها لكن ترى احيانا زوجة الاخ تطلع وتروح مثلا مشوار ساعتين وترجع للبيت ويمكن يقول زوجها يله نطلع نتعشى برى او اتصلت عليها وحدة من اخواتها تبيها لاي غرض او طلعت مرة ثانية لمشوار اخر المعنى انها هي تحس بأحراج كأنكم بتقولون وش هذي ياكثر طلعاتها حتى اذا احتريتوها على العشاء ودورتوها تراها بتحس بالاحراج وتعيش معكم كنها مراقبة طبعا انت بتنفين هذا وانا معك لكن ابين لك احساسها

اما اخوك ياقلبي اشوف انك ملزومة تشوفين فطوره وخاصة اذا كانت موجودة في البيت شغالة لاني ما ابيه يدخل المطبخ وهي فيه وطبعا بالمقابل الاخوان يودونا السوق والمدارس وعزايم الاقارب واذا كان الاخوة والاخوات تعاملاتهم زينة تلقينه يحب يمشي اخواته اذا ضاقت صدورهم في البيت ،،،،،بس الصراحة في محيطي نادر الاخ يفطر في البيت يكون فطوره في كفتريا الجامعة او يجيبون سندوتشات اذا موظفين ويفطرون مع الزملاء

بس فيه نقطة عشان مانظلم الاخت اذا والله بقوم من صباح الله عشان ازين فطور لخوي وارجع انام ما اعتقد اني ملزومة الا اذا فيه خدمات يسويهالي تكافىء اني اقوم كل صبح عشان بس فطوره

انا اشوف ان اختك تكرف ببيتها ومعها بنت يعني ماتجيكم الا هي منكرفة وتعبانة وخصوصا ان الوحدة الي عندها طفل تتعب كثير وخصوصا بالنوم وهذا ياثر على مجهودها بشلون تبونها تشتغل اذا جتكم!!!!!!! انتم تشتغلون ببيتكم ومانتم محتاجينها وهي جاية ترتاح لو امك ماعندها غيرها بنات اكيد بتساعد امك اما انتم فاضيات وش وراكم والشغل اذا تنظم بين شخصين يكون مريح ,,,وبكرة تتزوجين وتحسين وين بتودين بنتك او ولدك اذا رحتي للسوق ماعندك هال يمسكونة خصوصا اذا روحاتها مو كثيرة .
اما زوجتة اخوك من اللباقة تقول احيانا لك انها رايحة بس بكيفها يمكن روحة شخصية لا تدققون.
احوك اذا حبيب وطيب المفروضتفزعين معة اذا ماوراك شيء وتسوين لة الفطور ترى يحبك اكثر واذا اناني مدري عاد تبين تتوددين لة اكثر سوية لة الفطور.
وسالفة اختك وملابسها الوسخة انا بمجتمعي اغلب البنات يسون كذا مع انها مالها داعي كل مرة تجيب كيس ملابس انا لو منها استحي من الشغالة الا اذا تعطيها فلوس احيانا عشان ماتزعل لانها مالها خص فيها.