(الرضاعه الطبيعيه)موضوع يحتاج الدخول والرد

السلام عليكم ورحمة الله وبركاته

كيفكم عزيزاتي ,,,,,,,,,,,,,من اسبوع تقريبا مادخلت والله انشغلت بالبنوته مررره كأنه اول طفل من زمان عالاطفال .........:p..حايسه جدا


من فتره ابغى ادخل واكتب موضوع عن الرضاعه الطبيعيه خشيت مره وكتبت في قوقل عن الرضاعه وايش اللي ممكن يزيد من حليب الام موضوع صراحه مهم نحتاجه انا في عيالي ماعمري طولت في رضاعتهم من صدري بس في طفلي هذا اتمنى اكمل ولو حتى ثلاث شهور طبعا السبب فيهم كلهم قلة الحليب

في بنتي هذي الله يحفضها الكل يقولي مع الامراض المنتشره الان احسن رضعيها من صدرك وانا ارضعها من ولدت والان عمرها شهر بس اول اسبوع تمام وبعد كذا قليل جدا لاحضت الشي هذا لما ارضعها من صدري ماتشبع تجلس تبكي ولا بد بعدها تنشرب حليب صناعي معناته مايكفي مره كمان جات صغيره بنتي نفسي ترضع طبيعي اكثر

ومن ولدت وهي تعطس على طول ولما شفتها كذا سرت مااشغل المكيف ابد علشانها مع انه حر لاني ساكنه بجده جو زفت شوي حر شوي براد خفيف جدا وسارت بعد فتره زكام مافيه سيلان بس مسدود خشمها على طول تطلع صوت بخشمه تعرفوا لما يكون مسدود وجلست احط لها قطره ملحيه وشوي زيت في الانف بس بعد فتره صار معاها كحه ناشفه وحتى وهي نايمه احس ماتتنفس كثير لابد احط مخده تحت راسها ولا تنام مزبوط ..........متأسفه دخلت بسالفه ثانيه مرض بنتي بس علشان اوصل المعلومه انه ماابغى اوديها مستشفى يدونها ادويه في سنها هذا شهر بس عمرها وهذا اللي سكتني من اول فالرضاعه الطبيعيه تحمي عيالنابعد الله سبحانه تعطيهم مناعه بس مابيدي شي صدري قليل حليبه انا اشرب حليب كاسه في الصباح وفي الغدى اشرب كاسه برتقال واذا فضيت شربت ثلاجه حليب بودره واحيانا ثلاجة قشر مع مويه احيانا وطاسه مرقه فهل هذه الكميه من السوائل ماتكفي يقولوا حتى لو ماء يجيب حليب قريت في النت عن الطحينه بس وش المقصود الحلاوى الطحينيه اللي تتاكل مع النواشف ولا الطحينيه اللي نصلح فيها طحينة المندى وكمان يقولوا الحلبه تدر الحليب ننقعها ونشربها مشكلتها ريحتها بس يقولوا الماش يغني عنها فهل الماش فعلا يدر حليب الام يسير استخدمه بس لابد بمرقه او ممكن اكله سف ملعقه مثلا ماش يوميا وهل تفيد بالغرض
ياريت كل وحده تكتب تجربتها في الرضاعه ووش اللي يدر الحليب علشان الكل يستفيد وابنائنا امانه في اعناقنا ووالله احزن على الطفل لاحول ولا قوه له يحتاج العنايه ومره اتعب يوم مااقدر اصلح له شي وهو تعبان فلابد نجتهد باللي نقدر عليه وكل شي بقدرة ربي قبل كل شي خلونا نتناقش هنا ونشوف

على فكره انا اعطيها الحليب دافي علشان يريح صدرها واعطيها يانسون وشمر دافي بعد وسمعت عن الحلبه احط لها عشر حبات منقعه واصفيه حلوه للكحه بس لساعي ماجربتها وكنت بسأل عن التمر نفسي اعطيها علشان تستصح شوي ضعفانه هل عادي اعطيها التمر المنقوع من بداية الشهر الثاني

استناكم الله يحميكم ,ويحفظ لكم عيالكم