ذيج المرة سويت رز بالماش واللحم


سلقت اللحم الى ان نضج


وبعدين حمسته مع البصل والبهارات



ثم صبيت عليه ماء اللحم والرز الممزوج بالماش



الرز طلع لذيذ بس قطع اللحم طلعت ناشفة من داخل ومو حلوة كلششششش



يا ترى شنو الغلط اللي سويته ، او شنو الشي اللي نسيته



حدي تفشلت جدام زوجي



لو سمتحوا علموني عشان ما اتفشل مرة ثانية




الله يخلي لكم اهلكم وحبايبكم
04-07-1425 هـ, 12:37 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
حبيييييبتي MooN GirL افا عليج بس !! ولا يهمج

شوفي عمري .. يمكن انتي ما سلقتي اللحم كفاية . اللحم يبيله سلق تقريبا ساعتين ونص .. مو اقل من جذي . علشان تضمنين انه يستوي عدل. او يمكن كنتي مسوية لحم هبرة .. والمعروف عنه انه ناشف. انا يا اما استخدم بيت اللوح او قطع لحم ( صافي ) اشتريه من مركز سلطان او جمعية الروضة عند الي يبيع اللحم المفروم والاجبان . عرفتيه؟

انا بقولج كذا طريقة للحم اسويهم مع عيش الماش اوكي؟

اول طريقة : اللي اهي نفس طريقتج . اسلق اللحم لمدة لا تقل عن ساعتين ونص مع حب الهيل والدارسين وحبة بصل مقطعة ومسمار وملح وورق الغار.. بس الملح اخر شي ينحط وقت السلق

وبعدين لما يستوي اللحم .. اشيله على جنب. واحمس بصل مع ثوم مع شووووية زنجبيل واحط اللحم معاهم واقلب عدل بعدين عاد احط شوية من ماي اللحم واحط فوقه العيش والماش .. مثل طريقتج.

الطريقة الثانية لتقديم اللحم مع عيش الماش :

فخذ اللحم بالفرن

اسلق اللحم مع هيل + ورق غار + مسمار+لومي + بصل مقطع + كذا عود دارسين وملح ... لمدة لا تقل عن ساعتين ونص.

اكون مجهزة بطاط مسلوق ومقطعته دوائر + بصل دوائر ( غالبا استخدم البصل الابيض ) ومشروم مقطع .. طازج او معلب ..

اصف البطاط مع البصل والمشروم بالبايركس واحط فوقه فخذ اللحم .. اصب عليه زعفران منقعته بماي .. واضيف عليه من ماي اللحم مع عصرة ليمون واذا تبين تقدرين تضيفين معجون طماط. واحطه بالفرن لين يتحمر . هاذي طبعا الطريقة العادية اللي مافيها خرابيط وايد.

الطريقة الثانية لتقديم اللحم مع عيش الماش

بعد سلق قطع اللحم .. احمس بصل شرائح مع ثوم وشوية زنجبيل واحط عليهم اللحم .. اخليه شوية بعدين اضيف معجون طماط .. وطماط طازج مقطع بدون قشر . خليه شوية على النار .. بعدين ضيفي بهاراتج .. فلفل اسود + شوووووية دارسين بودر + ملح + شوووووووية لومي بودر + شوووووووووووووووية كمون + كركم جذي نص قفشة . وقصري الجولة على الاخر وخليه شوية . لا اتخلين الخلطة تنشف على الاخر . خلي فيها صلصة . وتنوكل مع الماش . وبالعافية على قلبج.

ملاحظة : بحط لج طريقتي في سلق اللحم
اول شي ايييب جدر واحط فيه الماي واللحم .. بدون اي بهارات .. ولي بدى يطبخ اللحم وطلعت الرغوة .. اشيلها كلها .. وبعدين انقل اللحم في جدر ثاني فيه ماي ,, واحط عاد باجي البهارات واخليه يسلق للمدة اللي قلت لج عنها.

ادري قرقت وايد وهذرت ... بس حاولت على كثر ما اقدر ان كلامي يكون واضح .

سامحيني على القصور . و****لله ماتتفشلين مرة ثانية .

عليكم بالعافية مقدما

واذا تبين اي شي .. اختج بالخدمة

اختج .. بنت الكويت
05-07-1425 هـ, 12:49 صباحاً
 
تسلمين يا بعد عمري



ما قصرتي


كفيتي ووفيتي



عسى الله يكتب لج بكل خطوة سلامة ويوفقج ويخليج


عرفت منج ان غلطي كان اللحم بدون شحم مثل ما قلتي

اسفة تعبتج بالكتابة والشرح بس صج استفدت وايد

05-07-1425 هـ, 02:02 مساءً
 
عسى الله يكتب لج بكل خطوة سلامة ويوفقج ويخليج ======= محتاجة هالدعوة

الله يسلمج ويخليج .. واللحم طبعا مو لازم يكون فيه شحم ... انا اشيل الشحم امية بالامية .. بس مكان اللحم اللي تختارينه .. سواء بيت اللحم او الفخذ .. الخ اهو المهم.


واشوة انج استفدتي .. والعفو حياج الله

اختج .. بنت الكويت

05-07-1425 هـ, 04:00 مساءً
 
الدنيا خلتنا نحب ونشتقي :مشكورة على هالطبخة طريقتج الثانية إعجبتني . بس إذا أمكن :
شنو أحسن نوعية ماش ينحط في العيش وياليت تعلميني الطريقه
أكون شاكره لج :
وشــــــــــــــــ علاهل ــــــــــــــــــــــــكـــــــراً
06-07-1425 هـ, 08:53 مساءً
 


الساعة الآن 04:20 .