تعبت وآخر شي ما طلع حلو :(

حبيييييبتي MooN GirL افا عليج بس !! ولا يهمج

شوفي عمري .. يمكن انتي ما سلقتي اللحم كفاية . اللحم يبيله سلق تقريبا ساعتين ونص .. مو اقل من جذي . علشان تضمنين انه يستوي عدل. او يمكن كنتي مسوية لحم هبرة .. والمعروف عنه انه ناشف. انا يا اما استخدم بيت اللوح او قطع لحم ( صافي ) اشتريه من مركز سلطان او جمعية الروضة عند الي يبيع اللحم المفروم والاجبان . عرفتيه؟

انا بقولج كذا طريقة للحم اسويهم مع عيش الماش اوكي؟

اول طريقة : اللي اهي نفس طريقتج . اسلق اللحم لمدة لا تقل عن ساعتين ونص مع حب الهيل والدارسين وحبة بصل مقطعة ومسمار وملح وورق الغار.. بس الملح اخر شي ينحط وقت السلق

وبعدين لما يستوي اللحم .. اشيله على جنب. واحمس بصل مع ثوم مع شووووية زنجبيل واحط اللحم معاهم واقلب عدل بعدين عاد احط شوية من ماي اللحم واحط فوقه العيش والماش .. مثل طريقتج.

الطريقة الثانية لتقديم اللحم مع عيش الماش :

فخذ اللحم بالفرن

اسلق اللحم مع هيل + ورق غار + مسمار+لومي + بصل مقطع + كذا عود دارسين وملح ... لمدة لا تقل عن ساعتين ونص.

اكون مجهزة بطاط مسلوق ومقطعته دوائر + بصل دوائر ( غالبا استخدم البصل الابيض ) ومشروم مقطع .. طازج او معلب ..

اصف البطاط مع البصل والمشروم بالبايركس واحط فوقه فخذ اللحم .. اصب عليه زعفران منقعته بماي .. واضيف عليه من ماي اللحم مع عصرة ليمون واذا تبين تقدرين تضيفين معجون طماط. واحطه بالفرن لين يتحمر . هاذي طبعا الطريقة العادية اللي مافيها خرابيط وايد.

الطريقة الثانية لتقديم اللحم مع عيش الماش

بعد سلق قطع اللحم .. احمس بصل شرائح مع ثوم وشوية زنجبيل واحط عليهم اللحم .. اخليه شوية بعدين اضيف معجون طماط .. وطماط طازج مقطع بدون قشر . خليه شوية على النار .. بعدين ضيفي بهاراتج .. فلفل اسود + شوووووية دارسين بودر + ملح + شوووووووية لومي بودر + شوووووووووووووووية كمون + كركم جذي نص قفشة . وقصري الجولة على الاخر وخليه شوية . لا اتخلين الخلطة تنشف على الاخر . خلي فيها صلصة . وتنوكل مع الماش . وبالعافية على قلبج.

ملاحظة : بحط لج طريقتي في سلق اللحم
اول شي ايييب جدر واحط فيه الماي واللحم .. بدون اي بهارات .. ولي بدى يطبخ اللحم وطلعت الرغوة .. اشيلها كلها .. وبعدين انقل اللحم في جدر ثاني فيه ماي ,, واحط عاد باجي البهارات واخليه يسلق للمدة اللي قلت لج عنها.

ادري قرقت وايد وهذرت ... بس حاولت على كثر ما اقدر ان كلامي يكون واضح .

سامحيني على القصور . وانشالله ماتتفشلين مرة ثانية .

عليكم بالعافية مقدما

واذا تبين اي شي .. اختج بالخدمة

اختج .. بنت الكويت
:cook: :cook: :cook:

تسلمين يا بعد عمري



ما قصرتي


كفيتي ووفيتي



عسى الله يكتب لج بكل خطوة سلامة ويوفقج ويخليج


عرفت منج ان غلطي كان اللحم بدون شحم مثل ما قلتي

اسفة تعبتج بالكتابة والشرح بس صج استفدت وايد

:26:

عسى الله يكتب لج بكل خطوة سلامة ويوفقج ويخليج ======= محتاجة هالدعوة :(

الله يسلمج ويخليج .. واللحم طبعا مو لازم يكون فيه شحم ... انا اشيل الشحم امية بالامية .. بس مكان اللحم اللي تختارينه .. سواء بيت اللحم او الفخذ .. الخ اهو المهم.


واشوة انج استفدتي .. والعفو حياج الله

اختج .. بنت الكويت

:cook: :cook:

الدنيا خلتنا نحب ونشتقي :مشكورة على هالطبخة طريقتج الثانية إعجبتني . بس إذا أمكن :
شنو أحسن نوعية ماش ينحط في العيش وياليت تعلميني الطريقه
أكون شاكره لج :
وشــــــــــــــــ علاهل ــــــــــــــــــــــــكـــــــراً

هلا حبيبتي علاهل .. آآآآآآآآسسفةةةةةةةة لاني تأخرت بالرد عليج .. اتمنى تقبلين اسفي :29:

بالنسبة للماش .. فأحسن نوعية عن تجربة .. اهو الماش الهندي وتقدرين اتحصلينه بكل مكان.

اما بالنسبة لطريقة عمل عيش الماش .. فأول شي تحمسين البصل والثوم واتحطين شوووية كركم .. يعني نص قفشة صغيرة .. وبعدين تضيفين الرز مع الماش مع بعض ..طبعا بعد غسلهم ونقعهم. وتحطين الملح .. وتحطين اخر شي السائل .. سواء كان ماي الدياي او ماي اللحم .. على حسب طبختج . واتخلينه لين ينضج .


اختج .. بنت الكويت :cook: