أنا بمووووووووووووت في البيتزا الحارة
عملتها وطلعت حلوة جدااااااااااااااا
بصوا بقا
كل واحدة تجري بسرعة تجيب ورقة وقلم وتكتب ورايا الطريقة والمقادير بالظبط
مقادير العجينة
هاتي 4 او 5 كبايات دقيق مخبوزات
وعلشان ماتحتاريش كتير هاتي دقيق بيتزا
أو دقيق متعدد الإستعمالات
وانخليه
ضيفيله 2 ملعقة زيت و3 معالق سمنة بلدي وعدد 2 بيضة وملح وشوية فلفل علشان زفارة البيض
بعد كده تكوني محضرة الخميرة
حطي كيس خميرة على 3/4 كوب ماء فاتر
لما الخميرة بتفور كده
ده دليل على انها فعالة وهتخمرلك العجين
اعجني المكونات كلها مع بعض
وزودي الميه شوية بشوية بس يفضل الميه تكون فاترة
لحد ماالعجينة تكون لينة
وفي نفس الوقت ماتلزقش في الوعاء
غطيها وحطيها في مكان دافئ وسيبيها تخمر لمدة 1/2 ساعة
بعد كده قطعيها 3 او 4 كور حسب مقاسات واحجام الصواني اللي عندك
وسيبيها متكورة لمدة 10 دقايق
بعد كده بططيها على دقيق وافرديها بالنشابة بحيث ان سمكها مايكونش كبير
خليها رقيقة
اقلبي عليها الصينية اللي هتحطيها فيها وشيلي الزيادات
خرميها بالشوكة وسيبيها تخمر في الصينية لمدة 1/2 ساعة
في الوقت ده حضري الطماطم الكونكاسيه
أو صلصة البيتزا
هاتي الطماطم بتاعتك واغسليها كويس أوي
تكوني حطة ميه بتغلي على النار
سقطي فيها الطماطم
وتكوني شقاها بالسكينة من تحت
( علشان سهولة تقشيرها )
ممكن تسلقي معاها التوم وتحطي معاها زعتر ناشف وهي بتتسلق
حسب رغبتك
انا هنا حطيت الطماطم تتسلق لوحدها
وهنا بعد مااتسلقت
قشري الطماطم بعد ماتبرد
وحطيها في الخلاط مع 4 أو 5 فصوص ثوم
بعد كده حطيلها الملح والفلفل والزعتر المطحون
وكتري الزعتر هيخلي ريحتها تجنن وطعمها كمان
حطي ملعقة سمنة بلدي على النار وسقطي فيها الطماطم بعد ماتقلبي فيها التتبيلة بتاعتها
سيبيها تتسبك
بعد كده حضري الحشوة
لحمة مفرومة
طماطم مكعبات
بصل مكعبات صغيرة
فلفل رومي حلقات
فلفل حار حلقات
زيتون اسود
وطبعا جبنة موزاريلا
أنا عملت اللحمة كور صغيرة خالص بعد ماتبلتها بالبصل الناعم والملح والفلفل
وحطيتها على النار تستوي في نفسها
بعد ماالصلصة اتسبكت
فرشتها على البيتزات اللي في الصواني
بعد كده حطيت طبقة خفيفة من الجبنة الموزاريلا
بعد كده حطيت كور اللحمة
والطماطم المكعبات والبصل والفلفل والزيتون الأسود
وضغطت عليهم جامد بإيدي
وبعد كده حطيت طبقة خفيفة من الصلصة
وبعدين ضفت الجبنة الموزاريلا
وده شكلهم النهائي قبل مايدخلوا الفرن
سخني الفرن بتاعك على اعلى درجة حرارة
وحطي الصواني بتاعتك في الوسط
سيبيها لحد ماالجبنة تسيح وتحمر من ع الوش
هتكون استوت
وده شكلها بعد ماطلعت من الفرن مباشرة
إيه رأيكم فيها؟؟
بذمتكم مش شكلها زي الجاهزة
والطعم أحلى والله
ونصيحة مني
لو هتعملوها بالطريقة دي اعملوها قبلها بيوم
وبيتوها في التلاجة
وتاني يوم سخنوها
هتبقا احلى كمان
هتطرى اكتر
وهتبقا جنان
ياللا اتفضلوا مدوا ايديكوا
بالهنا والشفا
ايه رأيكم بقااااااااااااااااااااااا؟؟
ماتنسونيش بالدعاء انا وبناتي
الله يعطيك العافيه اختي يسلمو الايادي
طبعا القطعتين لي لوحدي يمممممممم