خدمة يا أهل الخبرة وخصوصا اهل المدينة " عمل رقاق السمبوسك"

عزيزتي س (للاختصار)
والدتي جزاها الله كل خير واطال الله في عمرها
تعمل هذا الرقاق وسمبوستها دايم مقرمشة وانشاء الله اجيب لك طريقه العجينه منها
اما الطريقه فهي تعجن العجين وبعد ذلك ترقه بالنشابة
وتقطعه مستطيلات وتعمله بالالة الفرادة مالت السنبوسه
تطلع مستطيلات طويلة رقيقة وتكون واضعة على النار
التاوة اللي يعملون فيها الفطاير اللي من دون حافة اللي اذا صبيت فيها ماء يطيح منها لان مالها جوانب
وتكون مدهونة زيت زيتون
انشاء الله تكوني فهمتي قصدي
وهي تدهن بمناديل المطبخ الرول لان الفرشاة مع الحرارة تنحرق
بعد ذلك تضع الرقاقة اللي فردتها على التاوة قليلا من كل جهة لما يتغير لونها قليل
وممكن وضع اكثر من رقاقة متراصة بجانب بعضها على النار وتقلبهم مع بعض
وبعد ذلك تكون فاردة بجانبها قطعة قصدير كبيرة كل ما تخلص رقاقة تضعها في القصدير
وتدهنها دهنة بسيطة بالزيت وتضع فوقها الثانية وهكذا الى ان تعمل الكمية اللي تبيها
وتلف عليها القصدير جيدا وتضعها في كيس بلاستيك وتضعها في الفريزر لحين الاستخدام
واذا ارادت استخدامها تخرجها من الفريزر بوقت كافي ليفك التجميد ثم تستخدمها
هذي طريقة العمل اما العجينه انشاء اللة اجيبها لك في وقت قريب

الله يعطيكي العافيه هو بالضبط اللي ابغاه
جزاكي الله خيرا ونولك اللي تبغيه

اهلين حبيبتي س انا جبت لك طريقة العجينة من الوالدة
3 كاس دقيق ابيض
رشة ملح
1 فنجان زيت
ماء للعجن
اعجني المقادير السابقة واهم شي ان العجينة تكون
ناشفة مش طرية يعني الماء لا تضعي كثير منه فقط حسب الحاجة
وبعد ذلك دعيها ترتاح ساعة وافرديها حسب ما شرحت مسبقا
وانشاء الله تظبط معك وخبريني بالنتايج
وبعدين حبيبتي انت قلت انك تعملي البف
ممكن تعطيني طريقته لو تكرمت لاني دايم
ادور طريقة يكون البف يقرمش وما الاقي

الله يعطيكي العافية ....... من عيوني اعطيكي طريقة البف
اولا العجينة:
2 كاس دقيق- شويه ملح - 2 ملعقة طعام سمنة اوزبدة بس الملعقة تكون ممسووووحة- ماء دافي للعجن
عشان تطلع العجينة كويسة افركي السمنة بالدقيق والملح كويس بعدين اعملي حفرة في النصف واضيفي الماء بالتدريج الى ان تتكون عجينة كويسة مو قاسية مرة بس برضه مو لينة يعني في النصف
قطعي العجينة الى 7 كور اعجنيها كويس وكوريها وخليها ترتاح لمدة ساعة " عشان تريحك في الفرد
طبعا الحشوة تعمليها عبارة عن لحم مفروم وبصل ملح وفلفل اسود وبعد ماتستوي وتبرد حطي بقدونس مفروم وشبت
والبيض المسلوق حسب الرغبة.
نجي للفرد الصراحة في الفرد انا اسوي كذا عشان اتحكم في سمك العجينة
أخذ كورة من العجين واغمسها في الدقيق وافردها على شكل مستطيل طويل وعرضه قد 5 اصابع
طبعا كل فتره والتانية ارش دقيق يعني وقت الفرد الى ان تحصلي على عجينة خفيفة مو مرة عشان الحشوة تكون ثقيلة وتخليها تتقطع
تحطي 6 او 7 ملاعق من الحشوة على اماكن متقاربة مع مراعاه يكون مقدار اصبع بين كل وحدة والتانية
بعدين تاخذي الطرف العلوي وتطبقيه على السفلي وتضغطي على جميع الحواف باصبعك حتى الفراغات اللي بين الحشوات اضغطي عليها بيدك الخطوة هذي مهمة عشان تنفش طبعا بس لا تضغطي على مكان الحشوة وبعدين قطعيها مربعات بقطاعة السمبوسك وحطيها على صينية مرشوشة دقيق
وقت القلي خلي الزيت يقدح يعني ما تبدأي تقلي الا والزيت مرة حار بعدين وقت القلي خففي عليها شوي
لانه البف ما يحتاج وقت عشان يستوي بس شوي طبعا لمن تحطي السمبوسك في الزيت بملعقة اكل رشي زيتعلى الوجه الى ما فيه وتلاحظي على طول تنفش طبعا لمن يصير احسن شئ وقت القلي يفضل تقلبي السمبوسك باستمرار مو تخليها تحمر من جهه وبعدين تقلبي لا .
ولمن تخرجي السمبوسك من الزيت حطيها في صفاية شويه بعدين شيليها ورصيها على سطح مغطى بالمناديل عشان الزيت ينزل في المناديل مو على السمبوسات اللي تحتها يعني كل دفعه قلي لا زم تكون الصفاية فاضية
وان شاء الله تتطلع مقرمشة وتدعيلي
كمان برضه لا تغطي السمبوسك ولا تحطيها في الفرن بعد القلي عشان هذي الطريقة تخليها تعرق وتلين
يارب تكوني فهمتي علي وتضبط معاكي:26:

مشكورة اختي س وجزاك الله كل خير
والله يعينك على الغربة
والله يرجعك لبلادك سالمة غانمة بإذن الله
اللهم آمين