السلام عليكم ورحمة الله وبركاته
أخواتى الاحباء اسعد الله ايامك وبارك لكم فى كل اعمالكم الصالحه وجعلها فى ميزان حسناتكم .
انهارده انا جيبالكم موضوع جميل وبسيط جدا وان شاء الله يارب تستفيدو منه وهو من اختراعى ميه فى الميه من طق طق لسلام عليكم نظرا لانى من محبات الاعمال والاشغال اليدويه واصلا الفكره خطرت على بالى لما كنا بنعمل تصليحات فى المطبخ وغيرنا الارضيه والعمال كانو لما يروحوا بعد انتها اليوم كنت بلاحظ بقايا خلطة الاسمنت فى طبق العجن بتاعهم عامله شكل جميل البقايا يعنى المهم انا عجبنى الشكل العام وبدأت اجرب وعرفت منهم انها عباره عن اسمنت ابيض ورمله بيضاء ولما جربتها لقيتها حلوه بس تقيله شويه بسبب الاسمنت ففكرت انى اضيف الجبس شويه وجربت بقى مقدير مختلفه من الثلاث مكونات لغاية ماوصلت للمقادير المظبوطه من وجهة نظرى اسيبكم مع الموضوع ويارب افيدكم فيه
بسم الله الرحمن الرحيم
اولا المقادير :
زى ماشايفين عباره عن : اى اشكال او مجسمات زجاجيه برطمانات بأى احجام +فلوت اللى هو ورنيش + قواقع واصداف وخرز + اسبريه دهبى وفضى + تنر او تربنتينه + طبق + فرشاة +جليتر + ملعقه +ماء + كوب جبس + كوب رمل ابيض بتاع البحر + ونصف كوب اسمنت ابيض + وعاء لعجن المكونات انا اخدت زجاجة بيبسى وقصيتها عشان بعد الشغل حتترمى .
الطريقه :
اولا :
نخلط كلا من الجبس والاسمنت والرمل فى الطبق ونقلبهم بالملعقه جيدا حتى يمتزجو
وبعدين ناخد كميه صغيره ونعجنها بالماء فى وعاء كما هو مبين فى الصوره معايا لحد هنا
بعد العجن وبسرعه شويه نبدأ بتوزيع الخليط دا على جدار اى مجسم انت حابه انك تزينيه وانا اخترت هنا مجموعه منها كاس ومنها طبق ومنها زجاجة كاتشب وبرطمانات بأحجام مختلفه
وبعد مايخلص او جنب من جوانب المجسم نبدأ بتوزيع الخرز او اللولى والقواقع بشكل عشوائى مع الضغط عشا يجف الخليط ويمسك كل حاجه حطيناها سواء الخرز او الصدف او القواقع فهمتو ليه بقول بسرعه عشان طبعا الاسمنت والجبس بيسخنو ويجفوا بسرعه ولو جف قبل ما نزين حيبقى زى الحيط فا احنا بنعمل شويات شويات عشان مايجفش مننا بسرعه وبرضو جمب جمب لغاية مايخلص المجسم كله ودى صور توضح كلامى
وبعد مانخلص كل الشغل نسيبهم يجفو خااالص ممكن اربع او خمس ساعات معايا لحد هنا ودا الشكل النهائى بعد الخطوات اللى فاتت
نيجى بقى لخطوة الاسبريه وهى طبعا بالنسبه للالوان حسب اختيارك ممكن ازرق مع دهبى او فضى وممكن اخضر يعنى حسب ديكور البيت عندك والوانه بس انا اخترت دهبى وفضى عشان بيليقو مع كل الالوان وحنبدأ نرش الاسبريه على المجسم ممكن كله وممكن نخلى جزء الزجاج باين انه زجاج عشان بس يدى شوية فخامه للتحفه قال يعنى ههههههههههههههههههه
انا بدأت هنا بالون الدهبى وبعدين اديت تاتشات بالاسبريه الفضى وبرضو الامر متروك ليكى تلونيه بالطريقه اللى تعجبك وبعد ما تسيبى المجسمات تجف من الاسبريه تيجى الخطوه القبل الاخيره .......
وهنا حنجيب التنر او التربنتينا وبقطعة قماش او قطن او منديل حنبللها بالتنر ونمسح الزجاج من الاسبريه اللى جه عليه اثناء الرش
حناخد الفرشاة والفلوت وندهن المجسم كله
وصلنا للخطوه الاخيره بعد مانخلص طلى المجسم بالفلوت نبدأ بنثر الجليتر على المجسم نثر عشوئى وبرطو حسب رغبتك ممكن تستغنى عنه اصلا كل الخطوات دى منى مش حاجه اساسيه يعنى
ودا بقى شكل العمل بعد الانتهاء حسيبكم مع الصور بس احب اعلق على الطبق هو مقسم من الداخل 3 اقسام ممكن ينفع بونبونيره بس انا عملته فواحه وحطيتله ورد مجفف بزيت عطرى من باب التغيير يعنى
ودا كان العمل من طق طق لسلام عليكم يارب شرحى يكون واضح واكون وصلتلكم الموضوع بحذافيره وتستفيدو منه ودعواتكم لى ولكل المسلمين والمسلمات
والسلام عليكم ورحمة الله وبركاته
م/ن