ليش تجيبين لأخوك سيارة ؟

حبيبتي لاتدخلين نفسك بقرض انت بالاخير مارح تستفيدين منه شيء
صديقتي توهقت وطلعت لأخوها سيارة ومسكينة لها سنوات ياخذون من راتبها
ولا تهنت فيه نصيحة لا تتورطين

وبرأيي اول شيء تسوينه تجيبين شغالة لأمك مع اني اكره الخدم ولو تقدرين تتستغنين عنها
وبدلها جيبي


غسالة اتوماتيك بـ 2000 ريال
مجفف حراري 1700 ريال >> تطلع الملابس مكوية وتجاعيدها خفييييييييفة وتعلقينها على الدولاب على طول
ترتاحين من الكوي بنسبة 80 بالمية
غسالة مواعين بـ 2200 ريال >> ترتاحين انت وامك واهلك من وقفة غسل المواعين والله انها نعمة
بس مع الاسف مجتمعنا غير معترف فيها بسبب اكتساح الخادمات مع انها بالدول الغربية من ستين سنة
ومافيه بيت الا هي فيه حتى الفقراء عندهم غسالات مواعين


والشغالة جيبوا مرة بالاسبوع تنظف البيت تنظيف عمييييييييييق او مرتين وارتاحوا من وجودها بالبيت

والله يبارك لك يارب بعقلك وصحتك ومالك
23-03-1431 هـ, 08:22 مساءً
 
الله يجزاكم خير يارب
بس اللي تقول خلي البيت يشتريه زوجك لك وودي افرح اهلي لان مالهم بيت ملك لهم خاص فيهم الله يرضى عليك وصجقيني وانا اختك انا مثلك بس ادخلي جمعيات وسوي اقتطاع ترى الراتب اللي يجينا بعد تعب مايجي وحنا نايمين

انا صح ماودي بالشغالة بس وش اسوي الاولاد مايعرفون نظام ابد اثنين عندنا وكنهم عشرة

بس ماحد قالي كيف ابدى ارتب اموري

وابغى نصايح من اخواتي الموظفات لاتبخلون علي ودي اتعلم من غيري
24-03-1431 هـ, 06:26 مساءً
 
تصدقين مشكلتك نفس مشكلتي ونفس وضع الاهل عندي سبحان الله كانك تتكلمين عني بالضبط
كان نفسي اجيب كل شئ مرررة وحدة بس ماقدرت وتبين رايي جيبي لاخوك سيارة طالما نفسة فيها بس انتبهي لاتجيبينها اقساط
قوليلة بجمع فلوس وبشد يدي شوي لين اجمع مبلغ حلو واعطيك تشتري سيارة وقوليلة يحولها ليموزين ويشتغل عليها لانه تطلع ذهب انا حكايتي نفس حكايتك واول ما اشتغلت متعاقدة جمعت فلوس وعطيت اخوي يشتري سيارة مو شرط جديدة اهم شئ نظيفة وطار يعتمد عليها بمصروفة ولما توظفت رسمي قمت افكر ببيت لاهلي ورحت البنك ابي اخذ قرض عشان اشتري بيت بس طلعت الفوائد كثيرة حاولت اشتري ارض ابوي وقف بطريقي وبالاخير عملت غلطة عمري كلها
مدري هي غلطة او لا بس انا مو ندمانه عليها لانه اخوي الثاني كان مسكين وسيارته عدم فكرت اجيب لة سيارة لانه قايم فيني قوم وهنا بدأت المشكلة اخذت اقساط من البنك واشتريت سيارتين كامري وحدة جديدة لابوي كامري 2009 ووحدة مشتغلة لاخوي كامري 2007 مشتغلة طبعا وبدأ البنك يستقطع من راتبي
بعد كم شهر زاد الراتب وزادت البدلات وساعتها تمنين اني ما اخذت القرض لانه لو ماكنت اخذته كان الحين اقدر اجمع مبلغ كبير بكل شهر
للاسف طقيت الصدر وتبرعت اني نصف اجار بيت اخوي المتزوج وتعرفون الاجارات هالايام كيف غالية وزادو الاجار وانا دفعت الزيادة
ايضا بيتنا اجفع نص اجارة مساعدة لابوي لانه لازم اشيل الحمل عنه شوي وبسبب غلاء الاسعار
اخوي الصغير يدرس بالرياض ومكلف بتسديد اجار بيت مع بقية زملائة وانا اسدد
بصراحة تعبت بعد كل شهرين وانا جايني اجار بيت جد طفشت وتعبت ومليت
اول ماتعينت كان عندي طموح اشتري بيت ملك وافرح امي بس الحين صرت افكر بنفسي وابي اجيب بيت لي واللي تقول اشتري لاهلك وزجك يقوم بشراء بيت لك اقولها غلطانه
يمكن تتزوج واحد على قد حالة المفروض تسوي شئ لعيالها بدل مايجون على الدنيا وهم ماعندهم شئ
وانتي وضعك افضل من وضعي لانه ماعندكم اجار بيت وبيتكم تبع الشغل حق ابوك يعني مو مكلفين كل شهر بدفع اجار لذلك لاتورطين نفسك بقرض ابدا واخوك قوليلي ساعدني عشان الم يدي شوي واجمع لك فلوس بس لاتاخذين قرض
انما تورطت فية يدوب مر سنه علية الحين اخذت 109 الف ريال ولازم ارجعها خلالال 5 سنوات معها فوائد 30 الف
شفتي البلشة ولاتفكيرين كثير بغيرك شوفي انا فكرت بغيري لين ورطت نفسي لو ماسكة يدي بالمصروف من اولها كان الحين جمعت شئ وشويات وياريت من تفيدني وتفيدك كيف نجمع
انا الحين ماعندي الا 20 الف بالبنك مع انه راتبي عشرة الاف وشوي بس كلة يطير مصاريف يجي من تحت الارض وانا ما احب اقصر على نفسي ولما امي الله يحفظها تطلب شئ مقدر اقصر معها
للحين اذكر ايام اول ماتوظفت كنت ابعثر الفلوس واشتريت اجهزة كرهربائية للبيت وفصلت مطبخ والشئ اللي ماندمت علية وانصحك تشترية هو غسالة اتوماتك مرررة تريح امك بالنسبة للخدامة ابوي رفضها والحمد لله اللي رفضها تراها لوحدها مصاريف خلو وحدة تجي وتروح بـ300 ريال بالشهر وخلاص انا كنت ما اهتم ابدا ولا احس بقيمة القرش وارمية بكل مكان وكل من قال هاتي حطيت يدي بجيبي مع انهم ماكانو محتاجين الحين شوي لميت نفسي
24-03-1431 هـ, 06:58 مساءً
 
شوفي اول شيء اشتري لك بيت باسمك ( باسمك لانها تعبك ) وبكره اخوانك ما راح يذكروا اللي سويتيه لهم

بعدها رتبي البيت زي ما تبي لانه بيتك

افضل من انك ترتبي بيت العمل وهو مو دايم لكم

السياره خليه هو يشتغل ايش فيها يعني حتى لو بالثانوي .. يشتغل عند ورشه

وانتي ساعديه كمان ..بس لا تشتري بالتقسيط وكمان مو لازم جديده

في أمور أهم ... ولازم تعرفي تفرقي بين الاهم والمهم

بالنسبة للشغاله جيبي الشغالات اللي ينظفوا بالساعات

وراتبهم قليل وما راح تنام عندكم

وزي ما قلت لك خلي البيت باسمك وبعدين اذا جاء قرض ابويك يسوي هو بيت باسمه واذا حبيتي تساعديه فيه مو مشكله

واذا حبيتي ترتبي بيت العمل رتبيه

بس قبل كل هذا اشتري لك بيت باسمك


24-03-1431 هـ, 07:24 مساءً
 
اشتري بيت على البنك باسمك
سوي جمعية مثلا 3000 بالشهر لمدة 10 شهور 30 الف
وقدمي شغالة + ترميمات شاملة
وخصصي صدقة شهرية من الراتب
24-03-1431 هـ, 07:40 مساءً
 


الساعة الآن 10:15 .