اختي العزيزة...انا عندي عزومة يوم الجمعة وكنت ناوية ان شاء الله اسويلهم مقلوبة فول اخضر..عشان هيك راح اقولك طريقتي اللي تشبه طريقة الاخت سوسو...بس احنا ما بنسويها الا بلحمة قطع كبيرة مع عظم طبعا...
اولا تسلقي اللحمة بطريقتك...عن نفسي انا بعد ما اشيل الزفر عنها بحطلها بصلة وبهار حب وورق غار وقطعة صغيرة زنجبيل و3 حبات كبش قرنفل و هيل صحيح وفلفل اسود..وبتركها تستوي بهدوء...ما بملحها الا قبل ما تستوي بربع ساعة...
قبل ما تستوي اللحمة بحوالي نصف ساعة بقلي الفول الاخضر بزيت او سمنة مثل ما بتحبي..وبظل اقلبه على نار هادئة جدا لحتى يستوي ويطرى..بامكانك يا ستي اذا الفول طازج وطري انك تقطعيه مثل الفاصوليا على كبير بحيث كل قطعة تحتوي على حبة الفول كاملة مش مقسومة...اما اذا كان قرن الفول الاخضر كثير كبير ويابس بتاخذي بس الحبوب...(ممكن تستخدمي الفول الجاهز المجمد وهو عبارة عن حبوب فقط)..بس هي زكاوتها بانه حبوب الفول تكون اكثر من الاحباش مثل ما بنقول ( يعني الالياف)...وبهاي الفترة بتكوني ناقعة كمية الرز اللي بدك اياها حسب كمية اللحم ...
بعد ما تستوي اللحمة والفول (تقريبا بنفس الوقت) بتصفي اللحمة وبتاخذي اللحمة وبتقلبيها وتحريها قليلا بالزيت مع الفول الاخضر...يعني بتحمي النار تحت الفول وتضيفي اللحمة والزيت اذا احتجت فقط..وبتظلي تقلبيهم بخفة حتى ما تهرسي الفول..لحتى ما تتحمر اللحمة قليلا...بتكوني صفيتي الرز(بفضل صنوايت ايضا او اي نوع كالروز مصري فاخر بس مش بسمتي او امريكي..مو طيب معاها) واضفت له البهارات المطحونة (بهاروكركم قليل وكمون (بيعطيها طعم كثير زاكي وعشان النفخة) وشوية فلفل اسود) وبتضيفيه على اللحمة والفول و بعدين بتضيفي المقدار من مرقة اللحمة المصفاة (تقريبا كوب ونصف مرق لكل كوب رز بس اذا كان الرز منقوع لفترة كبيرة اجعليها كوب وربع) وبعد ما يبدا المرق بالغليان مع الرز بتذوقي المرق وتعدلي الملح مثل ما بتحبي..انا ما بحبها مالحة ...
بصراحة انا ما بكيل المرقة...انا بحطها بحيث تكون غامرة الارز ومرتفعة بمقدار 1.5 سم واذا احتجت بعدين ولقيت الرز بده كمان بضيف شوي مرقة ساخنة....تطبخي الارز عادي مثل اي مقلوبة...وبعد ما تنشف المرقة تماما بامكانك ان تقدحي له بالسمنة ان اردت..(انا ما بقدح بقول بيكفي دسم اللحمة خلينا نخفف شوي) بس القدحة بتعطيها منظربيلمع وطعم ادسم واطيب للي بيحبوا الدسم..وزينيها بالصنوبر واللورز المقلي وصحة وعافية على قلب اللي بده ياكل منها...معلش طولت عليكي وزهقتك..بس انا بحب اشرح بالتفصيل الممل احيانا...بلكي الناس اللي بشرحلهم بيكونوا مش منتبهين لشغلات او ما بسوها بنفس الطريقة
وفقنا الله لما يحبه و يرضاه

السلام عليكم
ماعرفت الفول الاخضر شو شكله
نزلوا صوره له بليز
أخواتي العزيزات ،
أشكرك جدا جدا أختي العزيزة soso128، كذلك كل الشكر لكي أختي البسمة العذبة لقد فهمت الطريقة ، لكي كل التحية ، إن شاء الله أجرب المقلوبة في أقرب فرصة، بالنسبة لشكل الفول الأخضر أختي الصمت الأسير فهو على شكل قرون خضراء تشبه قرون البازلاء الخضراء ومن الداخل حبوب الفول شكلها مثل الفول العادي (الفول المدمس) ولكنها خضراء اللون، للأسف لا امتلك سكانر ولا كاميرا ، لكن أرجو أن تكوني قد عرفتي شكله، تحياتي لكي ولكل الأخوات.


الساعة الآن 08:00 .