السلام عليكم ورحمه الله وبركاته

شوي شوي لاتتزاحمون...ترى الدعوه لكم كلكم ياحلوات.......ولاتنهبلون من كثرة الاسئله...فبدل مااضع كل سؤال لوحده جمعتها كلها هنا...........


-- وش استعمالات ماء الورد - وماء الكادي في الطبخ مع الطرق بالتفصيل- مع ذكر النوع اللي تستعملينه ؟؟؟


--هل يصلح استعمل ماء ورد طائفي في الطبخ ؟؟؟

-- طبقه الباشميل عندي ماتتماسك .....لييييش ؟؟

-- كشنه لحم المفروم للسمبوسه اسويها بس ماتطلع مثل حقه المطاعم نكهه ولون وطعم اممم ....لييييش ؟؟ووش البهارات اللي تحطونها معه ؟؟

-- ابي مقادير مضبوطه لطبقه تشيز كيك مع تحديد المقدار بالكوب ؟؟

-- ابي طريقه هذي الانواع من الارز : مظبي - حنيذ - زربياني - مع ذكر طريقه تزيين الدجاج او اللحم- مع ذكر حمسات وكشنات للارز ؟؟؟؟ ؟؟

-- ياكثر ماجربت انواع للايدام بس ماتطلع له نكهه ....ابي طريقه ايدام خضار مشكلمع ذكر افضل انواع البهار له ؟؟؟

-- وش المقبلات اللي تقدمونها مع المكرونه ؟؟؟

-- اللي عندها طرق حلوه للقهوه غير العاديه ياليت تفيدني ؟؟؟؟


ترى بعض الاسئله سالتها اكثر من مره ومااحد عطاني وجه....لييييييش !!!!!
ترى المره هذي اذا مارديتوا علي خلاص ماراح اشارك معكم لاني بصراحه مليييييييت



واللي ترد علي الله يوفقها
ويرزقها باللي تبيه
ويسعدها
ويحقق لها ماتتمناه في الدنيا
هههههههههاه يكفي والا ازييييييد
اكييد بتدخلون علشان هالدعاوي الحلوه



والسلام عليكم ورحمة الله وبركاته
14-08-1425 هـ, 02:13 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
هلا عيوني مستحيل بما أن السالفة فيها دعووة حلوه ولايهمك احاول اجاوبك ,,,,,,,,,,

بالنسبه لماء الكادي انا انقع فيه الزعفران لمايستوي الرز أحطه عليه ,,,,,,,

كشنة السنبوسة كتبوا عنها البنات وهي أفضل وأطعم سنبوسه وهذا الرابط

http://forum.hawaaworld.com/showthre...hreadid=221375

بالنسبة للايدام جربي تخلطين في الخلاط فلفل بارد وماء(صفيهابالمنخل ) صبيها على الايدام قبل لايخلص
لايطول يطبخ يمكن يمرر0
-- اللي عندها طرق حلوه للقهوه غير العاديه ياليت تفيدني ؟؟؟؟(مافهمت)

أدري ردي باهت بس وش اشوي يضيق صدري اذا احد سأل ومالقى جووووووووواب

:24: :24:
14-08-1425 هـ, 03:33 صباحاً
 
السلام عليكم ورحمةالله وبركاته حبيبتي مستحيل راح أقولج على البشاميل أكيد إنت مسويتها مالأول خفيفة عشان جدي ماتتماسك أو ماخلتيها تستوي عالنار عدل أنا راح أعطيج سري من تجربتي وأفكار البنات لإن أكو ناس يحمرون الطحين مع الزبدة عالنار وفيه ناس يخلطوا الكل بالخلاط شوفي يا أختي أفضل طريقة عشان تتماسك وتكون مو متكتلة :

شوفي المقادير قالب زبدة 113 جم له كوب طحين + لتر حليب المراعي وواحدة ماجي 3 م ك جبنة
كاسات كرافت أو أي نوع و م ك نشا وقوطي قشطة قشطة الصافي دانون وايد حلوة لإنها بيضه وايد .
الطريقة: سيحي الزبدة وضيفي عليها الطحين وقلبي الى أن يتغير لون الطحين وبعدين حطي خليط
الطحين مع باقي المقادير في الخلاط وبعدين حطيهم على نار هادية وظلي قلبيهم بمضرب البيض اليدوي
مع ملعقة عشان ما تلزق بقعر القدر والى أن تشوفيها صارت مثل المهلبية أو الكسترد سكري عليها
وبعدين وزعيها علي الصينية بالطريقةالمعتادة وبألف هنا صدقيني أنا حيل شاطرة في الباشميل وهذه
أفضل طريقة وبتكون بيضا مثل مالت المطاعم وجربيها وخبريني حبيتي ومشكورة على مواضيعج الحلوة
14-08-1425 هـ, 08:53 صباحاً
 
العزيزه ( مستحيل )

وعليكم السلم ورحمة الله وبركاته

اسمحى لي اجاوب عن بعض اسئلتك ( يعني اللي اعرفه ! )

ماء الورد : نستعمله في الكويت مع الزعفران لتلوين الرز - لعمل المحلبيه - حلوى العيش

ماء الورد الطائفي : لا يصلح للطبخ ريحته قويه

البشاميل : اعتقد كميه الطحين قليله
14-08-1425 هـ, 09:27 صباحاً
 
يا هلا اختي
شوفي بعد محاولات مريره مع التشيز كيك وصلت لطريقه صار لي سنه ما اغيرها ومضبوطه والاهم تصك تمام بالثلاجه
القاعده كيك شرايح او بسكوت دايجستف او ماري بس لازم يبلل بالحليب او عصير الاناناس
سواء البسكوت او الكيك بعد قص الكيك وصفه اسقيه بالملعقه بعصير اناناس

الطبقه الوسطيه
علبتين قيمر او قشطة نستله اللي وزنها 170 جم
كوب حليب سائل
علبة جبن فيلادلفيا اللي وزنها 300 جم
2 باكيت كريم كرامل
باكت واحد جيلاتين ابو 10 جم
كل هذا بالخلاط يضرب ويصب على القاعده
يدخل الفريزر ساعتين وبعدين حطي الزينه سواء الكرز الاحملر او الاسود اللي ينباع بالجمعيه الجاهز او حتى تحطين فواكه وتصبين عليها جلي او صلصة توفي حسب ما تحبين والمتوفر عندج


اما المقبلات اللي مع المعكرونه
ورق عنب عشان الرز يكون موجود وايضا لو كانت من غير لحم حطي يمها كفته مدوره او اصابع حسب المتوفر وايضا الشيبس او البطاط المشوي


حمسة اللحم للسمبوسه
اهم شي قبل الطبخ تحطين اللحم على المقلاة وتخلينها تنزل مايها وتنشف بعدها اضيفي البصل المفروم مع الثوم والبهارات ولا تنسين رشة قرفه اتركيها على نار هاديه 10 دق تتسبك واخيرا قبل لا ترفعينها من على النار اضيفي لها كزبره خضرا مفرومه وقلبيها معاها شوي ورفعيها(مكعب ماجي-بصله كبيره مفرومه-4 فصوص ثوم مفرومه-نص كيلو لحم- شوي كركم وبهارات مشكله وفلفل اسود -نص حزمة كزبره خضراء)


مشخول بطاط
2 بصله كبيره مقطعه جوانح رفيعه
حبة طماطم مقطعه شرايح
فصين ثوم مفرومين
ملعقه كبيره صلصة طماطم
2 حبة بطاطس مقطعه دواير ومنصفه
ملعقه صغيره بهار غرام ماسالا (افضل البهارات الهنديه) وشوي كركم وملح
حبة فلفل اخضر شرايح
سمن وزيت
كوب ونص رز مسلوق نصف سلق
ملح فلفل اسود
الافضل استعمال جدر تيفال غير لاصق
ضعي ملعقه كبيره سمن واخرى زيت حمري البصل جيدا حتى يذبل اضيفي البطاطس وقلبيها جيدا اضيفي البهارات والثوم والصلصه قلبي لغاية ما تحسي تنشف دقيقتين بس اضيفي الفلفل الاخضر والملح والطماط
ضعي الرز المسلوق عليها صبي قليل من ماء سلق الرز عليها اتركيها نصف ساعه تنطبخ على نار هاديه جدا سكري الغاز واتركيها 10 دقايق ترتاح ثم اقلبيها في صحن مدور وادعيلي

تقدم مع دجاج مشوي وسلطه خضراء
14-08-1425 هـ, 10:05 صباحاً
 


الساعة الآن 11:02 .