يابنات ابغى طريقة حلوة ومضمونة للرز البخاري مرة ذقته عند وحدة طعمه يجنن والشي الوحيد اللي عرفته منها صدفة انها حطت راس ثوم كامل وماكان فيه وقت يسمح اني آخذ الوصفة منها

الله يسعدكم ابغى طريقة مضمونة وواضحة انا بانتظاركم
10-05-1431 هـ, 09:04 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
انا بخارية و باعطيكي طريقتنا ان شاء الله تعجبك

ما قلتيلي لحم ولا دجاج ؟؟
10-05-1431 هـ, 10:10 صباحاً
 
بسم الله الرحمن الرحيم

اول شي

جهزي الجزر قطعيه عيدان رفيعة زي اعواد الكبريت يعني اول شي وربات رفيعة و بعدين شرحيها عيدان تقريبا جزرتين كبار

قطعي الدجاج 8 اجزاء تقريبا دجاجة و حطي في قدر كبير زيت تقريبا كاسة و نص و اقلي الدجاج في الزيت بس ياخذ تحميرة سريعة و ملحيه خفيف و شيليه على جنب برا الزيت

قللي الزيت خلي في القدر قليل يعني نص الكمية تقريبا و كشني في الزيت بصلة وسط مفرومة الين يذبل و بعدين تحطي تقريبا راس ثوم مدقوق و يادوب ياخذ تشويحتين و حطي الجزر المقطع و نص ملعقة كمون بحباته و علبة طماطم مقشرة الطائي او حبتين طماطم مفرومة +ملعقة صلصة +حبتين ماجي+شوية فلفل اسود مطحون+ الدجاج و تقوي النار عليه الين يغلي و زيديه موية مغليه الين يغطيه و اتركيه على نار هاااااااااااااااادئة الين يستوي الدجاج

تكوني مغسلة الرز (تقريبا كاستين كبار)و ناقعته استخدمي اما رز بوندي او الشعلان فقطططط و حطي الرز فوق الخلطة و حاولي تخلي الدجاج فوق الرز عشان لا يتلدع و شوفي كمية الموية مناسبة و اكمري القدر بمنشفة مبلولة و اتركيه نص ساعة الين يستوي


في حال استخدام اللحم نفس الطريقة و لكن لا تضيفي الجزر من البداية اول شي خلي اللحم يستوي و يتسبك مع الطماطم و لما تحسي انه ثلاثة ارباع استواء حطي الجزر
و خليه كمان ربع ساعة و بعدين اضيفي الرز

لا تنسي تزينيه باللوز و الزبيب ان حبيتي و بالعافية



وان شاء الله يعجبك

و دعواتك لي بالخير و ان ربي يرزقني ذرية صالحة عاجلا غير آجل
10-05-1431 هـ, 10:25 صباحاً
 
dodi_dabdobi

الله يسعدك ياشيخة ويجبر بخاطرك وان شاء الله راح اسويه اليوم غداء ويارب انه ينزبط زي ماأبغى

ويارب يرزقك بالذرية الصالحة هذا الشهر
10-05-1431 هـ, 11:07 صباحاً
 
بعد اذن صاحبة الموضوع كنت حابة اسأل dodi_dabdoobi
ماراح يكون الزيت كثير مره يعني ممكن اقلل الزيت او في طريقة من غير زيت
10-05-1431 هـ, 11:37 صباحاً
 


الساعة الآن 06:57 .