السلام عليكم

كيف حالكم بنات منتدانا والزوار الكرام خخخخخ

هادي أول مره نشارك بموضوع في ركن الطبخ وإن شاء الله يعجبكم

بسم الله أبدأ

إسم الأكله كلمار محشي ليبي على طريقه أمي الحبيبه الله يحفضها لي ولإخوتي ويطول عمرهابصحه وعافيه وعلى طاعه ويشفيها يارب .......... قولو آمين

هالأكله نزلتها لكم بعد طلب من أمي الحبيبه تبيكم تجربوا وتسأل الأجر من الله فلا تنسوها من صالح الدعاء بظهر الغيب ولكم بالمثل يا سموحات


ونزلتها في منتديات تانيه وهادي لعيونكم

أولا المقادير ( تقريبيه وعينكم ميزانكم ) :
قطع كلمار ممكن 8 تكفي لهالحشوه أو أكثر حسب حجمه ..... شوية جمبري منظف ومفروم لو ممكن ولو مش موجود مش مشكله .

4 ربطات معدنوس .. 1 ربطه حبق .. 1 ربطه شبت .. 2 ربطه كسبر .. ربطه صغيره ثوم أخضر يعني بأوراقه " حوالي 6 رؤس ثوم بأوراقه " ولو ما توفرش استخدمو بدله 4 رؤس كرات بأوراقه مفروم ناعم ...... وكل الخضره اللي ذكرتها تنغسل وتتوازى" تتنقى " وتنفرم ناعم

1.5 طاسه ونص "كوب كبير " رز " نستخدمو في الرز المكركب حبه قصيره وإنتوا إستخدمو الموجود عندكم " حبتين بطاطا متوسطات مقطعات مكعبات صغيره

التوابل : 3 م ك معجون طماطم .. م ك فلفل أحمر حارأو أقل للي ما يحبش الحار .. نص م ص بزار " كركم" .. ثلث طاسه "كوب"زيت نباتي أو زيتون .. نص م ص كسبر جاف مرحي " حلو الكسبر في الحوت يا بنات "السمك" ".؟ نص م ك ملح أو حسب الكميه .
للي بيضيف فلفل أبيض أو أي بهار يتناسب مع السمك مش مشكله بس شوي شوي

واللي تحب تقلل م طماطم معجون وتزيد 4 حبات طماطم أخضر عادي براحتها

10 فصوص ثومه مدقوقه أو معصوره ( ما تقولوش هلبا "كثير " روعه طعم الثوم مع السمك و بهالأكله مش حايكون مبين أبدا ) ونضيفوا عليهم .. م ص فلفل أسود ... نص م ك كمون حوت "سمك" ونهرسهم مع بعض ونخلوهم علي جنب ..
الطريقه :
نظفوا الكلمار كويس كويس من القشره البنيه اللي عليه وفيه زي المثلثات من الجوانب نفصلوهم عليه ونخلوهم على جنب لأننا حانفرموهم في الحشوه وأيضا السوالف الطويله اللي فيه لو حبيتو تنظفوها وتفرموها فيه مش مشكله بس تنظيفها متعب ..
وهادي صورته بعد تنظيفه:



Uploaded with ImageShack.us

نغسل الخضره ونفرمها ونفرم معاها الثوم الأخضر أو الكرات بعد غسله ونحطوهم في صونيه " طبق كبير شوي "
نغسل الرز ونصفيه لحد ما يجف بعدين نحطه على الخضره
نحط التوابل كلها عليها والزيت ونحركهم كويس

الثوم المدقوق مع الفلفل الأسود و الكمون نحطوه على زوائد الكلمار المفرومه مع الجمبري المفروم وهالخطوه نسيت ما صورتهاش اعذروني ...

ونخليهم يتبلو شويه وبعدين نحطوهم على الخضره والرز وهذا شكلهم بعد الخلط




بعدها نحشي الكلمار بالحشوه بس مش لا النهايه نخلي مكان للرز يزيد حجمه وهذا شكله


بعد الحشي نستفوه في الكسكاس ونبوخوه على ميه تغلي ونغطوه لحد ما يطيب "يستوي" ما ياخدش وقت ممكن 40 دقيقه أو أكثر شوي وأول ما يطيب الرز يكون طاب وهذا شكله النهائي


وهذا من زاويه تانيه وطعمه يم يم اممممممم




ياريت تجربوه ويسعدني تحطوا تطبيقكم

اللي قريتوا إذا عجبكم موضوعي اسعدوني بردودكم


واللي بتنقل الموضوع مافيش مشكله بس مع ذكر المصدر و طلب الدعاء بظهر الغيب لأمي الغاليه ..أمانه..
17-05-1431 هـ, 12:44 صباحاً
 

5.00

عدد التقييمات: 1
5
100%
4
3
2
1
ماشاء الله
يارب يحفظ الك والداتك والي والداتي
واطفالي وزوجي والدي جداني واخواني واخواتي وجميع احبابي

لاحول ولاقوة الا بالله
استغفر الله العظيم
17-05-1431 هـ, 01:08 صباحاً
 
ما شاء الله
رووووعه
17-05-1431 هـ, 01:14 صباحاً
 
تسلم ايدين اللي عملها
بصراحه شكله يشهيي
مع اني ماعمري ذقت المحار
دائما احاول اشتريه واصلح الاطباق اللي اشوفها بالمنتدى بس شي يمنعني
مدري احس يقزز الله يكرم النعمه
بس **** الله بحاول اشتريه واعمل نفس طريقتك
17-05-1431 هـ, 01:15 صباحاً
 
بارك الله فيكم

نورتو موضوعي الله يسعدكم

أختي توكه : هذا إسمه كلمار يشبه السيبيا لو تعرفيها
17-05-1431 هـ, 01:49 صباحاً
 


الساعة الآن 04:05 .