تفضلي:

المجمعات :

مجمع الصالحيه فيه ماركات و غالي حبتين : لوي فيتون و شانيل و ايجنر و جيفنشي / محلات للأحذيه مثل ستيفاني و الحذاء الاحمر
( المجمع يكون تحت فندق الميرديان)

مجمع الراية فيه محلات راقيه و ماركات مثل سيلين


مجمع الاوقاف : متخصص بالدراريع

مجمع المثنى يكون مقابل فندق الميريديان و فيه محلات كثيييرة و محلات الاحذيه و محل للملافع

سوق الاقمشه : او البلوكات فيه محلات اقمشه بس و في محل : مركز التراث الهندي عنده شغلات روووعه و دراريع هنديه و محل ميسور نفس الشي
( المجمعات السابق ذكرها موجوده في منطقه واحده تسمى بالديره او المرقاب)

#######################

مجمع المهلب في حولي : فيه محلات ملابس حلوووه مثل : لحظه من فضلك تحت بالسرداب / و محل يكون بجانب محل لإكسسوارات الشعر ما يحضرني اسمه للأسف بس راقي جدا / محل لانجري في الدور الثاني و شوي اسعاره غاليه مقارنة مع الباقي / ومحلين بالسرداب ( انور / الطاهر و لهم افرع كثيرة بالكويت )

مجمع النقرة الشمالي و الجنوبي : في محلات لانجري ( الطاهر / انور ) و ملابس ناعمه و احذيه ومجوهرات

مجمع سنام : مجمع جديد و قريب من المجمع السابق يعني عبور شارع فقط فيه ملابس

مجمع بيروت : فيه محلات للملابس ناعمه و محل لانجري و محلين او 3 للسهره

مجمع الايوب : اشهر مجمع في الكويت يبيع لانجري و اسعارهم زيييينه و في كذا محل بالدور الثاني عنده دراريع و احذيه و ملابس ناعمه

مجمع بلازا حولي و يكون قريب من باب المجمع السابق : فيه محلات ناعمه للملابس و محل للأحذيه روووعه و جديد عباره عن فرع لمحل في دبي اسمه ( برتي فيت) احذيته بناتيه و عصريه و مريييييحه عن تجربه و اسعاره تقريبا 15 دينار و اقل

و مقابل هذا المجمع في مجمع ما يحضرني اسمه عنده محل يبيع ادوات مكياج لماركه شارمل و يمدحون كريم الاساس عندهم كثييير

مجمع العثمان : فيه لانجري و ملابس و احذيه مثل محل ستبس

( المجمعات السابق ذكرها في منطقه حولي )

###########################

ندخل السالميه الحين و راح اعطيج المعلومات بترتيب المجمعات

مجمع الثريا : فيه ماركات ملابس : موسكينو / ايجنر / جيفنشي / الاسطورة / ومحل مجوهرات : الجوهرة للمجوهرات

مجمع الوطنيه : فيه محلات ملابس و لانجري ( بس مو متأكده بالضبط )
مجمع قريب منه فيه محل الغوالي و ملابسه ثقيله و راقيه و في محل السرداب حلوو

مجمع زهرة : احلى الملابس فيه و راقي و اشهر محل الاسطورة و الفاتنه و فيه محلات احذيه فوق : الحذاء المريح وانصحج بهذا المحل لأنه ممتاز

مجمع الفنار : فيه غوتشي / داماس للمجوهرات / احذيه : الحذاء الاحمر / ميلانو / ستبس
لورا آشلي / و محلات كثيرة للملابس
و للمكياج انصحج بمحل ماك

مجمع البستان : فيه محل لاكروا للملابس راااااااااااقي و حلووووووووووو ( غاالي)
ماركه بيربري / للماكياج ( ميك اب فور افر) / فيه محلات احذيه واايد و عندج بالسرداب محل اسمه برنسيس و اسعاره تبدي من دينار ونص بس

مجمع ليلى جاليري : اغلبيه المجمع مجوهرات و ألماس و فيه محلات لملابس السهرة و ملابس ناعمه

مجمع تالا : ملابس و احذيه ( المجمع صغير و محلاته قليله )

مجمع مريم : فيه محليين روووووعه (1) راف راف و له فرعين واحد للسهره و الثاني ملابس ناعمه ورااقيه جدا
(2) محل العثمان بالسرداب روووعه وانا ما اشتري إلا منه حق العيد و رمضان و على فكره امس اتصلت علي التونسيه و قالت لي ان عندهم ماركة راح يصفونها لأنهم بطلوا يجيبون منها و الاسعار بتكون من 19 دينار إلى 90 دينار و تصلح على حسب كلامها للبنوتات الحلوين ( مثلي و مثلج)
و في بعد محل GUSSE

مجمع جاليريا 2000 : فيه محلات ملابس و محل للمصممه عواطف الحاي ( دراريع و سهره)

مجمع بلازا السالميه : فيه ملابس و ساعات محلين روعه للساعات واحد على اليمين و الثاني يسار (روائع جنيف و الثاني ما يحضرني اسمه )

( المجمعات السابق ذكرها في شارع واحد فقط و يكونون يمين و يسار و انا كتبتهم لج بالترتيب

##################

فيلا مودا في منطقة الشويخ و قريب من جامعة الكويت و ميناء الشويخ : ماركات و كشخه و عوااااااار قلب و غاااالي فيه: غوتشي و برادا و ماركات كثيرة ...

######################

سوق شرق : فيه محلات كثييييرة سواء ملابس او احذيه و فيه محل دبنهامز و ماركه شارل جوردان للأحذيه و الجناط و عمليه هذي الماركه و تحصلينها قريبه من محل زارا ZARA

مقابل سوق شرق يوجد مستشفى الاميري و قريب منه : معارض
بيت ديفا
كاريزما
بيت سدرة و يعرضون دراريع ملابس و اواني و مجوهرات و غالبيه المعارض لبنات كويتيات
########################

مارينا مول : اشهر مجمع بالكويت و يكون على البحر وفيه ماركه ESCADA و محلات كثييييييييييرة احذيه و ملابس و لانجري

و قريب منه معرض بيت لوذان و يعرضون فيه دراريع و ملابس لبنات كويتيات



نرجع لمنطقة السالميه لكن بشكل ثاني :

خلف مجمع مارينا مول هناك مجمع ماركس سبنسر و مقابله مكان نسميه بالكويت ( الحوش ) فيه احذيه و جناط

امتداد هذا الشارع يعني خلي مارينا مول على يمينج و الحوش على يسارج فيه اشارة مرور وبعدها كملي سييده ( إلى الامام) شارع نسميه السالميه القديمه و طوييييييييييييل جدا
في محلات كثيييييييييرة : نكست / الجناح الاخضر و عنده ملابس ناعمه / ليز كليبرون / ميلانو ..... الخ
نهاية الشارع مجمع اسمه العنجري ( اعتقد هذا الي تقصدينه فيه محلات احذيه وجناط واايد) و يكون قريب من مركز مطافي السالميه
و فيه قريب منه محل ألمى للملابس و عنده شغلات ناعمه و نفس الشي محل الزان و ستيفاني

#####################

سوق السالميه مجمع كبير فيه مطاعم و محلات ملابس و احذيه و يكون قريب من دوار الجوازات
فيه داخل المجمع سوق المعلم و رخيييص كثير

####################

بالنسبة للدراريع و العبي و الملافع :

احسن مكان لهم منطقة الفروانيه و خاصه :
مجمع العربيد الخاص الدراريع و يكون قريب من جمعية الفروانيه و مطعم قيصر
هذا المجمع حبوبه خاص بالدراريع فقط و ما عندهم شي جاهز لازم تفصيل و ياخذ اسبوع و يصير تطلبين مستعجل و انصحج فيه لأن عندهم دراريع حلوه و بما انج من السعوديه يعني ما تحصلين احد لابس مثلج ( الممثله الهام الفضاله دراريعها من هناك )
ممكن تحصلي عندهم البنجابيات بس راقيه و عليها تطاريز حلوه

مجمع العربيد الخاص بالعبي و الملافع و هو قريب من المجمع السابق تقريبا شارع واحد وفيه محلات كثيرة مثل الحلوة و المشعل و بدون اسم ....... الخ

مجمع الحمرا مول : ما احط بذمتي و اتكلم عنه لكن البنات ان شاء الله يفيدونج لأن ما دخلته بس يقولون عندهم شغلات

مجمع مبارك الصيفي

( المجمعات السابق ذكرها في منطقة الفروانيه )

#####################

منطقة الفحيحيل : بعيده عن الديرة نص ساعه تقريبا فيها :
مجمع كويت ماجيك : فيه محلات لانجري مثل نعومي و كذا محل للملابس ناعمين / محل بيضون للمكياج انصحج فيه

مجمع أجيال : احدث مجمع هناك بس ما شفته

####################

الاسواق الشعبيه
منطقه حولي : سوق المعلم / الشاويش
تحصلين عندهم ملابس و لانجري خصوصا ( سوق المعلم )/ بيجامات ابتداء من دينار و نص

####################

بالنسبه للمجوهرات :
في مجمع الاوقاف السابق ذكره محل الاربش للمجوهرات و لهم فرع بمجمع الفنار
له فرعين (1) محل ألماس بلجيكي
(2) محل ألماس سويسري و اسعاره ارخص من السابق و نفس الموديلات بس النقاوة اقل لكن و الله ما يبين
يعني الطقم ( حلق و خاتم و سلسله معاها تعليقه يطلع 140 دينار) و على فكرة نفس موديلات البلجيكي

محل الفراوله للمجوهرات التقليد وموجود بالاوقاف و مجمع زهرة السابق ذكره ...

مجمع ليلى جاليري السابق ذكره في محلات مجوهرات و ألماس بالتحديد : محل لاماركيز / الرومي / المشعان ... الخ


مجمع النقرة الشمالي السابق ذكره : محل المبرقعه ( ألماس و ذهب ) / محل المشعان

سوق الذهب بالديره ( يعني قريب من مجمع الراية تقريبا و بنفس مكان سوق المباركيه ): عندهم ذهب و ألماس و مجوهرات تقليد و اصلي مستعمل و كل الي بخاطرج

مجمع الفنار فيه اكثر من محل للمجوهرات

####################
بالنسبة للعطورات :
الشايع للعطورات و هذا تلاقينه في كل مكان تقريبا : مجمع الفنار / سوق شرق / الجمعيات ( الروضة / الشاميه / القادسية)

النعمه للعطورات و البخور : جمعية الضاحيه التعاونيه ( منطقة الضاحيه )

المرشود للبخور والعود : بسوق المباركيه

مجمع المثنى : فيه اكثر من محل للعود و البخور و العطورات

######################

الفنادق
شقق فندقية :
رويال سويت في منطقة بنيد القار و يطل على البحر

فندق البحرين
مها هاوس

فنادق عالميه :
الشيراتون / الميريديان (فوق مجمع الصالحيه) / كراون بلازا ( فوق مجمع المثنى ) / كويت ريجنسي ( في منطقة البدع و يطل على البحر مباشرة و فيه شاليهات ) / راديسون ساس ( قريب من الفندق السابق و نفس النظام )
كويت كونتيننتال في منطقة بنيد القار
فندق الهوليدي ان في منطقة الفروانيه
فندق كويت بلازا

( ارقامهم اعطيج اياهم على الخاص )

#######################

حبوبه هذا الي يحضرني و الكويت و بناتها تحت امرج
و ياليت تبلغيني على الخاص متى موعد وصولكم عشان اشوف لج شنو عندنا معارض بالكويت
و اي خدمه انا حاضرة و حياكم الله


اللستة منقولة من الاغت عود مبخر **** يجزاها خير


الساعة الآن 08:43 .