وجه الخصوص لمن تدير منزلها بدون وجود الخادمه وعموم لكل ربه منزل لديها خادمه ردوا علي

اختي الغالية النهر الصافي انا ام لثلاثة اطفال والحمد لله ليس لدي خادمة لاني بالغربة وصدقيني مافي احلى من عدم وجود احد معك في البيت ينكد عليك ويشوفك في الداخلة والطالعة وحتى لبس ماتاخذين راحتك لو تسفرينها يكون احسن وصدقيني مابتندمين الحمد لله كلكم شخصين وطفل صغير وانتي بصحتك وعافيتك ليه الخدامه اصح منك لا وحتى علاقتك بصغيرك بتكون اقوى واعمق والله يكتب لك الي فيه الخير

أختي النهر الصافي ....
أنا أم لطفله واحده وماعندي شغاله وأحس إن مافيه وقت عندي كي أهتم بنفسي وشكلي أمام زوجي
حتىماعندي وقت إني أقضي انا وهو وقت لوحدنا .......وما أنتهي من شغل البيت إلا وحيلي مهدود معادلي
نفس أجلس معاه ونسولف أونسهرأونخرج برا البيت وهو رافض فكرة الخادمه وما عندنا إلا بنت وحده
وأنا أدعي ربي ليل ونهار إني أحمل وبتوأم كمان عشان يحن علي ويجيبي لي شغاله......
إحمدي ربي ولا ترفسين النعمه والله لتتورطين إذا راحت وتحوسين وتختبصين .إستخيري ربي وشوفي
وين الخيره.........وسلاااااااااااااااااام

أنا جربت الحالتين ..
لما كنت بالغربة .. ما كان عندي خادمة . وعندي 3 أطفال والأوضاع ماشي حالها بالذات اني متحكمة في اولادي..
أنومهم بدري ومعلمتهم يعتمدو على نفسهم في بعض الأشياء ..
أما الآن انا ساكنه في نفس البلد مع اهلي واهل زوجي ..
والإلتزامات كثرت وعندي أربعة الله يحميهم . جبت شغاله من نفس البلد (مؤقته) تروح بيتها أربعاء وخميس وجمعة
ومالها دخل في أولادي (الغيرة تاكلني)
ومالها دخل في الطبخ
يدوب التنظيف الروتيني في الصباح ..والغسيل والكوي شاغل كل وقتها
والحمدلله انها تتغطى عن زوجي(لأني غيورة مررررررررره)
يعني المفروض انتي تتحكمي بالشغاله حسب احتياجك وتخليها سبب في راحتك وليس في تعاستك ..

أنا جربت الشغالة.. وجربت بدونها.. وأنا عندي بنتين.. خليني أقولك على تجربتي:

شوفي حبيتي كل شي له سلبياته وإيجابياته..
يعني مع الشغالة.. صراحة كنت مرتاحة جسدياً أكثر.. ايديني أنعم.. رجولي أنعم.. شكلي أحلى ومهتمة بنفسي..:27:
لكن في المقابل نفسية زوجي كانت شوي تعبانة بسبب الخدامة يعني كان متضايق من وجودها ويحس أنها تحسب علينا أنفاسنا.. طلعته ودخلته من الغرفة محسوبة.. أيضاً أنا ما أقدر ألبس أي شي داخل البيت..

وكنت معتمدة عليها في بعض الأمور والآن تندمت.. يعني كنت معتمدة عليها في ترتيب دواليب المطبخ وغيره.. وبعد ما راحت اكتشفت أني المفروض ما أعتمد عليها لأن لقيت الدنيا محيوسة تماماً.. حتى دواليب ملابس بناتي لما دققت لقيتها في فوضى.. وفي ملابس كثيرة خربتهم ما تعرف تغسلهم مثل الصوف والفرو.. وصحون غالية كثيرة كسرتها..

وبعدين تخافين تتركين غرفتك مفتوحة قدامها.. تخافين تتركين ذهبك في أي مكان.. أو حتى على بناتك.. تخافين تشوف ملابسك الداخلية وقمصان النوم..

تخافين تتركينها مع عيالك مدة طويلة في الليل.. ما تدرين شتسوي فيهم؟ وأنا كرهت سوالف الخدم من كثر ما سمعت من بلاوي من الناس وفي منتدى المشاكل الاجتماعية..
ولو أخذتيها معك لأي مكان كتمت أنفاسك.. سواء سوق أو مطعم أو حديقة.. ماتقدرين حتى تضحكين مع زوجك قدامها..

يعني باختصار.. قلق متواصل وضيق وتحسين أنك محبوسة داخل بيتك.. لكن راحة جسمية..

أما الآن بعد ذهابها..
فبصراحة أحس أني راضية عن نفسي أكثر.. وحاسة بالراحة والطمأنينة والثقة.. والحرييييييييييييييييييييييييييييية..
وما ني خايفة على عيالي مثل أول.. يعني.. مرتاحة نفسياً.. بيتي مسيطرة عليه.. بناتي والله صاروا أنظف وأرتب من أول.. بيتي ما أكذب وأقولك صار أنظف لكن صرت أهتم به أكثر وكأنه توه يصير بيتي.. صرت أشتري له تحف وخرابيط وأهتم بتفاصيله.. ما أدري ليش سبحان الله..
حتى أطفالي صاروا يعتمدون على نفسهم أكثر بترتيب غرفتهم وغيره..

لكن الضريبة هي أني ما صرت أقدر أروح أي مكان مع أطفالي.. لكن لما فكرت لقيت أني حتى أول ما كنت أرضى أروح وأخليهم مدة طويلة عند الشغالة..
الضريبة الثانية هي ان اهتمامي بشكلي وغرفتي قل.. لأني صرت أقضي وقت أكثر بالتنظيف والترتيب وغيره مما ينهك جسمي.. وصرت عصبية شوي وما عندي مشاعر رومانسية زي أول.. لأني دايم حاملة هم اللي ما تنظف واللي يبي له ترتيب وهكذا.. لكن الحمد لله حياتي ماشية وسعيدة وزوجي مرتاح أكثر من أول ويكره سيرة الخدم..

على فكرة أنا ساعدت نفسي طبعاً بغسالة أتوماتيك وصحون البلاستيك وهكذا.. لكن المشكلة الأزلية موجودة..
وأنا أنتظر أن عيالي يكبرون شوي بإذن الله علشان أقدر أرتاح وأتنفس شوي.. والله يعين..

شكرا لكل من قامت بالرد على الموضوع الذي لايزال يؤرقني

Dream22 الاخت

ماشاءالله وبارك الله فيك وشكرا على ردك لي ربي يهديني للأصلح لحياتي ويتم نعمته علينا اميين:

الاخت لمو العسل
الله يكون بعونك ان شاءالله من خلال كلامك فهمت ان بنتك صغيره عمرها اشهر.لأن هذا العمر يتعب اما لو كانت سنه وفوق التعب يخف من جذي انا افكر استغني عن الخدامه لأن ولدي لما كان عمره اشهر كان يتعبني وقت الليل وهذا وانا عندي خدامه لكن الحين بما ان ولدي كمل السنه وتعدلت نومته باليل فصار اليوم ماشي تمام من جذي افكر استغني عنها وانظم وقتي لكن كما قلت لااعرف قدرتي وقتها هل اوفق بين كل هذا ام لا.شكرا على ردك اختي

الاخت ريم الروم
طريقتك حلوه وعجبتني خاصه انها على الاربعا والخميس والجمعه تروح لأهلها تاخذين فيها انتي راحه لك:) وانها تتغطى عن زوجك هذا الشي حلو .و شكرا اختي على ردك.

الاخت رسيل
اوافق الكلام وكأنني اتحدث عن نفسي عندما قرأت ردك لكن الفرق هو اني لم اجرب بعد وان زوجي لايهمه وجود الخادمه او عدم وجودها وان هذا الشي راجع على حسب قوله.شكرا اختي على الرد


اتمنى من باقي جميع الاخوات الرد بتجاربهم لاتعلمون انكم تساعدونني كثيرا بأن افهم نفسي وقدرتي لاتبخلوا علي ودمتم :24: :27: