بطاقة تعريف ب ( muslima627 )


الاسم الحركي :
مسلمه أو ممس
السن :31
متجوزة من كام سنة :9 سنوات ونصف
سبب تأخر الحمل : ولله الحمد الأسباب كتير ومتعدده كل طبيب كان ليه رأيه وأسبابه ولكن كلها تم علاجها والحمد لله (ضعف هرمون التبويض - تكيسات على المبايض - إلتهابات - إلتصاق بالأنبوب اليمين - ضيق في عنق الرحم - وجود أجسام مضاده في عنق الرحم - وغيره....... )
حصل حمل قبل كدة و لا لأ : ولله الحمد ربنا من علي ورزقني بجنة
بدأتي تهتمي بموضوع الحمل بعد كام سنة جواز : بعد شهرين زواج
روحتي لكام دكتور : هههههه تقريبا على ما أتذكر 16 طبيب ( نساء وولاده - علاج طبيعي - حجامه )
الدكتور اللي متابعة معاه دلوقتي : أنا مش متابعه حاليا مع حد من بعد ولادتي
متابعة معاه من اد ايه : ............
التحاليل الطبية اللي عملتيها : كتير جدا وطبعا نسبها كانت بتختلف من تحليل للتاني ومع طول المده فمش هعرف أقول نسبها
نسبة ال fsh
:
نسبة ال LH :

نسبة ال Prolactine :
نسبة ال Broujesteron :
اي نسب تانية زي الغدة الدرقية او هورمون الذكورة مثلا :
ايه الادوية اللي بتاخديها : حاليا بالتأكيد مبخدش
استمريتي عليها اد ايه : والله أنا أخدت علاج كتير جدا وكل نظام كنت بستمر عليه فتره طويله جدا أقل فتره كانت بتبقى سنه
هل كان ليها اعراض معينة مميزة او لا : طبعا كل علاج ليه أعراضه لكن علشان خاطر البيبي كان عندي إستعداد أتحمل أي شيء
عملتي تلقيح او حقن مجهري قبل كدة : أيوه أطفال انابيب وحقن مجهري
كام مرة : عملت ثلاثه، عمليتين أطفال أنابيب وعملية حقن مجهري وهيه ده اللي ربنا رزقني منها بجنة
في اي مركز : أول إتنين في مركز الدكتور أبو الغار اللي هو المركز المصري والعمليه الثالثه في مركز جنين عند الدكتور حسام زكي
مين الدكتور اللي تابع العملية : العمليه الأخيره الدكتور حسام والدكتور المساعد ليه الدكتور هاني
رأيك في المركز : أولا :مركز الدكتور أبو الغار
مميزاته (يمكن التواصل معاهم عبر الإنترنت - منظمين - تكاليف العمليه مقبوله)
عيوبه (زحمه جداااااااا - مشفتش الدكتور أبو الغار إلا يوم العمليه -غير مطلعين على الحديث في الطب - عدم وجود غرفه مستقله لكل حاله في أيام العمليات )
ثانيا : مركز جنين
مميزاته (منظمين جدا - وجود منسقات يمكن التحدث معهم بإستفاضه - متابعتهم لكل حاله بإهتمام وبالهاتف - نظافة المركز ووجود غرف مستقله لكل حاله - مقابله الدكتور حسام بنفسه والكلام معه بكل حريه - إطلاعه الدائم على كل جديد في الطب)
عيوبه (عدم إمكانية التواصل عبر الإنترنت - زحمه جداااااا وطول مدة الإنتظار - إرتفاع تكلفة العمليه )


في اعترافات تانية عاوزة تضيفيها قبل ما نقفل المحضر :
طبعا أنا ولله الحمد ربنا من عليه بجنة وكلام من قلبي ليكم كلكم أنا عملت حاجات كتير علشان أحمل وحابه أقولكم عليها علشان تستفيدو منها بإذن الله
1- التوكل على الله حق التوكل وتسليم الأمر كله لله
2- الرضا التام بكل حاجه ربنا يعملها
3- الأخذ بكل الأسباب المتاحه طبيه وغير طبيه لحد أخر نفس في عمري بدون زهق أو ملل
4- متوقفيش حياتك وتضيعي عمرك علشان مستنيه البيبي بالعكس إستغلي الفتره ده في إفادة المسلمين ونفسك أنا عن نفسي بدأت في حفظ القرآن وتحفيظه للأطفال
5- الدعاء ثم الدعاء ثم الدعاء (الدعاء نصف العباده )
6- الإستغفار المستمر والصلاه على النبي عليه الصلاة والسلام بنية إن ربنا يهب لي الذريه الصالحه
7- الصدقه وياريتها تكون مستمره أو تبحثي عن أسره أو شخص في ضائقه وتفكي كربه بهذه النيه
8- الدعاء لكل اللي زيي إن ربنا يرزقهم بالذريه الصالحه
9- صلاة أربع ركعات ليللا بنية قيام الليل وقضاء الحاجه
10- وأخيرا التعلم والإطلاع والقرائه عن تفاصيل حالتك وعدم الجهل بها

ويارب يارب يارب إرزق كل أخواتي في هذا الملف بالذريه الصالحه اللي يتمونها واللي نفسهم فيها وهبها لهم كما يتمونها وإعطيهم إياها حتى ترضيهم يارب العالمين ياربنا يارحيم يارب إنك على كل شيء قدير

بطاقة تعريف ب ( اشتقت اليك)



الاسم الحركي : شوشو
السن : 28
متجوزة من كام سنة : 5 سنوات و نصف
سبب تأخر الحمل : تأخر الحمل فى الطفل الثانى....والسبب تكيس مبايض
حصل حمل قبل كدة و لا لأ : 3 مرات و لله الحمد...ربنا اكرمنى بأنس عمره 4 سنوات و نصف(يا رب يحفظه من كل شر)...وحصل تانى حمل و انتهى بإجهاض...وحاليا أكرمنى رب العالمين بالحمل .
بدأتي تهتمي بموضوع الحمل بعد كام سنة جواز : بعد أربع شهور من إزالة المانع
روحتي لكام دكتور : 3
الدكتور اللي متابعة معاه دلوقتي : د. عادل فاروق البيجاوي
متابعة معاه من اد ايه : سنه
التحاليل الطبية اللي عملتيها : أشعة الصبغة بالإضافة للتحاليل التالية
نسبة ال FSH:
اول مرة 4.9 - تانى مرة بعد سنه 6.2
نسبة ال LH :
اول مرة 8.9 - تانى مرة 8.8
نسبة ال Prolactine :
كان عالى بسبب التكيس و كل ما ينزل يطلع تانى..لذلك استمريت على دواء لتثبيته حتى حدث الحمل ( مره 18 - 36 - 3 - 18 -34 )
نسبة Progesterone:
6.7 و بعد العلاج 18.5 ثم 22
اي نسب تانية زي الغدة الدرقية او هرمون الذكورة مثلا : سليمة و الحمد لله
ايه الادوية اللي بتاخديها : سيدوفاج 850 مرتين - دوستينكس ثم بارلوديل + أهم خطوة و هى فقد كل الوزن الزائد (سبب المشكلة الأساسى) ثم تنشيط للتبويض عن طريق كلوميد و حقن لمدة 3 شهور
استمريتي عليها اد ايه : 9 شهور
هل كان ليها اعراض معينة مميزة او لا : غثيان و تعب فى المعدة لكنها بتزول بعد أسبوع او اتنين من الاستمرار عليها
عملتي تلقيح او حقن مجهري قبل كدة : لا
كام مرة :
في اي مركز :
مين الدكتور اللي تابع العملية :
رأيك في المركز :




في اعترافات تانية عاوزة تضيفيها قبل ما نقفل المحضر :
أولا...انا مؤمنه إننا لازم نسعى للحصول على أي شئ عايزينه طبعا بعد التوكل على الله و الإيمان ان كل شئ بأمره....و مش بس نسعى..لأ لازم نسعى السعى الصح...و نحاول نقرأ و نثقف نفسنا علشان نميز بين الصح و الغلط....و كمان منفرحش بالطبيب اللى بيقولنا كله كويس و كله تمام.....لازم نحدد المشكله علشان نمشى وراها....ونستفيد من تجارب الآخرين....لكن فى حدود ان يؤكدلنا التجارب ديه كلام علمى و منطقى و يوصفلنا الدوا طبيب فاهم...


وطبعا قبل كل ده لازم نتوكل على الله...ومنجعلش موضوعا لحمل هو المحور اللى ندور عليه حياتنا...علشان منضيعش حياتنا و منفسدش حياة شركائنا...لانه أولا و أخيرا رزق من رب العالمين و ما علينا إلا السعى....


و كمان حاجة....لازم الصبر...اللى كان صعب عليا جدا فى البداية...و اللى للأسف ساعات الشيطان بيهيألنا ان طريقنا لسه طويييييييييييل فى حين اننا ممكن نكون فى نفس الوقت على بعد خطوة واحدة من تحقيق حلمنا...

ودعواتكم ربنا يحفظ ابنى و يكملى على خير و يرزق كل أخواتى و يقر أعينهم بالذرية الصالحة و ميحرمش حد أبدا من هذه النعمة

بطاقة تعريف فاطمة الزهراء

الاسم الحركي : طمطم
السن : 35
متجوزة من كام سنة : 3سنوات
سبب تأخر الحمل : لا يوجد سبب يعنى من عند الله
حصل حمل قبل كدة و لا لأ : مرة واحدة وتوقف نبض الجنين فى الاسبوع الخامس
بدأتي تهتمي بموضوع الحمل بعد كام سنة جواز : بعد 3 شهور
روحتي لكام دكتور : تقريبا 8
الدكتور اللي متابعة معاه دلوقتي : الطبيب الذى ليس مثلة طبيب فهو حسبى وهو نعم الوكيل
متابعة معاه من اد ايه : طول عمرى
التحاليل الطبية اللي عملتيها :كل حاجة ممكنة عملتها حتى اشعة الصبغة والمنظار
نسبة ال FSH : 7.8
نسبة ال LH :5.7
نسبة ال Prolactine :16
نسبة الBroujesteron :20
اي نسب تانية زي الغدة الدرقية او هورمون الذكورة مثلا : كلة تمام ولله الحمد
ايه الادوية اللي بتاخديها : فوليك اسيد وسيدوفاج
استمريتي عليها اد ايه : حوالى شهرين
هل كان ليها اعراض معينة مميزة او لا : غثيان ووجع فى المعدة لكن زال بعد اسبوع تقريبا
عملتي تلقيح او حقن مجهري قبل كدة :نعم عملت تلقيح صناعى مرتين وحقن مجهرى مرة
كام مرة :
في اي مركز :التلقيح الصناعى عند دكتور ثروت الاهوانى
والحقن المجهرى عند دكتور اسماعيل ابو الفتوح
مين الدكتور اللي تابع العملية :اسماعيل ابو الفتوح
رأيك في المركز :المركز كويس لكن فية مشكلة فى الدكتور مش بيتابع مريضة كويس ومش بيعمل كل حاجة ممكنة لانجاح العملية طبعا انا عارفة ان الدكتور دة سبب لكن لازم نعمل كل حاجة ممكنة وبعد كدة نقول خلاص دى ارادة الرحمن يعنى ميبقاش فى تهاون مننا فهمتونى

في اعترافات تانية عاوزة تضيفيها قبل ما نقفل المحضر :

اة عايزة اقول حاجة مهمة لينا كلنا دعاء وارجو منكم ان تؤامنو ورائى

اللهم أنت قلت وقولك الحق :


(ادعوني استجب لكم) ، وقلت (وإذا سألك عبادي ‏عني فإني قريب أجيب دعوة الداعي إذا دعانِي ) ، وقلت : (أمن يجيب المضطر ‏إذا دعاه ويكشف السوء)



اللهم يا من أجاب نوحا حين ناداه .. أجبنا
ويا من كشف الضر عن أيوب في بلواه .. اكشف عنا الضر
ويا من سمع يعقوب في شكواه
ورد إليه يوسف وأخاه وبرحمته
أرتد بصيرا وعادت النور عيناه .. اجبنا واشفنا وارزقنا ومنّ علينا بفيض جودك ‏وكرمك ..

يا رب استجب لنا ،، من لنا غيرك ندعوه ونرجوه ،، عبيدك سوانا كثير وليس لنا ‏رب سواك ندعوه يارب استجب يارب استجب

يارب استجب


بطاقة تعريف oxygenatom


الاسم الحركى :الاخت:ص
السن : 41 سنة وشهرين
متزوجة من 4 سنوات
سبب تأخر الحمل : عقم غير مسبب ... تم شفط كيس 1.5 سم على انه كيس شيكولاته لكن ثبت ان هذا المرض غير موجود
لان الكيس لم يظهر مرة ثانية
حصل حمل قبل كدة و لا لأ :لم يحدث حمل
بدأتي تهتمي بموضوع الحمل بعد كام سنة جواز :بعد 3 شهور
روحتي لكام دكتور :6 دكاترة
الدكتور اللي متابعةمعاه دلوقتي : مازال البحث مستمرا وارجو الله ان يوفقنى لطبيب يتقى الله ونابه لعمل حقن مجهرى كلاكيت تالت مرة
متابعة معاهمن اد ايه :.....
التحاليلالطبية اللي عملتيها :
نسبة ال FSH := 11.4
نسبة ال LH : = 5.19
نسبة ال Prolactin :9.31
نسبة الProjesterone :11.2
AMH :1.5
TSH = 0.74
Free T4 = 1.29
Anti- phospholipids IGg = 7.1.negative
Anti-phospholipidis IgM = 4.9. negative
ANA = 7.2 . negative
Lupus anticoagulant
LA1 = 37.8
LA2=34.8
LA1/LA2 = 1.08 negative



عملتي تلقيح و حقن مجهري قبل كدة :4 مرات تلقيح صناعى وحقن مجهرى:3 مرات
فياي مركز :التلقيح الصناعى اول وتانى وتالت مع دكتورة امينة مختار فى عيادتها
المرة الرابعة مع دكتور شريف سامى فى مركز الخصوبة المتكامل
بالنسبة للحقن المجهرى الاول مع دكتور شريف سامى فى مركز الخصوبة المتكامل
المركز ممتاز من حيث الغرف والتعامل يعنى 5 نجوم اما المعمل فلا يشمل تقنية اليوم الخامس
تانى مرة مع دكتور اشرف ابو على فى مركز المدينة للحقن المجهرى والمركز
زفت من ناحية الغرف والتعامل ( الغرفة حاطيين فيها 3 حالات على الاقل والدولاب والحمام يستعمل من قبل العاملين فى المركز ؟؟؟؟
انا بعتلهم ميل بشتكى لكن مرضوش عليا
اما المعمل فيشمل تقنية اليوم الخامس
وفى انتظار نتيجة آخر محاولة
آخر طبيب : دكتور محمد خليل هميسة - المركز العربى للخصوبة
رأى فى المركز والطبيب : المركز هدوء جدا وكثافة الحالات فى اليوم قليلة
الطبيب خلوق جدا وعلى علم واستريحت نفسيا فى التعامل معاه وده اهم حاجة
فياعترافات تانية عاوزة تضيفيها قبل ما نقفل المحضر
الاطفال دول رزق من عند ربنا ومكتبلنا فى الازل حنخلف ولا لأ
لكن الانسان لابد ان يأخذ بالاسباب ويلح فى الدعاء ويتصدق ويستغفر الله . وانا عندى يقين بالله انه حيرزقنى بالاولاد الصالحين ومنتظرة ان ده يتحقق مهما طال الانتظار
تعليق اخير : عمر ما كان فشل محاولة الحقن المجهرى سبب لترك الطبيب والمركز ولكن هناك عوامل اخرى اهمها عدم الراحة النفسية وعدم الاهتمام وقلة العلم واتخاذ الموضوع تجارة وبيزنس
بطاقة تعريف ب (نادية )



الاسم الحركي : نادانودو- نادو- نودى
السن : 32 و 8 شهور- الاسكندرية
متجوزة من كام سنة :3 سنين و 5 شهور ( مع زوجى فقط 11 شهر ) متقطعين لانه دائم السفر
سبب تأخر الحمل :من الزوج عنده ضعف فى الحركة و اللزوجة زيادة و اخيرا عرفت انى عندى تكيس بعد 3 سنوات !!!
حصل حمل قبل كدة و لا لأ :لا
بدأتي تهتمي بموضوع الحمل بعد كام سنة جواز : اول سنة
روحتي لكام دكتور :5 اطباء
الدكتور اللي متابعة معاه دلوقتي : عادل فاروق البيجاوى
متابعة معاه من اد ايه : 3 - 2010
التحاليل الطبية اللي عملتيها :عملت تحليل للهرمونات و كمان عملت اشعة صبغة
نسبة ال FSH :8.71
نسبة ال LH :8.06
نسبة ال Prolactine : 22.8
نسبة الBroujesteron : لم افعله
اي نسب تانية زي الغدة الدرقية او هورمون الذكورة مثلا : لم افعله
ايه الادوية اللي بتاخديها : سيدوفاج 850 مرتين فى اليوم و (بارلوديل نصف قرص يوميا بالليل و من قبله اخدت دوستينكس لمدة شهر قرصين فى الاسبوع )
استمريتي عليها اد ايه : الدكتور عادل قالى الادوية لا توقف حتى لو حدث حمل
هل كان ليها اعراض معينة مميزة او لا : السيدوفاج يسبب اسهال و البارلوديل مغص فى البطن
عملتي تلقيح او حقن مجهري قبل كدة :نعم (تلقيح صناعى)
كام مرة : 3 مرات
في اي مركز : اول مرتين سنة 2009 عند عيادة دكتور هشام على موسى و مرة سنة 2010 فى مركز المدينة للخصوبة و الحقن المجهرى
مين الدكتور اللي تابع العملية : الاولى و التانية هشام على موسى و الاخيرة اشرف ابو على
رأيك في المركز : عيادة الدكتور هشام على موسى هادئة و هو دكتور هادىء جدا و مريح
اما مركز المدينة الوضع مختلف تماما سرعة و عدم اهتمام و عدم وجود ضمير لانه و للاسف عملى تلقيح صناعى و حصلى فرط تنشيط و حصلى ضيق تنفس و كنت هاموت بمعنى الكلمة و الحمد لله على كل شىء اسفة لقولى هذا و ده ما حدث معى و الله اعلم





في اعترافات تانية عاوزة تضيفيها قبل ما نقفل المحضر :


فى نظرى موضوع التلقيح الصناعى او الحقن المجهرى محتاج مركز مشهور من قبل خبرات البنات

حتى لو خارج مدينتك التى تعيشين فيها و لا تذهبى اختى من تلقاء نفسك للتجربة فى اى مركز لان فى كلتا الحالتين انتى بتدفعى فلوس و كمان وقت بيضيع و ده برضه عن تجربتى الشخصية

ملحوظة

السمنة لا تفيد مع العلاج دكتور عادل يؤكد دائما على ذلك لا يفيد العلاج مع وجود وزن زائد
انا كنت عند دكتور عادل 60 كيلو انا الحمد لله الان 54 كيلو و ان شاء الله اوصل ل50 مع نهاية العام ان شاء الله


ادعو لكل اخواتى بالذرية الصالحة الطيبة و انا معهن و كل المسلمين اجمعين يا رب



الساعة الآن 10:24 .