ربيت أنا وأولادي صوص صغير إلى أن كبر فكانت سبباً في ....

بسم الله الرحمن الرحيم

السلام عليكم ورحمة الله و بركاته ...

في واحد في عائلتنا راح مجمع و أشترى 3 صوصات صغار ملونين واحد أخضر و الثاني أصفر و الثالث فوشي , أهم شي لما جابهم البيت أهله ما تقبلوهم و قالوله طلعها فوق السطح و بعدين طلعهم بس لما طلعهم ما كان فيه أحد يهتم فيهم جاء أولادي واحد عمره 10سنوات و الثاني 9 سنوات قالوا لي عن السالفة و أن الصيصان رموهم فوق السطح واحد يهتم فيهم ماغير عندهم في القفص الأكل اللي ينباع و هو عبارة عن حبوب خاصة لهم . أهم شيء عيالي قالوا لي إيش رايك ياماما نجيبهم و احنا نهتم فيهم , قلت لهم خلاص ما عندي مانع بعدين عيالي جابوهم و كان واحد فيهم تعبان اللي لونه أصفر قعد تقريبا عايش يومين ثم مات قمنا أهتمينا في الاثنين الباقين نعطيهم حبوبهم و موية ونلعب معاهم و مر تقريبا أسبوع وأحنا مبسوطين عليهم أنا وعيالي يسلونا ومالين علينا الوقت و بعد الأسبوع الأول بدأ الثاني اللي لونه أخضر يتعب وما صار يتحرك كثير بس واقف في مكانه وقعد تقريبا على هذه الحالة 3 أيام ثم ماااااااااات .
زعلنا عليه مرة و قمنا نهتم أكثر بالثالث اللي باقي و هو الفوشي و احنا خايفين عليه إنه يلحق اخوانه , سبحان الله مرت الأيام وكبر شوي أنا صراحة ما أقتنعت بأكلهم الناشف اللي هو الحبوب الجاهزة قلت خليني أغير له الأكل جربت أعطيه باقي الدجاج حق الغداء أفرمه وأعطيه وماشاء الله كان ياكله وبشراهة قلت خلاص عرفنا أكله وقمت أوصي عيالي أكلوه باقي الأكل دجاج و خبز و أهم شيء أفرموه وأعطيه و ماشاء الله على عيالي الله يحفظهم ما يقصرون على طول يقومون من النوم ويجلسون يلعبون معاه و يأكلونه بواقي الأكل و سبحان الله قام يكبر ويكبر واحنا كل ماشفناه يكبر و يتغير نتعلق فيه أكثر و نحبه أكثر و الله حتى قعدنا ندعي له بطولة العمر و زوجي ماهو مقتنع فيه من الأساس ودايما يقول طلعوه من البيت أزعجنا وسخنا و كان يقول لعيالي طلعوه السطح خلوه فوق و كان يقعد فوق السطح يومين و ثلاثة وما حد درى عنه بس عيالي طالعين نازلين يعطونه أكل و موية و كنا نشتاق له مرة و أقول لهم جيبوه بس ومرة يقول زوجي بأوديه محل الدواجن ووولكن أنا وعيالي مصرين نبغاه عندنا لأننا تعلقنا فيه مرة ,ومعاناة احنا والصوص احنا نبغاه و باقي أهل البيت مايبغاه الله يسامحهم و الصوص من ناحية ثانية مسكين ينرحم من مكان لثاني و هو مسالم يبغى يعيش المسكين :icon33:
وكبر الصوص و طاح ريشه الفوشي وطلعله ريش أبيض و كبر وطلع له أنا أسميها(لحية) شيء أحمر في دقنه و فوق راسه طلعله مدرجات لونها أحمر آىسفة على التعبير بس والله ناسية إيش اسمها , أهم شيء ماشاء الله الصوص بلغ ههههههههههه وصار رجال و سبحان الله تحول لديك إي و الله طلع ديك صار يصيح و يتحرك زي الأمير في البيت و الله يابنات طلعت له هيبة كل من شافه أنفجع قالوا هذا الصوص الصغير ذاك الصعنون , سبحان الله كبر و تغير شكل جسمه و ريشه صار لونه أبيض وصار يصيح مع الأذان و عند الأقامة و إذا جبناه أنا وعيالي الصالة عندنا يفرح و يقعد يصيح من 5-6 مرات و ينطط من مكان لآخر و احنا مبسوطين منه وهو بعد مبسوط معانا .
بس سبحان الله ياينات تعبنا معاه جاب نتيجة و ثمرة في بيتنا تصدقون يابنات إني حملت و أنا الان حامل في شهري االثالث ***** الله يتمم لي على خير , وأنا لي فترة أتمنى أحمل بس ماحملت إلا من بعد ماجبناه وبدينا نهتم فيه و الشيء الثاني يابنات الي صار إني لقيت مكان السحر اللي سوته لنا شغالة حسبي الله عليها وتقريبا لي 4 سنوات وأنا وزوجي في مشاكل ما يعلم فيها الا رب العالمين سبحان الله قبل مايجينا الصوص كنت أتعالج بس كان العلاج بطيء بس بعد ماجيناه سبحان الله رب الهمني برؤية ولما فسرها لي الشيخ قال لي أنتو عليكم عمل ورح تلاقينه في المكان الفلاني اللي شفته في المنام و هو مجلس الحريم حسبي الله عليها ونعم الوكيل و ***** الله هذه تكون نهاية المعاناة .
يعني سبحان الله يابنات دايم أقول لزوجي أحس هذا الديك دخلته علينا البيت فيها بركة و البركة من الصدقة اللي احنا اعطيناها هذا الضعيف لأنه لاحول له ولا قوة وكان يتنقل من مكان لآخر وما حد عبره المسكين وربي سبحانه أراد إنه احنا اللي نهتم فيه و الأجر واللبركة تجي في بيتنا
سبحانك يارب ما أعظمك و ما أجلك و ماهي عظم حكمتك أن قدرت لنا أنا و أولادي و زوجي نربي هذا الصوص الضعيف ونهتم فيه و يكبر عندنا في البيت و يصير ديك , و الله يابنات إني أتأمل كل يوم و يش يصير في حياتي أنا وزوجي وعيالي من تحسن و من انفتاح ابواب الخير في وجهنا أحمد الله و أشكره وأقعد أبكي وأقول يارب ماسوينا شيء مقابل اللي أعطيتنا يامعطي ياكريم يارزاق ياوهاب يارب لك الحمد و لك الشكر
و الله يابنات نشرت لكم قصتي عشان ما تيأسوون من سؤال الله و عطائه فممكن يعطيك شيء ويختبرك فيه هل رح تأدين حق الله فيه أم لا وممكن ربي أعطاك هذا الشيء عشان تاخذين فيه أجر ويكون تكفير لذنوب قد أقترفتيها ويعطيك الله بدالها خير وخير بلا حدود فلا يسعني إلا أن أقول " اللهم لك الحمد حمدا كثيرا كما ينبغي لجلال وجهك و وعظيم سلطانك , اللهم لك الحمد حتى ترضى ولك الحمد إذا رضيت و لك الحمد بعد الرضى "
و صلي اللهم وسلم على سيدنا محمد وعلى آله وصحبه وسلم ولا تنسووا حبيباتي قول الرسول صللى الله عليه وسلم " في كل كبد رطبة أجر "

ودمتم:26: