الله يوفقك
22-08-1431 هـ, 06:22 صباحاً
 
شكرا roro-mozza20010 وشكرا لحياة الكون ورغد والله فرحت بردودكم
حياة الكون كويس انا من مكة كمااان
22-08-1431 هـ, 06:57 صباحاً
 
انسة ميمي :

بالنسبة لتنسيق الطاولات .. عندك أربع مجالات :

إما تتخصصين فقط في المفارش ( القطعتين ) الكبير والصغير
وتلبيسات الكراسي وربطاتها..

من الأفضل يكون عندك 4 ألوان أساسية للمفارش الكبيرة والتلبيسات
مثل الذهبي ، الفضي ، السكري ، الأبيض
وتخلين القطعة اللي فوق من المفرش والربطات بحسب طلب الزبونة

مرة مع مرة حتلاقين عندك مجموعة كبيرة من الألوان

حاولي تنوعين في النوع ليكون عند الزبونة المجال في الإختيار
ما بين تل وأورجنزا ومخمل وشيفون

طبعاً في هذا ما لك أحقية وضع سعر شامل للطاولة
لإنه السعر لازم يكون بحسب العدد
يعني تأجرين بالقطعة فقط لا غير
المفرش الكبير مثلاً بـ 10 ، الصغير بـ 5
تلبيسة الكرسي بـ 4 الربطة 2 ريال
أو ما إلى ذلك من أسعار محلات التجهيزات المعروفة

،

عندك التخصص الشامل للطاولة
واللي يشمل تنسيقها بالورد الطبيعي
وبالفازات وبالكرستالات وموديلات جديدة
هذا ممكن بسعر الطاولة بحسب ما تكلفك الطاولة

أهم شيء في الموضوع كله : التأمين
لازم تأخذين تأمين على أغراضك
عشان تضمنين رجوعها لك سليمة
ولو ما رجعت سليمة من حقك تخصمين من التأمين

،

المجال الثالث
يشمل تنسيق القاعة بأكملها
بمعنى إنك ما تحددين لها طاولة وكرسي وبس
لا .. تعملين على تنسيق القاعة بنفس تنسيق الطاولة
وهذي شغلانة مربحة
وبالذات إذا عملتِ ديزاين مميز ومختلف عن السوق

،
المجال الرابع
إنك تتعاملي مع القاعات نفسها
ما لك دخل في الزباين
بس قاعات تكوني واثقة منها
وتكون قاعات عليها إقبال
تروحي وتقدمي نموذج واحد فقط
إذا عجبهم إمضي معاهم عقد على التنسيق
ووضحي لهم إنه مبلغكِ كذا
وهم يحطوا النسبة اللي يبغوها
خرجي نفسك انتِ من الموضوع نهائياً
عشان ما يقعدون لك عل ىرزقك


وحياك الله
أي مساعدة أنا / شيخة أحمد (:
22-08-1431 هـ, 08:33 صباحاً
 
شكرا اختي شيخة الله يجزاكي كل خير
بس حبيت اسألأ كيف تأمينات على الطاولات
وكيف يكون التعامل مع الزبونه من حيث كيفيه الدفع وكمان كيف احفظ افكاري من السرقه
22-08-1431 هـ, 08:45 صباحاً
 
اقتباس مشاركة  (انسة ميمي)
شكرا اختي شيخة الله يجزاكي كل خير
بس حبيت اسألأ كيف تأمينات على الطاولات
وكيف يكون التعامل مع الزبونه من حيث كيفيه الدفع وكمان كيف احفظ افكاري من السرقه

تأمين على أشياءك

زي ما تأخذ محلات الحلويات تأمين على شمعداناتها
إذا رجعت سليمة وكاملة العدد
رجعوا لك تأمينك كامل
وإذا انكسر شيء أو نقص العدد
خصموا من التأمين

انتِ نفس الشيء
خلي التأمين غالي / ألف ريال ، 500
عشان يحرصون على الأشياء

أنا والله أبداً أبداً ما ترجع لي أغراضي سليمة
يا أخسر خساير ما يعلم بها إلا الله

تخيلي في عرس من الأعراس
كسروا لي 15 ثلاجة قهوة

من غير الفناجين والكاسات
أبداً ما ترجع لي نفس العدد اللي طلعته

المفارش نفس الشيء
يا يحرقونها لك بالبخور ، يا ينكب عليها العصير اللي لو غسلتيها مليون مرة
ما يروح .. لإنه صبغة

يعني هالأشياء تتلف أعصابك كثير في البداية


،

أما عن التعامل فلا تشكي لي لأبكي لك

لكن خذيها نصيحة أخت لك أكبر منك بكثير (:

لا تتساهلي في حقوقك

عيبنا إننا في البداية نبغى نكسب الزباين على حساب أنفسنا
وعشان سمعتنا نتنازل عن كثير وكثير

لا
لا
هذا أكبر خطأ

حطي لك سياسة واحدة من الآن تنعرفي وتشتهري بها
عشان لا يقولون لما كبرت واشتهرت تغيرت

خلي لك خط واضح في التعامل مع الناس

المبلغ كامل قبل العمل
وأعطيها سند قبض بكامل المبلغ
كاتبة فيه كل ما اتفقتم عليه من لون من عدد من موعد ومن كل شيء
وقولي لها إذا جات مناسبتك ونقصت لك في شيء
ما أخرج من القاعة إلا وانتِ أخذة حق الشيء اللي نقصته


ما ذقت المر من الناس إلا من الناحية المادية
يذلونك ذل يوم الفرح
كأنك انتِ اللي لك حاجة عندهم
مو هم اللي حاجتهم عندك
إلا من رحم ربي

يوم العرس طبعاً ما أحد فاضي لك
كلهم عند الكوافيرات
وتظلين في مناحلة قلب معاهم
إلين آخر العرس
والا تجيك تقول لك بكرة أجيبها لك مع أغراضك

وليه ؟ على إيه تحرقين أعصابك من بدايتها
خليك حازمة وصارمة

قولي لهم أنا توني مبتدئة
كمليني .. أكملك
وما لك مني إلا بياض الوجه


أما سرقة الأفكار
فلو تحسبين لها حساب من الآن
فما راح تدخلين هذا المضمار أبداً

كنت البارح جالسة في لقاء
مع واحدة تاجرة
ما شاء الله تبارك الله فتحت لها محل

والمحل شيء خيال
قالت : والله يا شيخة
سويت كوشة كلفتني 25 ألف ريال
وورتني صورتها خيااااااااااااااااااااااااااااااااااااااااااااااااااااااال
تقول : والله طول الفرح واحدة ما خلت جزء من الكوشة إلا وصورته
تقول أنا ما حضرت العرس بس واحدة من زميلاتي قالت لي
بعد فترة نفس الكوشة سواها محل ثاني لقاعة ثانية

الأفكار مسروقة مسروقة
الرازق في السماء والحاسد في الأرض
لكن .. الأرزاق بيد الله

ما عليك

لكل مجتهد نصيب
شدي حيلك وهمتك
ولا تفكرين في سرقة وغيرها

استودعي الله أشياءك في كل فرح
والله خير الحافظين
22-08-1431 هـ, 09:50 صباحاً
 


الساعة الآن 11:42 .