شكرا جزيلا اختي شيخة الله يجزيك كل خير و يشفيك ويخليك لعين ترجيك
فعلا ماقصرتي
الله يرفع قدر من ترفع الموضوع
ولي لها خبره لاتبخل علينا عشان الكل يستفيد
للرفع
هلا حبيبتي
هذا المشروع فكرت فيه مليا وحالت الظروف دون عمله عشان كذا أبهديك أفكاري فتقبليها
أول شئ اعتمدي على الله وحده واسأليه التيسير واستخيري
ثانيا خلي لك محلات محددة تتعاملين معها عشان يعملون لك خصم طيب مع استمرار التعامل لأن إذا بتاخذين بالسعر العادي اللي للناس العاديين ماراح تستفيدين لأن سعرك لازم يكون إذا مش أقل من سعر السوق شوية ما يكون أعلى منه بالذات في البداية لين تثبتين وجودك
يعني يكون لك 2-3 محلات للمعجنات والحلى والآيس كريم تتعاملين معهم بحيث لو جاتك الزبونة وطلبت تعطينها القائمة هي تختار منها المحل اللي تبي الحلى والمعجنات منه عشان ما يطلع ما عجبها بعد العرس وتسوي لك مشكلة لأنها هي الي اختارت ولو طلبت من محل غير تتحمل الفرق-يعني تزيدك, او هي توفره لنفسها وينقص كذا سعر المأكولات من العقد-
تتعاملين مع أفضل محل للورد من حيث الجودة-دقة المواعيد عشان ما يوهقك-والسعر
تشترين نوعين أوثلاثة من الفازات بكميات كبيرة ما تقل عن 30 ولا تزيد عن50
لأن تقريبا هذا حجم الصالات
تشترين طوايق من الساتان والتل والشيفون وغيرها من محلات الجملة أهم شئ في الساتان اللون السكري لأنه مطلوب أكثر
ممكن يكون عندك نماذج حية تورينها الزبونة أو صور لزواجات من قرايبك أومن المجلات أو النت أنت تقدرين تسوين زيها واللي ماتقدرين عليه من البداية قولي ماراح يكون زيه عشان تكسبين ثقة الزباين
وممكن لوكان لها طلب خاص تنفذينه لها
تشترين كرستالات ومن هالحركات اللي تنحط عالطاولات
ممكن تجهزين هدايا الزواج سواء كانت فكرتها من عندك أو من عندها تسوينها أنت من البيت أوتتعاملين مع محلات الهدايا بس كذا ما راح تستفيدين كثير يعني لازم تتعلمين تجهيز الهدايا أفيدلك
بالنسبة للعصير بعد يكون لك 2-3 شركات ألبان تتعاملين معاهم يبيعونك بسعر البقالات
وممكن تتعاملين بعد مع مطعم أوثنين للعشاء
وتوفرين جهاز كاشف الجوال عندك والعاملة حقته لو تاخذينها بالأجرة مش مشكلة
وممكن حتى القهوة والشاي والنعناع والكابوتشينوأنت تسوينها وتوفرين لها ترامس كشخة لكل طاولةومعها دلتين رسلان للقهوة تدور بها العاملات عالحريم
وممكن توفرين عطور الإستقبال وما بعد العشاء والمباخر وهذيك اللي فيها الهيل وعود الأسنان والعلك اللي يحطونها على باب الخروج من البوفيه-مادري شيسمونها-
وممكن توفرين خدمات دورة المياه أعزك الله
وعاملات الخدمة والضيافة
حبيتي هذا اللي يحضرني الآن لأني ماروح زواجات إلا نادرا بس هذا اكتسبته من زواج أخوي الي حاسني حوسه الله يوفقه وإذا أنت من الشرقية ممكن أساعدك عن بعض المحلات وأتواصل معك عالهاتف الثابت إذا حابه
كل هذي الشغلات وين تحطينها؟إذا عندكم مكان في البيت أنعم وأكرم وإذا مافيه تستأجرين محل يكون أجاره مناسب تخلينه مستودع لك
**********
هذا الشرح

وقبل لا تبدين إذا عزمتي خلاص ..لا بد من دراسة ميدانية للمشروع يعني تاخذين قلم ودفتر وتنزلين لمحلات تجهيز الزواجات تسألينه عن كل شئ بالتفصيل الممل كأنك بتجهزين عرس محل واثنين وثلاثة الين ماتحسين الصورة وضحت عندك وحتى تكتسبين خبرة من طرقهم في التجهيز أكيد عندهم أشياء أنا ماذكرتها
بعدين ارجعي البيت وسوي ذاك الكافي أو الشاي أو القهوة اللي يكيفك وجيبي الآلة الحاسبة واحسبي:على أقل تقدير لكل شئ وأعلى تقدير
زيني جدول :الخامة -سعر الصنف (حبة)-أقل تقدير(30حبة)-أعلى تقدير(50حبة)
هذا اللي كلفك وبعدين ضيفي -البيع بأقل تقدير-البيع بأعلى تقدير
وكذا لكل شئ ممكن توفرينه اكتبي كم بيكلفك وكم بتعرضينه به ووش ربحك فيه يعني دراسة متأنييييييييييي ييييييييية جدا ورايقة عشان تعرفين خلاصك وما تخسرين
ومش ضروري توفرين كل هالأشياء مرة وحدة ترى السماء والأرض ما انخلقت في يوم على مهلك وبتأني يعني ممكن تجهيزين طاولات في البداية بس من دون أكلها بعدين تضيفين الأكل بعدها الهدايا وهكذا أهم شئ الشغل يكون حلو ومتقن
موضوع الكوش يحتاج مهارة في الرسم والتصميم وابتكار الأفكار لأن كل عروس ودها تجيب شئ جديد وهذا اشوف إنك ماتبدين به لأن حتى المكان يبي له مساحة كبيرة إلا إذا كنتي مقبلة عالمشروع كامل
بالنسبة للتوصيل والتركيب إذا ممكن تروحين أنت وعايلتك أو تستأجرين لك ناس يروحون بدالك..سألت صاحب محل قال حنا اثنين مصمم كوش وعامل ووقت الزواج نستأجر عمال..يعني ممكن من العوايل المقيمة هنا يبون يترزقون المهم تتعاملين مع نفس الشخصية في كل مرة عشان يكونون فاهمين عليك
سوي لك دفتر فواتير عشان كل 6 شهور تحاسبين نفسك ربحانه ولا ؟....وإذا لا تشوفين وين المشكلة وتتفادينها
قبل مواسم الزواجات مثلا قبل العطلة الصيفية بفترة انزلي المحلات شوفي عرضهم كيف عشان تستفيدين إما مثله بالمرة -وهذي سرقة أفكار- أو يساعدك في إيجاد فكرة أخرى

وأنصحك تزورين شات الأحلام هنا في عالم حواء يمكن حاطين لك دراسة جدوى بتفيدك كثير وإذا ما فيه اطلبي من صاحبة الموضوع وهي ما بتقصر معك إن شاء الله
أي استفسار أنا جاهزة باللي أقدر عليه ولو تذكرت شئ برسل لك

بالتوفيق

********

أحب أشكر شيخة أحمد على معلوماتها القيمة
موفقه ان شاء الله


الساعة الآن 09:38 .