خـالد : يمة خلاص توظفت وما ينقصني إلا بنت الحلال
الأم : ياوليدي انت خابر الزواج مسؤولية وفر لك قرشين ترى الزواج يكلف وبنت الناس ما تبي واحد ما عندة شي
خـالد : يايمة مابي اي وحدة انا مابي إلا البنت الي تبي الستر اما الي تبي مظاهر مالها لزوم معي
الأم : الله يوفقك ياخالد ويرزقك البنت الي تسعدك
وراحت الام كعادة السعوديات تدور لها من بنات اخوها او اختها << طراه ان الام ما تحب تاخذ إلا من الي يقرب لها فكر ان القريبات بيحنون عليها اكثر من الاجنبيات "اقصد خارج الاقارب"
نرجع لقصتنا
كانت ام خالد معزومة على عشاء في اليوم الي تكلم معها ولدها على الزواج ويسولفون عن الموضة وان المحل الفلاني نزل فستان جديد والمحل الفلاني تغيرت ادارته لان صاحبه باع المحل
وام خالد جالسه تتأمل في كلام المتواجدات بالعزيمة ويلتفت نظرها إلى وحدة هادية ما تشاركهم في الكلام وجاء ببالها ان تكون هي الانسب لخالد
رجعت أم خالد لبيتها وكان بين عينها تعرف رائي خالد بهذة البنت
كانت تبي تكلم ولدها خالد علطول ولكن شافته نايم ولا قدرت تنام ذيك الليلة خبركم الي في بطنة علم يبي يطلعه ههه
قام خالد الصباح بيروح لدوامة إلا وامة سمعت خرفشة "صوت" وعرفت انه خالد وتطلع له
وقالت له حصلت لك البيت الي تبيها
خالد : أول شي صباح الخير وش ذا الصباح الي اتصبح فيه عليك يالغالية
الام : ياوليدي قل يالله ان تجعلها من نصيبك ترى بنات ذا اليومين قلو البنات الي يقومون بالرجال ويخدمونه
خالد : منهي يايمة الي شفتيها وتصلح لي
الام : بنت آل فلان
خالد : الله يهديك يايمة ما حصلتي إلا آل فلان نخطب منهم انتي خابرة مستواهم المادي احسن منا
الام : ياوليدي انت بتاخذ بنتهم منتب شاري شي مادي عشان تقول كذا وما راح نخسر شي خلنا بس نكلمهم
خالد : يمة تأخرت عن الدوام بعدين بنحكي بخصوص ذا الموضوع
ويروح خالد لدوامة وكان فكرة مشغول يفكر في مصاريف الزواج بالبداية كان الكلام عنده سهل والزواج امره هين
ولكن يوم جاء الجد بدأ يفكر بجدية ويحس بصعوبة امر الزواج ومسؤوليته
طلع خالد جوالة وبدأ يحسب بالحاسبة تكاليف الزواج من مهر و شبكة و تكاليف صالة الزواج وشهر العسل والسكن
طلع المبلغ ما يستهان به قام يتصل على البنوك يدور أفضل العروض ليقدم على قرض عشان يكمل نص دينة
رجع للبيت إلا وامة مزهبه له الغداء وسألته امه على الغداء ها ياوليدي وش قرارك خلني اتصل اليوم على امها اجس نبضها إذا مهيب مرتبطة خليت خالك يكلم ابوها << ترى ابو خالد ميت للعلم
قال يايمة والله اليوم حصلت لي قرض بفوائد عاليه هو الوحيد الي بيعطيني مبلغ اقدر اغطي مستلزمات الزواج
قالت ياوليدي ربي بيوفقك مدام نيتك صافية لا تتردد
بعد المغرب اتصلت ام خالد على ام البنت وسولفت معها شوي وسألتها عن بنتها
أول مرة أم خالد تسأل أم البنت عن بنتها بشكل خاص ثم قالت والله خالد كلمني اليوم ادور له بنت الحلال وقلت مالنا إلا الله ثم بنتكم إذا مهيب مرتبطة
واحنا شارين نسبكم
قالت ام البنت خالد ما ينعاف ولنا الشرف والله ولكن صعبه ارد عليكم خلي الكلام من الرجال احسن << ام البنت خايفة من ابو البنت يلعن جدفها
سكرت السماعة أم خالد وهي متشققة عرفت الجواب المبدئي بالموافقة
ما امداها تسكر السماعة إلا وهي تتصل على اخوها قالت تعالي الحين بسرعة
خال خالد: وش عندك فرحانه كل ذا الفرح
أم خالد : تعال وأعلمك
خال خالد : الله يستر والله ان قلبي بين رجولي
أم خالد : لالا تخاف شي حلو بس تعال
وصل خال خالد وتفتح له ام خالد وتسلم عليه والقهوة جاهزة والشاهي
قالت بكرة بعد المغرب تكفى ياخوي فض عمرك ودي اوصيك على مشوار تروح مع خالد له
خال خالد : أمريني وين تبيني اروح الحين تقولين تعال بسرعة عشان تقولين بكرة بوصيك !!
أم خالد : ياخوي لا تلومني من الفرحة الي فيني خالد يبي تزوج ودي انك تخطب بنت آل فلان
خال خالد : ابشري وخالد بمثابة ولدي والله يوفقه يارب
ويروح أبو خالد ويخطب البنت من أبوها ورحب الاب وأبدى موافقته المبدئية ولكن طلب وقت يسأل عن خالد ويسأل البنت
وبعد اسبوع رد أبو البنت على خال خالد بالموافقة ولكن البنت شرطت شرط !!
شرطها ان يكون الزواج عائلي ومختصر لانها عارفه ان لو تكلف المعرس بأكثر من طاقته راح يضرها اهي بتعيش بضغوط وسببها الفخفخة الزايدة من تكاليف اقاعة الزواج والعشاء ووو
فرح خالد يوم عرف هذا الشرط وعجبه تفكير البنت وقرر أنه ما يرجع من المبلغ ولا ريال وقال بدل ما اخسرها على القاعة ووو ,, أخسرها على شي يبسطنا
وتزوج خالد البنت وربي منعم عليهم وعايشين بسعادة
انتهت
رايكم بالزواجات العائلة هل انتم معها أم ضدها ؟؟
هل تنظرون للقيل والقال للمناسبات وتطمحون بأن يتكلمون الناس بزواجكم وذلك على حساب قدرتكم المالية ؟؟
توووت توووت @tooot_tooot
محررة فضية
يلزم عليك تسجيل الدخول أولًا لكتابة تعليق.
كوب كابتشينو
•
up
fo0fo077
•
انا كان شرطي زواج عائلي ومختصر في بيتنا والحمدلله احلى شيء لان ما احب التكاليف عشان ليله
وسافرنا شهر عسل لماليزيا
انا مع الزواج العائلي وبقوووووه
وسافرنا شهر عسل لماليزيا
انا مع الزواج العائلي وبقوووووه
تصدقين حتى الزواج العائلي يكلف !
يعني اللي ما يكلف لما ما يكون فيه زواج للحريم حتى لو مختصرررر
اخوي قريب زواجه واضطرينا نلغي زواج الحريم بسبب المصاريف ,,
يعني صدق صدق الله يعين اللي بيتزوج وما عنده شيء
ولا عنده أحد يعينه المصاريف صعبه وكل شيء نااااااار
:44:
يعني اللي ما يكلف لما ما يكون فيه زواج للحريم حتى لو مختصرررر
اخوي قريب زواجه واضطرينا نلغي زواج الحريم بسبب المصاريف ,,
يعني صدق صدق الله يعين اللي بيتزوج وما عنده شيء
ولا عنده أحد يعينه المصاريف صعبه وكل شيء نااااااار
:44:
الصفحة الأخيرة