استغفروه @astghfroh
محررة ماسية
بنات امس ادخلو شوفو المصطلحات النجديه القديمه واعرفو معناها واى انتى منهم بصراحه
نقلت لكم بعض المصطلحات النجديه الى بعظها ما زال متداول مثل الظفره والرفله والعوباء هذى اعرفها وبعضه معروف بلفضه
" الظفـــرة ".. ويسمونها " القرمة" .. "السنافية".. وهي عندهم ..أطيب النســاء .. و تقـوم بأعمال تعجز عنها .. غالبية النســاء .. بل حتى ربما " بعض الرجال " !!
فتجد بيتها نظيف ، وزوجها " منعنش" .. هدومه نظيفه .. وحالته " زينه" .. وأطفالها .. " حلوين" .. " ممتلئة أجسامهم .. وصحتهم زينة .. وشاطرين بالدراسة ..!
" الـــرّ فـــله " .. وهذه عكـس .. الظفرة تماما .. ويسمونها " الرّمه" ..تجد بيتها " مزبلة " .. وزوجها " معصّلق " ..تجد على ثوبه .. خريطة العالم العربي .. من العرق ومناثر الشاهي واللبن .. والقهوة ..!
وعيــالها .. " مهـازيل" .. ومقرفشين .. يشحدون الناس .. وألفاظهم " وسخة " .. ودائم بالشارع .. يحلتون السيارات .. وبيتها ما يقرب .. المجاري ضــاربة على الآخر .. وواصله لبيوت الجيران ..!
"العــوبــا ".. وهي بالمصري " أم 44" .. عفريته ..
لسانها .." يلوط " آذانها " .. يخرعون بها " الورعان " .. ويهدّون بها الجيران .. وقت المشاكل ..
زوجها مرعوب .. ويعدّها من عواقب الذنوب ..
وإذا اكبروا .. عيالها .. صاروا مثلها .." قشران" .. يخرعون عيال المدارس .. ويدّبون " ورعان " خلق الله .. والناس بالصلاة !
وإذا سلموا من الصلاة .." كمخ " ابوهم .. " ابو عيال المضروبين " !
حتى بعضهم " يدسون " .. العصي " والأسواط " حول المسجد " عدة الهوشة " ..!
" الـدقيمـه".. وهذه راعية كلام ..وثرثرة .. بس كلامها كله " يفشّل " ..مــاتعرف تجيب ..ســالفة على أصــولها .. تجي تبي تمدح .. تلقاها " تسب" .. وإذا جت .. " تسب " تلقها .. " تمدح" !
تقول .. للنسوان .. عن زوجها وعيالها كلام ما ينقال.. وتطلع أسرارها ..للعدو والصديق
" الـــدالــــجة " .. ام الشـــوراع .. عباتها يابسه من " الحــومة " .. سرداد مرداد ..على الأسواق والبقالات .. تجدل على بيتها .. مثل " القعرة " .. والزوج موجود .. ولاهو مقصّر.. بس ولع بالسوق .. والحومة .." حــام َ / يحوم / فهو حــائم "
تعطيك ..تفاصيل من مر بالشارع ..كلهم .. ألوان سياراتهم .. وجنسياتهم ..وابو افلان وعيــاله .. وإذا ..خلا .. الطريق .. قامت تحلّت " البساسة " .. وتطردهن عن بيتها .. !
وإذا جتهم دعوة " للعرس " .. لو ..هُم.. حيالله نــاس .. حلفت على الزوج ..‘إلا يوديهم .. للعرس ..!
" النكــوث" وهذه صوتها .. يلعلع .. بالمجــالس .. وكل كلامها .. عن ورعانها .... كلامهم .. ومغامراتهم .. ما تخلي أحد يتكلم معها .. أم 44 السان .. تقول بالعة " رادو" .. الحريم ..معها " جمهور" مسرحية .. !
تخطّف" " الحكي " .. وتقطّع السوالف .. وماعليها من أحد ..!
يحذّرها .. زوجها .. وعيالها .. من كثرة الكلام .. ولاينفع ولايفيد ..
تعقل خمس دقايق أو ل ما تجلس .. ثم تضيع مع أول " ضحكة" .. وكل سطر تختمه بضحكة .. مالها معنى ..!
" الحدجة " ( نبات بري مُر الطعم ).. وهذه ..ما تكلم إلا كان " الحجدة " تكلم .. عندك ولاهي عندك .. صمت من أول المجلس إلى آخرة .. ولاحتى تعابير وجهها .. تظهرها .. مدري ليش جايه ؟!
" المقمّـــرة ".. من " القمار ".. ويقولون لها .. " المهـّولة " .. وهذه راعية شائعات .. تأتيك بالأخبار.. العجيبة والغريبة .. تحبها وتفرح فيها .. وتحلف عليها ..انها صحيح ..!!
ولو حكى السالفة أحد غيرها .. هونتها .. وكذبتها !!
" الـــونّــــانة " ماغير تون .. بالليل والنهار .. " موسوسة " .. ما يذكر مرض إلا تقول .. صابني !!
وكل يوم وهي بهالمستشفيات.. عندها صيدلية بالبيت ..لها الحالها ..!
تقــول ..معـــاشقة هالأطبــاء .. !
وكل شوي .. جاي ولدها " للمطوع" .. " تفّل" لنا بهالمويّه !!
وبعضهن زوجها .. ماغير يشد .. وينزل .. من شقة إلى شقة .. ومن بيت لبيت .. تقول هالبيت به " سكن " ..!
" البشــوع ". ومعناها .. " الغيور " .. ماتشوف على مرة شي .. إلا وتلزم زوجها يجيب .. مثله .. وزيه بالضبط !
شخصيتها دائما " ضعيفة " ما عندها .. استقلالية ..ولا اعتزاز بالنفس .. تجدها مع هالحريم .. بس تناظر بذهبن .. وملابسهن .. واللي يعجبها .. تحفظه بالمخ .. وتشتريه !
" المسترجلة "/.. وهذه عاملة .. حالها .. رجال .. صوتها رفيع ..وكلامها عالي ..تمشّي زوجها .. زي ماتبي .. ما يقول معها " اص" .. حتى عيالها .. يهابونها أكثر من والدهم .. والكلمة اللي تمشي دائما .. كلمتها ..!
إذا أراد الزوج .. يعزم أحد .. أو يستضيف ضيف .. لازم يستأذنها أولا .. وإذا قالت ..لاااااااااا .. ما قالت " اييييييييييه ..!
النفلاء :: يطلق على المرأة الذي يكون كل شيء في بيتها يعني تحب
الإتيكيت وإذا جاو عند زوجها ضيوف أنها تبيض وجهه
الاولين بس يعايرون فى حريمهم اغلب الصفات شينه :mad:
بس اذا الجد فعلا كثير من الحريم فيهم هالصفات
0
2K
هذا الموضوع مغلق.
خليك أول من تشارك برأيها 💁🏻♀️