السلااام عليكم .......
قضية منزل ...لا يعلم عنها احد تعالو معي في مشهد داخل المنزل
أم عبير اتصلت عليها حرمة تخطب لولدها خالد .. وتمدح فيييه وتمجده كأنه أحسن ولد بالعااالم !!! وتسأل عن عبير وتقول : واالله يا أم عبير يقولون بنتك عبير حلوة .. صدق ...؟؟؟ < بالله وش بتجاوبها أم عبير !! أم عبير : الحمد لله بنتي جميلة وما يعيبها شي .. أم خالد : عسى شعرها طويل ..! عساها بيضاء ؟؟ شعرها نااعم ؟؟ كيف جسمها ؟؟ بالله وصفييها لي ...! أم عبير تحاول تمسك نفسها وتجامل أم خالد : ها يا أم عبير متى يناسبكم نجي نشوف البنت ..؟ < ضاااامنة الموافقة ما شاء الله ....! أم عبير : والله يا أم خالد , عبير تفضل يجي الولد بعد ما نسأل عنه ,, وهو يشوفها أم خالد : وشوووو من جدك ..! أصلا البنت مالها شوور ,, الشور شور أهلها .. وأنا لازم أشوف اللي ولدي بياخذها .. يناسبكم بكره ؟ < البنت اللي بتعرس ولا أهلها أم عبير : برد لك خبر .. تنتهي المكالمة
وتنادي أم عبير بنتها وتقول لها : ها وش رايك .. موافقه ؟ عبير : على اييش ؟ الأم : على الولد .. عبير : لا شفته ولا أعرف عنه شي .. شلوون أوافق !! الأم : خلاص بواعد اهله وشوفيهم .. عبير: وش أبي بأهله باخذه هو ولا أهله ..! وبعدين فكين من سالفة الأهل احنا اتفقنا أي موضوع يكون بيننا وبين الولد نفسه .. أنا ما أبي أعرض نفسي على الحريم .. أنا انسانة .. مو سلعة جايين يشترونها ..! كم مره دخلت على حرمة ,, وحريم يجون ساحبين خواتهم وبناتهم وقهوة وشاي ومعجناات وحلا وكركرة ,, والفرجة ببلاش ..! وبعدها يروحون ولا نعرف ردهم !!.... خلاص أنا ملييييت ... أنا انسانة عندي كراامة ومشاعر وأحاسيس ما أبي هذا الوضع يمه ... الأم مصرة أنهم يجون ,, وعبير تستسلم كالعادة !!! قالت الأم لبنتها : جهزي لك لبس .. ما نبي بنطلون زي أول مره يمكن كان هو السبب !! ولا تنورة قصيره زي ثاني مره ..! وشعرك لا تسوينه كيرلي ..! هذول يحبون النااعم ..! وتدهني بفكس خلي لونك يفتح ,,, ترا هذول يحبون البياض !! عبير متعجبة وطبعا لا تعليييييق ..!. تاخذ عبير جوالها وتدق على صديقتها سارة وتطلب منها لبس يناسب أصحاب المعالي ,, لأن ملابسها ما تتوافق مع مقاييسهم العالمية ...!
ويعلنون حالة استنفااار في البيت استعدادا لاستقبال الضيوف الموعودين .. الأطفال يرسلونهم لخوالهم ,, وصواني الحلا والموالح تتجهز .. والبخور يتولع .. ويجون الضيوف .. وتستقلبلهم الأم .. طبعا أم الولد وتوابعها .. أختها وبنتها وغيرهم ,, ماهي الفرحة ببلاش ....!....! بعد السوالف والقهاوي , تدخل عبير ,, والعيون ترااقب داخلة وهي كأنها تقول شوفووني .. عسااني عجبتكم .. عساني مطاابقة لمواصفااتكم ومقاييسكم !! تطلع عبير ,, ويطلعون وراها من ذلك المنزل اللذي احتفى بهم وكرّمهم ... وعرض لهم سلعة من سلعه !! والولد ينتطظر : هااه عساها عجبتكم ...! < آآه يا مخففة ,, لو بتشتري سيارة أنت أول من يحددها ...! يمر يوم ,, يومين , ثلااث ,, ولا حولك أحد ..! محد دق .. والبنت تقول خلاص ميئوس منهم هذول ... وتمر الأشهر والبحث جااري بين بيوت خلق الله .. ومافي بيت ما طقووه ولا في عايلة ما شافوا منها ,والولد في انتظاااار ...! والبحث جااري ,, والمشااعر مالها أي حسااااب ...!
طيب ليييه ما ردوا .......! يبقى السبب مجهووول .... وعبير خاطرها مكسووور .. مين بيواسيها ....!؟؟ وأمها ضاايق صدرها على بنتها ,, على هالخطيب اللي يمكن حتى هو ما درا ان أهله جايين يشوفون له ,,,,! صديقااتها السعوديات مثلها . . والنظام مااشي ...! لميين تشكي ولا تبكي ؟؟! ولا تشكي لصاحبتها اللبنانية اللي بتضحك وتقول : شو هالتخللف ...!
ليه أجازوا النظرة الشرعية ؟ لأن الولد نظرته غير عن أمه وخواته .. مره حريم رايحين يشوفون وحده لولدهم , والولد هو اللي وموديهم .. شافه أبو البنت عند الباب .. سلم عليه ودخّله ,, وأعجب بأسلووبه ,, وقال : بنادي لك البنت .. وشافها ,, وشاافته .. طلعوا الأهل من بيت البنت وهم يقولون : لا البينت ما تصلح , شينه !! الولد قال : الا تصلح ,, أنا شفتها وعجبتني ...!
ما يستفاد من الحكي كله .. بنات حمااايل ,, .. اسألوا عنهم وبتجيكم مواصفاتهم .. بعدين يجي الولد ,, لييه الام اللي تجي ... انا باخذكم ولا باخذ ولدكم ..؟! تراه من وضع جد مزري ,, ومدمر نفسيا .. وغير لائق أخلاقيا ..! لااا والمصييبة بعضهم يشوفونهم بشهر 5 ,, ويسكتون ,, ويجي شهر 12 يدقون ويقولون نبغاها المحلاات وهي المحلاات ,, مهله التبديل والاسترجاع 3 أيااام ...بعدها ما عاد يلتفتون لك , هذه قضية منازل كثيره ليه ما نعاالج المشكله ..؟!كم من زواج هدم بسبب اختيار الاهل الخاطى ترى نظرت الولد مختلفه عن نظرت امه واخته وخالته واكثر حالات الطلاق من هذه المشكله .....
ياليت اسمع ارائكم وشكرا جزيلا....
امتناااااان @amtnaaaaaan
عضوة فعالة
يلزم عليك تسجيل الدخول أولًا لكتابة تعليق.
نــــجــــديــــة
•
انا مع شوفة الام أول معليش ياقلبي أبي أعرف العائلة واتعرف على الأم واشوف البنت انا اعرف بولدي ومجتمعي ابي وحدة تناسبنا في عاداتنا وتقاليدنا انا ما اجي علشان الشكل فقط لا الام لها نظرة يمكن ما يعجبوني وما فيه داعي الولد يجي كذا احسن للبنت انها تنرفض من الاهل ولا من الرجال صعبة بعد كل يوم رجال جاي يطل في وجه بنتي لكن المفروض ام البنت تسأل وتتحقق من جديه ام الولد اولا وتتعرف عن كل شيء يتعلق بالولد وتشوف بنتها عاجبتها المواصفات المبدئية او ترد ام الولد من البداية حتى ما تكون بنتها فرجه المشكلة في أم البنت ما تصدق احد يطق الباب وتعالوا تفرجوا هنا الخطأ لكن انا يستحيل اخلي ولدي يروح يشوف بنت انا ما تعرفت عليها وعلى اهلها هذا زواج ومصاهره ونسب لازم يكون فيه اقتناع وتوافق بين العائلتين هذا اللي انا اشوفه انا أم عندي بنات وعندي اولاد والله يرزق ابناءنا وبناتنا وجمع المسلمين
dalya119
•
هذا موضوع حساس ومهم
للأسف طريقة الخطبة بهذه الطريقه خاطئة جدا في نظري
والمفروض أهل البنت لايوافقون على هذه الطريقة وذلك مراعاة لمشاعر الفتاة
وخاصة الذين إذا ذهبو لا يردون برد سلبي أو إيجابي
وما أقسى لحظات الإنتظار وما أقسى الرد السلبي ( لا أريد أن أذكر تشبيه )
وياحبذا يكون هناك وعي وحكمة من قبل الطرفين (الأهل )
وبالنسبة لمجتمعنا لأن رؤية الخاطب وقتها قصير جدا فلا مانع أن يروها الأهل أولا
ولكنننننننننننن بطريقة غير مباشره وبدون أن تشعر الفتاة بذلك
وليس بالطريقة التي ذكرتيها والتي يسير عليها أكثر الناس
لأنها صدمة للفتاة والبعض قد تترك أثر وقتا طويلا أ و مدى العمر
تحياتي لك
الصفحة الأخيرة