السلام عليكم ورحمه الله
خواتي كما هو معروف عندنا حنا البكريات بعبع الولاده والاستفهامات الي مع كل شهر تزيد فوق روسنا
والفضاوه الي مخليتنا ننط بكل موضوع فيه ولاده
وهاك من تجارب الخلق الي يمدح والي يسب والي يمني والي يحذر
الزبده من كل هذا حبيت استفسر من الخبيرات وافيد خواتي الحوامل
عن عده نقاط ياليت توضحونها لنا علشان ماتطق ساعه الصفر ونجيب العيد بطريقه او باخرى

نبدا بالاسئله<< استعيني بالله وابدأي الاجابه خخخخ

1- لمى الحامل يطق براسها ابليس ويقول وش رايك تطلعين ولدك هاليومين وتركب راسها الا ماتولد هاليومين هاك يامشي وشرب مااعرف ايش وبهدله عمرها
طبعا بعد مانعمل سونار ونتاكد من وضع البيبي والحبل السري وان الولاده بااذن الله طبيعيه نبدا بمحرضات الولاده
الي تحرض للطلق اهمها المشي ,,
السؤال مع المشي ايش افضل الاعشاب الي تساعد على بدء الولاده
2- اذا رحمك ياحلوه طبه الزار وبدا يطلق ياترى ايش الي يحمي الطلق وايش الي يفتح الرحم مو نزيد الطلق والرحم متنح مقفل وبعدها اجهد الولد والعن خير الرحم واخرتها 4 سم وساعتها جد اعوف العافيه
ناس تقول عن الحلتيته بس مااعرف استخدامها بالضبط للتحريض للولاده والا تسريع الولاده(فتح الرحم)

3- ابره الظهر بغض النظر عن اثارها ايش نظامهم معاها بالضبط
متى تنطلب يعني مثلا مو قبل 2سم ولا بعد 4 سم

4- التروش بالمويه الحاره متى يكون اول مااحس بالطلق والا بعد ماتنزل المويه والا متى بالضبط لان وحده مدحته لي مره وقريت بالنت وحده تسب فيه,, لاني متخوفه بعد ماتنزل مويه البيبي خلاص يفتح الكيس الي عليه اخاف اتنقع بالمويه ويدخل عليه جراثيم وميكروبات هو ورحمي بغنى عنها

5- حابه اول مايجيني الطلق واتاكد انها ولاده اروح للمستشفى اعمل سونار ياترى المستشفيات الحكوميه تقبل هالشي والا يسحبون علي
لاني ابي اولد وانا متطمنه على النونو وضعه والحبل السري ماله داعي اجهد نفسي واخرتها الاخ جالس والا اتعبه والحبل ملتف على رقبته لاسمح الله ,,

6- الطلق الصناعي ماهيته بالظبط؟؟ متى يعطونه وفايدته هل هو يسرع فتح الرحم واذا كان هذي فايدته ليش الحريم يسبونه ويقولون يتعب الام والبيبي واحنمال لاسمح الله زيادته تفجر الرحم

واخيرا فيه كم معلومه براسي ابي اتاكد من صحتها :

1- لابدت الولاده خلاص ,,مايمدحون المشي يقولون يهد الحيل ويبهدلك انتي والنونو,الافضل الاسترخاء والتنفس بالطريقه الصحيحه ,, وانه المشي قبل الولاده افضل مو لاطاح الفاس بالراس

2- ماتبدا الوحده تدفع النونو والا تحاول تطلعه الا لاوصل الرحم 10 سم والا قبلها بتعرض نفسها لتهتك الانسجه والنزيف

3-فيه مخدر بعد الخياطه يؤخذ من الصيدليه ويستخدم لحد الخيوط ماتطيح واتوقع انه ينحط على الكوتكس(الفوطه)

4- اذا الوحده طوفت شهرها لازم تولد بعد اسبوع من العاشر لان المشيمه تبدا تتهتك << يعني بتجيب عيد الولد

وبش خلاص << مصختها

وشاكره جزيلا للي ترد علي هالاستفسارات ربي يهون عليها كل صعب وييسر لها كل عسر قادر ياكريم

["ربي يقومك بسلامه يارب بس اسمع عن المشي والماء الدافي وخلي كل شي على الله
من توكل على اللهـ كفـــــــــــــاهـ
الله واكبر كبيرا والحمدلله كثيرا وسبحان الله وبحمده بكرة واصيلا
الابتسامة لغة لا تحتاج إلى ترجمة ،هي أجمل شيء في الوجود
وسلاح للحياة والعقل ، بل هي مفتاح ٌ للقلوب
فعلها لا يكلف شيئا ، ولا تستغرق أكثر من لمحة بصر
لكن أثرها يخترق القلوب ، ويسلِبُ العقول
ويذهب الأحزان ، ويصفي النفوس
ويكسر الحواجز مع بني الانسان
الله واكبر كبيرا والحمدلله كثيرا وسبحان الله وبحمده بكرة واصيلا
الله اكبر كبيرا والحمدلله كثيرا وسبحان الله وبحمده بكرة واصيلا


الساعة الآن 08:25 .