إلى كل من تنوي استقدام عاملة اندونيسية .. أحذذذرك !!!

بنات بدخل في الموضع على طول والله من كثر الحرة الي فيني ..

ومن خوفي وحرصي عليكم حبيباتي ..

ما ودي يصير لكم مثل ما صار لي ..

حسبي الله ونعم الوكيل ..

اللهم اأجرني في مصيبتي واخلفني خيراً منها ..




القصة ومافيها إني استقدمت خادمة اندونيسية قبل ثلاث سنين من مكتب استقدام في الرياض ..



اسمه مكتب الحمود ..


وللأسف لما جت كانت وحدة ما تخاف الله وعملت لنا سحر لقيته أنا بنفسي سبحان الله الي صرف عنا الشر ..

لقيته بالحوش مع بقايا الأكل الي أحطها عادة للطيور .. وانصدمت لما شافتني أقلبه بإيدي قالت خليه يا مدام هذا أكل عصفور .. حسبي الله عليها الخبيثة ظنتني ساذجة وبصدقها .. طبعاً كان واضح إنه سحر عبارة عن شعر وخيوط وقطع موكيت وريش طيور .. أخذته على طول وعطيته زوجي ومن لحظتها وديناها الشرطة بعد ما فتشناها تفتيش دقيق وسفرناها باعتبارها رافضة العمل .. وطالبنا المكتب ببديلة ..

وهنا المشكلة .. صار المكتب يقول لا تسفرونها أنا بقنعها تشتغل ولا همه من سالفة السحر .. أهم شئ ما يخسر يجيب لنا بديلة عنها .. بس رفضنا إنه يقنعها وقلنا له كتبنا عليها محضر عند الشرطة .. فاضطر بعدها إنه يعوضنا ببديلة وجلسنا تسعة شهور ننتظر البديلة .. وحسبي الله عليها وعلى هالمكتب جتني وحدة أشد لؤم وخساسة من الأولى وراعية كريمات ودلع !!! أكيد فهمتوا قصدي .. بس حاولت أتحمله شهر قلت نشوف نهايتها معاها .. وبعد شهر كنا مسافرين لجدة وهي معانا ويوم وصلنا مطار جدة ويفتشونها أمن المطار بدقة سبحان الله ماعمري شفتهم يفتشون زي كذا بس شكلهم شكوا فيها المهم وخلوها تفك حزام لابسته من تحت الملابس والله على الرغم من إني حريصة أفتشهم أول ما يجون بس مدري كيف مانتبهت لهالحزام .. ويلقون داخله فلوس مجمعتها شكلها من عند عيالي خمسات وعشرات وريالات .. وتعليقة ذهب لبنتي والمصيبة الأعظم شعر وخرابيط .. على طول قاموا يحذروني منها في المطار .. قالوا نصيحة سفريها شكلها غير مريح أبد .. عاد أنا مقروصة من سحر الأولى حسبي الله عليها (وللمعلومية وداه زوجي لشيخ وقال سحر وقرأ عليه وفكه الله يجزاه خير) ..
طبعاً سفرنا الثانية وخسرنا فيزة وتذاكر وقيمة البديلة يعني يمكن خسايرنا تجاوزت 12000 ريال..
ادعوا لنا الله يجزاكم خير إن ربي يعوض علينا ..

الي يقهر في الموضوع إن زوجي لما جينا نقدم هالسنة أصر يقدم من نفس المكتب لاعادت عليهم .. وحاولت معاه باللين وبالهواش وهو مصر على رأيه وقدم منهم واشترطنا عليهم شروط .. تخيلوا وش قالوا وهذي أولتها .. قالوا حنا غير ملزمين بشروطك وأقنعوه إن المسألة حظ ونصيب .. ومع هذا سكت ودفع لهم وانتهى كل شئ .. وطبعاً وصلت هالجديدة من خمس أيام تقريبا ومافيها من شروطنا شئ حسبي الله عليهم .. ومع هذا قلنا نمشي الحال .. العمش ولا العمى .. واليوم تدرون وش سوت .. والله وبدون أي مقدمات .. هربت ..
وخلتنا في حالة ما يعلم فيها إلا ربي .. أيام عيد وتعرفون شغل هالأيام .. وغير كذا الدوام بعد كم يوم بتورط ..
المهم إن زوجي من مركز لمركز شرطة ومكافحة التسول وحاااااااااااالة .. الله يحاسبها وياخذ لنا حقنا منها ومن هالمكتب .. والغريب في السالفة إني اتصلت على أختي وجالسة أشكي لها .. قامت تتحسب على هالمكتب قالت لي حتى شغالتها الي سوت لها سحر من كم سنة ( وهذي لها قصة ثانية عشناها كلنا معاها الله لا يوريكم) .. جاية هالشغالة من نفس المكتب ( الحمود ) الله لا يربحهم .. وأختي الثانية كانت مقدمة منهم وجتها برمضان ورفضت العمل عندهم ونقلوا كفالتها واستقدموا من مكتب ثاني وجتها وحدة في أقل من شهر وتمام ما شاء الله ..

المهم إن السالفة يابنات الي قاهرتني إن كل هالقصص حصلت في عائلة وحدة بسبة هالمكتب السئ وهذي أقل كلمة أقدر أقولها في حقهم لا ذمة ولا ضمير ولا صدق في التعامل ..

مع العلم إن كثير من عائلتنا مقدمين من مكاتب غير ..وكلهم ماشاء الله تمام حتى الي جايين جديد .. على الأقل يلتزمون بالشروط وحريصين على رضى العميل ..

وأنا ماكتبت هالموضوع والله إلا حتى أحذركم لايصير فيكم مثل ما صار لي خساير وسوء تعامل ونصب واحتيال ..

الله يعوضني ويعوضكم بصحتنا وعافيتنا ويبارك لنا في أزواجنا وعيالنا يساعدونا ونستغني عن هالخدم ..

لا تنسوني حبايبي من دعوة تريح قلبي .. الله يريح قلوبكم ويسعدكم ..