بسم الله الرحمن الرحيم...
السلام عليكم ورحمة **** وبركاته
عيد أضحى مبارك للجميع...أعاده الله علينا باليمن والمسرات...آمين
كيف الحوائيات الطباخات....طبعاً مريحين من الطبيخ والنفيخ أيام العيد...
ها كيف المعمول حقكم كان لزيز....هاااا....؟؟..........((طبعاً أكيد لزيز...مو من يدكم...)):cook:
المهم ياستات...بعد الفرفرة في جميع منتديات الطبخ...تعبت رجولي من الفرفرة...هههه
أدور على معمول حجازي حق ستاتنا العواجيز.... يعني اني البنوتة الصغيرة:04:....
أبغى معمول حق مكة والمدينة طعم الحواري والأزقة...الله يرحم زمان الحاجات الحلوة كلها...
طولتها وهي قصيرة...
المقادير
5 ك.ك دقيق
2,5 ك.ك حليب بودرة
1 م.ك خميرة
1 ك.ك ماء ((ممكن تزودي بس شويه اذا احتجتي))
نصف ك سكر
1 ك.ك زيت عادي
1ك.ك زبدة ذايبة أو سمن...بس أفضل زبدة...
1 م.ك بهارات المعمول تجي جاهزة ...ولو ماعندك حطي بهارات مطحونة((يانسون-شمر-خميرة حج-هيل-محلب-...))
الحشوة:
تمر بدون بزر و شوية قشطة وشوية من بهارات المعمول رشة بس...وسمسم محمص..ممكن تستغني عن السمسم..
الطريقة:
1-تجيبي خلاط الكيك أو العادي وتحطي فيه الحليب والزبدة والزيت والموية والسكر والخميرة والبهارات وتخلطيها حيكون عندك خليط سميك شوية..
2-حطيه على الدقيق اللي انت مجهزته وبسيه يعني افركيه بيدك...لو زبطت العجينة وحسيتيها متماسكة كان بها اذا لا يبغالها حطي شوية مويه في اللي بقي في الخلاط من الخليط اللي سويتيه..وأفركي أفركي...الين ماتمسكي وصلة وتكوريها وتفرديها فيدك وتزبطيعني تكون متماسكة مومفتفته..
3-بعد كدا سوي كورة بالعجينة وافرديها على يدك واحشيها بالتمر و بعد كدا شكليها زي ماتبغي بالقوالب حقتها..بعد كدا رصيها في صينية وحطيها في فرن حار...
عادةً ماتاخد وقت..
شوية من تحت وشوية من فوق ..مولازم تحمريها بس تصير شقرا...((ههههه أهم شي شقرا....))
وبعد كدا طلعيها واستمتعي بالطعم الجميل...طعم منجد قديم...
يرحم أيام زمان وأهل زمان...
ملاحظة...
أنا ماكان عندي زيت عادي فحطيت زيت زيتون وكنت خايفة من النتيجة...بس الحمدلله جات سليمة....وطلع ماشاء الله مرررة لزيز وبشهادة زوجي العزيز وأهله...((طبعاً أهم شي أهله...أهم شي بياض الوجه...هههههه))
جربوها ماراح تخسروا...وأدعولي بالهداية والثبات...
يلزم عليك تسجيل الدخول أولًا لكتابة تعليق.
بترفلايm
•
يسلموووو يا عسل
الصفحة الأخيرة