باركولي بسكن بيتي وابي مساعدتكم واقتراحاتكم ,,يوجد صوره لمخطط البيت

السلام عليكم ورحمة الله وبركاته



خواتي الحمد لله بيت العمر قرب يخلص

بنرتاح من هم الضيق والاجار

وبيبدا هم جديد ,, هم الصبغات والاثاث ووووو

ابي اخذ رايكم

هذا مخطط بيتي طبعا فيه قسم للرجال مجلس ومقلط ودورة مياه بس مارسمتها

mkhTT_byty



اسألتي //
1// وش رايكم في الغرفه اللي جنب المطبخ( غرفه 1) زوجي يقول حسب المخطط انها مستودع او مخزن للمؤنه يعني بيحط الثلاجه والفريزر ورفوف للمواد الغذائيه وغيره
وانا اقول لا بخليها غرفة قعده لي ولعيالي يعني طبعا البيت كله سيراميك بحط زوليه كبيره وتلفزيون وجلسه ارضيه مناسبه للاستخدام اليومي ونتغدا ونتسدح فيها انا وهم
بما ان الحمام اللي بالصاله يخدم مقلط الحريم فاابي الصاله دايم نظيفه ومافيها حوسة البزران ذا منسدح يشوف الكرتون وذا يرسم وذا يلعب وذا ينطط فهمتو علي

ابي اذا جا احد يشوف الصاله مرتبه بما انها قلب البيت تكون مافيها زحمه ولا قرابيع وكل ماجا احد اقعد الم
واذا حرمه تبي الحمام اروح اشوف الطريق قدامها شي

هذي وجهه نظري

زوجي يقول عشان مايصير زحمه بالمطبخ ويصير شرح ..



2// مقلط الحريم
(الغرفة الوحيده اللي اعلن زوجي الاستسلام وقال اصبغيها واثثيها على كيفك :35:بشرط مالك دخل بمجلس الرجال اسويه على كيفي ,, وافقت وانا حاطه يدي على قلبي الله يستر)

شفت الصبغات وعلى قولة المثل تبي تحيره خيره
مابقى صبغه بالنت ماقلت ابيها وفي النهايه احترت واحس راسي يلف

ابي شي حلو ومو غالي مره يعني معقول

شفت هالصوره وهي ورق جداران وذااااابت تسبدي عليه

60119_439276963770_640203770_4



60521_439276703770_640203770_4



الله يهنيها بغرفتها

طبعا البويه ابيض والمخطط هو ورق جدران بس مقطع بالطول لونين اخضر وسماوي

تنفع لغرفة جلوس والا لا؟؟

طبعا الالوان اللي في بالي فوشي - كرزي - بنفسجي - ليلكي وتدرجات هالالوان

والكنب ساااااده ومتصل لونه فوشي غاااامق على كرزي<< متوحمه علي هاللون:35:

يعني الجدران واحد مشجر مشجر والباقي مقلم والكنب ساده والاكسسوارات بين الذهبي او الفضي عشان تعطي شوية فخامه

هل ورق الجدران غالي كم يكلف لغرفه 4*5 وهل يصلح لملقط الحريم والا الصبغه افضل

ابي اقتراحاتكم...........

3/// بالنسبه للحمام بما انه يخدم الصاله ومقلط الحريم قررت انه يكون مقفل ويكون بس للضيوف
ونبني حمام خارجي لاستخدام الشغاله او الاطفال

ادعو الله يهدي زوجي ويوافق لانه الى الان معترض وبالاخير عشان يسكتني قال : لاسكنا يصير خير:mad:
الحمام لون البلاط والطقم ابيض (ان شاء الله ) وفيه شويه لون عنابي في البلاط

4//الصاله :
وش تقترحون احط فيها بما انه في زاويه يمكن احط فيها كنب او ,,
مابي فيها tv لانه انا عندي قناعه اي مكان فيه tv يكون فيه جلسه وازعاج وحوسه
وش تقترحون اخلي الالوان كلاسيك بين الترابي البيج والني والا؟؟

,,,,,,,,,,,,,,,,,,,,,,,,,,,,,,,,,,
والدور الثاني عباره عن 4 غرف نوم و3 دورات مياه

5/// غرفتي: هم ماينلم
السيراميك سكري فاااتح
الغرفة ناوية باذن الله بني محروووق لان من تزوجت غرفتي بيج ابي اغير
وش تقترحون البوية او ورق جدران وش الالوان؟؟


,,,,,,,,,,,,,,,,,,,,,,,


غرفة بنتي// مابيها لون واحد افكر تكون مكس بين الوردي وعدة الوان مثل كذا

chambreemmaavezdecorech


والطقم اتوقع اخليه ابيض احلى اقصد السرير والدولاب



,,,,,,,,,,,,,,,,,,,,,,,,,

غرفة الاولاد// مابي ازرق يمكن يكون اخخضر وابيض وشوية برتقالي او اصفر مثل كذا

29712_128266347185814_10000007


get-8-2009-ca0m1xpv

والطقم اخليه ابيض او خشبي فاااتح


,,,,,,,,,,,,,,,,,,,,,,,,

ابي اقتراحات وصور او افكاااااااااااااااااااااار