السلام عليكم ورحمة الله وبركاته
أخواتي العزيزات في عالم حواء :heart: وفي أي موقع على هذه الشبكة
قرات قبل أيام موضوع لإحدى الأخوات هنا عن هل أحد تعرف عليك في المنتدى أو أنتِ تعرفت على أحد أي اكتشفتيهم من خلال ردودهم
أقول لكم بقلب عامي ... :icon31:
يعني حضرتك جالسة تطقطقين في عالم حواء وتقرين هالردود إلا تولع الكشافات الي بمخك
وتنطلق أصوات الإنذار في راسك لتعلن عن حالة ذكاء خارقة من خلال كلام كتبته هالعضوة لتعلني في نفسك بكل ثقة ان هذي العضوة صاحبة هالموضوع فلانة جارتك أو أنها زوجة أخوك أو أنها صديقتك .. وهلم جرا ...
يا أخوات يا حبيبات
يعلم الله ما كتبت هالموضوع إلا عن يقين بأن مثل هالحلات حاصلة وفيها خراب بيوت!
تعرفين وش السبب ؟؟؟؟
لأنه وببساطة العضوة الي انتِ جزمتِ خلاص انها فلانة في الحقيقة والواقع ماهي فلانة أبد .. :unsure: !!
وش رايك الحين ؟!
صراحة موقف صعب جدا ..
يعني وانا اقرأ ردود البنات في الموضوع الي ذكرت قريت وحدة من الأخوات تقول انا كشفت زوجة أخوي من موضوع فيه صورة صينيتها ورحت وقريت مواضيعها لقيتها تتكلم في أهلي كلام صدمني وكرهني فيها !
يعني بالله يابنات هالصينية ماصنعوا منها إلا صينية وحدة لزوجة أخو هالعضوة بس ؟! :confused-
بالله مو حرام تشك انها هي زوجة أخوها
أنا ما أدري وش وضع هالصينية يمكن فيها علامة يمكن شيء لكن ممكن جدا جدا جدا انه يكون فيه مثل هالصينية وبنفس العلامة 10 صينيات في هالعالم !
تدرون وش المصيبة إذا كانت أوضاع البنت كاتبة الموضوع تشبه زوجة أخوها يعني مثلا عندها طفل او طفلين وهذي زيها
أهلها في مدينة ثانية وهذي مصادفة صايرة مثلها هذي كلها أمثلة أنا كاتبتها الحين لكم أخاف يكون كلامي مطابق للي حاصل بينهم وتحسب اني انا كاتبة الموضوع فزعة جاية من طرف زوجة أخوها :blink:
وكثير كثير أشياء مثل هالأشياء تكون متكررة وتتطابق بعض تفاصيل الحياة مع اختلافات دون شك لكن التشابه هذا للأسف الشديد هو الي بيضيع ناس كثير بسبب شكوكنا وتوقعاتنا الي مالها داعي
:11retcher
يا بنات وربي شاهد علي اني قريت أكثر من رد لوحدة من العضوات اسمها نفس اسمي اللهم انها حاطة فوق الشدة فتحة وانا اقرأ الرد أقول بسم الله متى كتبته يعني أنا ما استغربت محتوى الرد لا
لكن استغربت متى انا كتبته إلا انتبهت وقتها ان البنت اسمها نفس اسمي
والسبب ان الكلام الي قريته في الرد نفسه طبق الأصل صار معي ولو اني رديت على هالموضوع كنت برد بنفس الرد الي كتبته هالعضوة
لاحظتوا يا بنات ؟
يعني انا نفسي شكيت اني انا صاحبة الكلام :biggrin: وش حال العالم الي يشكوا في غيرهم ؟!
يعني كل وحدة تحسب انها أم الذكاء والفطانة ولازم تثبت لنفسها انها عرفت فلانة وعلانة وهالمعرفة للأسف تظلم غيرها وتظلم نفسها بعد والظلم الأكبر لو انها نشرت هالشيء بين الي حولها ..:eek:
حبيت أنبهكم لأني فعلا أشوف هالشيء يحز في الخاطر ويضايق وما أتمنى أنكم تمشون فيه أو تخلوه يشغل حيز من حياتكم لأنه ممكن يدمرها .. أو على الأقل يفسد كثير من حلاوتها
وجزاكم الله خيرا