نصيحة عن تجربة

نصيحة عن تجربة

لاحظت في كتير مواضيع الزوجة بتشك بزوجها انو في الو علاقة او سر بالموبايل وبتروح طبعا هي بتتجسس على كل حركة بعملها عشان تكتشف شو في عندو وشو مخبي

راح احكيلكم قصتي من هالناحية وشو عملت واديش ارتحت بس نفذت هاي الخطوات وبتمنى انكم تعملوا زي وتستفيدو

اول شي انا زوجي متفنش من الشغل صارلو كم شهر وانا بشتغل يعني هو فاضي طول الوقت وانا مشغولة طول الوقت وهو عندو موبايلين
لاحظت انو واحد من موبايلاتو دايما معاه مستحيييييييل يسيبو حتى لما يروح عالحمام بدور على الموبايل بلاقيه اختفى لما انام بصحى من النوم بسير ادور عليه ما بلاقيه كمان مختفي وسرت ادور ادور قبل ما هو يصحى في الاخر اكتشفت الموبايل محطوط بالدرج جمب السرير ومغطيه وداااااااائما على السايلنت ولاحظت لما اعد جمبو ويجيه مسج عطول بحذفو انا بلش الفار يلعب بعبي ايييييييييش في؟ شو صاير شو عندو معقول من الفضاوة بحكي مع حد وميت فكرة وفكرة صارت تيجي براسي ومرة وهو بالحمام استغليت اللحظة وطلعت الموبايل من الدرج ورحت على الرسائل ما لقيت اشي بس شو قلبي كان بالارض ميته خوف يجي ويمسكني وطبعا اذا مسكني خلاص الثقة بينا انعدمت
بعدين فكرت وفكرت فكرت وشفت هون اديش قصص صارت بسبب التجسس على الموبايل واديش ناس انخرب بيوتهم وزوجي عمري ما شفت عليه اشي الحمد لله بس الشيطان كان يوسوسلي تعالوا احكيلكم شو عملت:

اولا : سرت ادعي دعاء تسخير الزوج , استودعو الله دايما ,دائما استغفر الله واحكي ((ربنا هب لنا من ازواجنا وذرياتنا قرة اعين واجعلنا للمتقين اماما)) وواظبت على قراءة سورة يس يوميا
ثانيا : دايما بتعوذ من الشيطان الرجيم
ثالثا :حكيتلو قصة عن صحبيتي كيف زوجها ضحك عليها وسبحان الله الله كشفو ((يعني شو ما تعمل الا ما تنكشف بالاخر ((
رابعا: حاولت اني ازيد ثقتي في هومافي أي سبب بخليني اشك فيه
خامسا :من كتر ما قرات قصص كيف اكتشاف خيانات الزوج عن طريق الموبايل والتجسس عليه شو ممكن يعمل حكيييييييييييت مستحيل اني افتح موبايلو يعني حتى لوبخون وعندو علاقة وهو بنفس الوقت بحبني ومسعدني وكريم معي وحنون معي يمكن نزوة يمكن معاكسة يمكن وحدة بتركض وراه بالاخر يومين وراجعلي وبحكي وهو اصلا مستحيل هيك يعمل


والنتيجة الحمد لله ارتحت نفسيا وشلت الشك من قلبي لدرجة انو الجمعة طلع على صلاةالجمعة وساب الموبايل بالبيت وكان ادامي الموبايل وبامكاني اني افتحوا وافتش فيه بس قاومت حالي وحكيت لشو اجيب المشاكل ووجع الراس ويعني معقول فيه اشي وسايب الموبايل بالبيت تحت ايدي؟؟؟وصار دايما تارك الموبايل ومحطوط ادامي يعني سبحان الله الشك الي كنت فيه كان بس بسبب الشيطان الي بركض وراي بدو يخرب بيتي

فنصيحة خواتي لا ثم لا ثم لا تفتحوا موبايل ازواجكم وتتجسسوا عليهم يعني اذا انتي مرتاحة مافي داعي تركضي ورا خراب بيتك وتركضي ورا النكد والزعل وتخلي الشيطان يزرع الشك بينك وبين زوجك