السلام عليكم ورحمة الله وبركاته
مـــد خ ــــــــــــــــــــــــــل
ألا يا قلب لا تحزن.ترى دنياك ما تسوى...
جيت ولقيتها تصيح !
والكحل سايل على خدودها ..!
- وش فيك ..؟
ضحكت تتهرب : مافيني شيء .. بس من العدسات لمن شلتها ..!
عرفت انها تصرّف .. قلت : عن اللكاعه جد وش فيك ..؟
سكتت !
استهبل عليها .. طيب اذا مستحيه مني اكتبي لي بورقه !
قالت : ولا شيء وبلا استهبال ..
سكتت شووي وقالت تذكرت فلانة الله يرحمها ..!
قلت : ودي اصدقك
بس اعرفك منتِ من النوع اللي يصيح على الموتى .. الحين جاية تقولين تذكرتيها بعد ما تحللت الحرمة بقبرها !
ضحكت دليل اعترافها بكذبتها البيضاا .. وقالت : مو شغلك ! << بالله ماني نششششششبه
ادري ان سبب صياحها كلها مجرد تخيلات تراودها وتحس ان هالحياة ظالمتها ! ومحد فاهمهاا ..!
ليه بعض الناس كذاا !!
يدورون اي سبب عشان يصيحون .. كنهم يلقون بالصياح والحزن مُتعه !
يحسسونك ان حياتهم كلها دراما وحزن ولا مسلسل اسوار =(
وحده من صديقاتي كذاا ..!
تكلمني وتصيح ! فلانة طعنتني بظهري ومحد فاهمني ومحد راح يفهمني <~ ليه انتي معادله !
واذا يعني طعنتك واكتشفتي انها مو " صديقة "
احمدي ربك انك عرفتي هالشيء بدل ماتستمرين معها وانتي " مغفله " والمويه ماشية من تحت رجولك ..!
كل شيء يصير لك قوولي : ان شاء الله انها خِيرة ..
احسني الظن ب ربك
ماكانت كذاا " اقصد صديقتي " .. كانت اجتماعيه وجلستها ماتنمل .. يوم دخلنا الكليه شووي شووي تغيرت ..
الين ماصارت منعزززززله .. تمشي لحالها تجلس لحالها بالقاعه نلقاها لحالها .. ماتنزل تفطر ..
شعرها و مكياجها يذكرك بالايمو .. :/
كل كلامها عن الدنياا وظلمها وغدرهاا ..
مع اني اشوف العكس !
امها بمثابه صديقه لها ..
اختها اللي اصغر منها تحبها وتخااااف عليها وحافظة اسرارها .. خالتها بعد كأنها صديقه لها ..
بصحة وبعافيه .. مستورة وما احتاجت لاحد !
ليش مايشوفون الايجابياات اللي عندهم .. وينحصر تفكيرهم بالسلبيات اللي صارت لهم !
حتى وان كان فيه سلبيات .. نقدر نحولها لشيء ايجابي لو فكرنا صح !
ونخليها دافع لنا ..!!
ليه ماتقول الحمدلله ربي رزقني بأم وأب .. غيري فاقد احدهم او فاقدهم كلهم .. او مايعرفهم لانه " لقيط "
عندي بيت يلمني انا واهلي .. عندي اخوان واخوات .. بعضهم تتمنى يكون لها اخ !
احط راسي ع المخده واكبر همي ان محد يزعجني !
غيري مايقدر ينام من الرعب اللي حوله .. مايضمن هل يمديه يشوف الصبح والا لا !
غيري ينطرد من بيته ولايقدر يقول لا !
آكل واشرب وبوقت البرد القى شيء يدفيني وبالصيف المكيف على راسي .. وبحياااااااااتي مانمت ميته جوع من الفقر او قلة الحيله !
ما اضطريت اروح الجمعيات الخيريه او اطق بيبان الناس ادور شيء آكله !
شايله هم الزواج والا انك تنحفين والا بشرتك تصير احلا والا شعرك مدري شلون تبينه !
غيرك قاعد بالمستشفيات بالاشهر .. غيرك فقد شعره ونحل جسمه وتدهور حاله بسبة الادويه !
غيرك طلعت جروح بجلده بسبب السرير اللي هو عليه من شهور !
غيرك انتفخ جسمه وتدهور حاله وتغير لو عيونه لـ أصفر .. و كل اسبوع يسوي غسيل كِلى وينتظر احد يتصدق عليه بـ كِليه !
غيرك تبي تموت عشان تسمع كلمة " مبروك انتي حامل "
غيرك عندهم اولاد مشوهين والا معاقين والا متوحدين و ماينامون الليل بسبتهم !
غيرك طول عمره يتمنى يوقف على رجوله !
غيرك بغيبوبه ومايدري عن اللي حوله من اشهر وبعضهم من سنين ..
غيرك مايقدر يسوي شيء سوى انه " يرمش بعينه "
غيرك منى عمره يشووف وجه امه والا ابوه .. والا اولاده لانه " كفيف "
غيرك انخطف ولده والا هج ومايدري عنه بالاشهر والا بالسنين هو حي والا ميت والا راح يجاهد بالديرة الفلانيه والا صار ارهابي !
غيرك تغرب عن اهله بالسنين عشان يدور لقمة العيش ويعف نفسه عن الناس !
غيرك فقد اهله كلهم او ثلاث ارباعهم او حتى احدهم او فقد احد اعضاءه وصار عاجز بسبب " حادث "
لاناظرت بواحد يالله يقوم .. وشعره ثلاث ارباعه ابيض .. وبيده مكنسه ويكنس في هالشوارع عز القايله والا بنهار رمضان والناس صيّاام ..
تقول بنفسك يالله ! وصل لهالعمر وهو للحين يكدح ويشقى .. متى يرتاح متى يرجع بين اهله وبديرته !
انا وانا تووي بعز الشباب ما اضطريت اكنس شارع والا اتغرب عشان اعف نفسي !
كل هذا وتحسون الحياة ظالمتكم !!!!
غيرك وغيرك وغيرك .. لو ناظرتي في حالهم وكيف متأقلمين معه وحامدين ربهم وشاكرينه تحس بمدى سخافة تفكيرك !
وان مافيه شيء يستاهل " دموعك "
" اللهم لك الحمد حتى ترضى ولك الحمد اذا رضيت ولك الحمد بعد الرضى "
قريتها وعجبتني قلت انقلهاااااااااا لكم علشان نحمد الله على كل شي ونتفائل دائما
مــــــــــ خ ــــــــــــــرج
باكر أنا موعود بضحكة:27:
جمرة وفاي احرقتني @gmr_ofay_ahrktny
محررة فضية
يلزم عليك تسجيل الدخول أولًا لكتابة تعليق.
الصفحة الأخيرة
سبحان الله العظيم