بنات الله يخليكم ساعدوني
انا عندي عزيمة لزوجي كبيرة
والعزيمة هذي من 15 رجال
ويتنافسون فيها الحريم
العام الماضي مدحوني وقالوا احسن سفرة سفرتي
والسنة هذي امس وحدة كان عندها العزيمة وجابت بوفيه من برا
سخانات وجاتوهات وغيره وغيره وغيره
انا صراحة ماعندي امكانية اجيب من برا
ابغاكم تعطوني افكار غريبة لتنظيم السفرة افكار غريبة
والطبخ وايش اسوي
ساعدوني واذا مدحوني لكم هدية كبيرةمني
انتظركم

حبيبتى حددى الأصناف إللى تبينها

إن شاء اللّه ما نقصر
أختي الغاليه خلي عندج ثقه إن دايما طبخ البيت أحلى وألذ من المطاعم وهذا شئ يبصمون عليه بالعشر الرجاجيل....

الدور عليج تنوعين بالأكلات وطريقة التقديم وصف المواعين يعني خلي فيه بهرجه زايده تراهم يحبون هالشغلات,,,مثلا... ..نقي المواعين الزينه والنظيفه وشوية مناديل وصفي الملاعق بطرق حلوه كثيره,,,((إذا تابعين فن الاتكيت علىقناة دبي يجي الصباح))

أبدئي بحلا قهوه...والموالح والمكسرات للمجالس ,,أبدئي تقديمج بالماي والعصيرات البارده وبعدها القهوه والشاهي.........مع سلة فواكه على الزاويه جمبها الصحون للي يبي,,,

العشا:: ممكن تصفينه نفس طريقة البوفيه إذا فيه عندج طاولات صفيهم جنب بعض مع مفرش كبير راقي,,وأبدئي من اليسارحسب ما بوردلج تحت,,((أعتقد أنها طريقه زينه لأن العدد عندج كبير))
واذا ما تقدرين مع عليش صفرتين كبار أو ثلاث..صفي الاكلات المتنوعه,, بالوسط يكون الطبق الرئيسي وتتدرج الاطباق الثانويه بره ولا تنسين الصحون فاضيه للسكب على زا وية الصفره,,,


1/ المقبلات سوي أكثر أختاري أربع الى ست أنواع(سلطه,سوتيه بالمايونيز, سلطة بطاطس,حمص متبل,سلطه خضراء ,فته,تبوله ,سلطه ايطاليه,سلطة خضار ورق عنب .سلطة بالشطه, سلطة قيصر,,يفضل تسوينها الصباح وتحطينها بالثلاجه بدون ما تبلينها,,

2/ أختاري نوعين شوربه( العدس+ طماط+خضار+ملفوف+ وب مشروم_سوب دجاج+ سوب بطاطس+شوربة الهريس)هم سويها بدري عشان تقدرين تسخنينها وقت التقديم

3/ الاطباق المسانده في نوعين المقليات أو شغلات الفرن
أولا المقليات مثل (فطاير المقليه بأي حشوه تحبينها+سمبوسه+ سمبوسك_ ربيان بالبقسماط
كانالوني+أجنحة الدجاج المحمره فخوذ الدجاج **طبعا هي فطاير مش دجاج اكيد تعرفينها**
بطاطس مقلي بأي طريقه**ودجز ,,مبهر,,عادي**
وأفضل تسونها قبل أيام وتفرزنينها حتى تقلينها على الوقت اللي تبينه مثلا العصر!!

ثانيا شغلات الفرن:
مثل البشاميل وخلافه ...صينية دجاج بالصلصه البيضه+ أصابع الباذنجان بالحلوم+صينية الخضار بالدجاج +صينية لحم بالبطاطس+صينية المحشي جميع الخضار أو نوع واحد+صينية البطاطس المسلوق مع الدجاج بالبشاميل

وممكن الصياني البارده مثلا شاورما الدجاج مع الخضار وتغطينها الروب والثوم + صينية المشروم وتغطينها بالخضار سوتيه مع المايونيز...

أذا تحبون المشاوي ممكن تضيفين طبق منها....

ورايي تختارين أربع صحون من الاطباق المساعده ...أو حسب الميزانيه عندج

الطبق الرئيسي مفتوح زوجج شيحب أو حسب نوع عزيمتكم ((شبابيه =سمج دجاج ربيان ))
أو رسميه مفطح خروف وإذا رسميه لا تنسين المرق ....

المشروبات نوعي العصيرات ثلاث أشكال(تفاح ,برتقال ,منجى مع المشروبات الغازيه نوعين(كوكا ,سفن وأهم شي المويه اللي تجي جلاسات
أذا سويتي طريقة البوفيه حطيها أخر شي+وإذا طريقة السفره صفيها دار ما دار الصحون!!

الحلويات خليها بعد ما يخلصون العشا
يفضل تسونها قبل بكم يوم وياريت لو ثلاث أصناف ملونه مثل شيز كيك فراوله وشيز كيك منجي وأي حلى كاكاو ..على أساس اختلاف الالوان يفتح الشهيه,,,
وقدميها بعد العشاء,يعني((وهم يتعشون طيري للمجلس وشيلي القهاوي وزينيه وحطي ركن الحلويات مع الفواكه قريب من المدخل وبطريقج شيكي المغاسل فيه الصابون والمناشفوالعطور ات واللوشنوأعود الاسنان وياريت لوتحطين حلاو أو علك النعناع بطريقه فنيه على المغسله...

بعده بربع ساعه ودي البخور بسله كشخه مع الاطياب الزينه ,,,

وبعدين تمددي على الكنب ويعطيج ألف عافيه وأسمعي المدح اللي بيجيج!!

أنا هذي طريقتي..وجماعتي يعرفوني إذا سمعو بعشاء عندي ما يفوتونه يدرون إن فيه شي متميز صدقين يقولون لي الحريم حنا نجي من كثر مدح أزواجنا لج!!!
أتمنى أكون أفدتج ,***** الله تطلع عزيمتج توب مثل ما تعودو عليج,,
الله يفتح عليك يام رتاج ورناد دنيا واخرة
ويخليلك القماري
ويسعدك ويا زوجك
باين عليك فنانة
الحين انا مستعجلة ولي عودة
وشكلي بطفشك
سامحيني
ياسلام يا امرناد ورتاج وش هالذوق صراحة والله انك عطيتيني فكرة جدا حلوة والصراحة ماكانت عندي هالافكار لأني من تزوجت ماصار عندي عزيمة بس في المستقبل ان شاء الله اذا صارت عندي راح اتبع خطواتج في التنظيم وترتيب السفرة.
بس في شي .... وهو خسارة اني ما اعرفك ومو من صديقاتج كان مافوت هالعزيمة الراقية
والاهم انو اشووووة زوجي مو صديق زوجك كان بصير المقارنة بيني وبينك هههههههه والله العالم بالحال هههههه
موفقة ان شاء الله

أم يقين


الساعة الآن 08:51 .