مشكورة أختي مهى على هذي الفكرة الواااااايد حلوة ..
ومشكورة أختي أم نجد على التنسيق والتشجيع والتحميس بعد ...

وضيفوا اسمي معاكم .. بحاول !!! قبل لا يطوفني هذا العرض الرائع .. وأكيد ما بحصل Groop مثل هذا فيه من الحماس والتشجيع والتعاون ما فيه .. الله يبارك لنا كلنا خواتي في أرزاقنا ...

وفعلاً هي تجربة ومغامرة حلوة .. و500 درهم بداية حلوة .. وما تضر !!!...

وأنا أحب ها السوالف .. بس ما عارفة كيف أبدأ بالضبط .. وهاذي البداية من عندكم بنات المنتدى يزاكم الله خير ..
وما أتجرأ أبيع لحد .. لكن بعد بحاول ..
وعن الفكرة .. كل يوم أفكر بفكرة شكل .. وأخيراً استقريت على الشراء بالجملة ثم البيع بالمفرق ..لكن بعد شو هو اللي بأشتريه ؟؟!! طبعاً ما أفكر أبداً بالكريمات ولا بالعطور .. موب مجالي أبداً .. وأخاف أبيع على وحدة وتتحسس فتدعي علي ..
يمكن الجلابيات والشنط .. حلوووووين ....
لكن أبي منكم مساعدة .. من وين أييبهم ؟؟؟؟ دلوني على محلات البيع بالجملة في الامارات .. وهل في منها في رأس الخيمة ؟؟؟ ولا لازم نطلع دبي ؟؟؟ صعبة شوي مع ظروفي .. وشكلي يمكن أرد وأبطل ؟؟ لكن أخبركم !!! بعد بحاول !!!!
طيب وإذا ما مشت معي البضاعة بتكدس وبتطيح في كبدي ؟؟؟ ما في طريقة لتصريفها ؟؟!!

قلت لكم 500 حلوة .. حتى لو كسدت .. ما بتخسرين وااااايد ....
وسووووري على الاطالة .. كنت أفكر.. بس بصوت عالي .. أباكم تشاركوني وتساعدوني حتى في التفكير ..

ويزاكم الله ألف خير مقدماً ...
برأس الخيمه في محلات ممكن تتفقين معاهم انج تصورين بضايعهم وتبيعين لهم بدون ما تشترين من عندهم للجلابيات وانا سالت واحد وقال لي عادي ..

وفي محل براس الخيمه قال لي ممكن اذا كنت اريد يروح دبي والشارجه يجيب لي بضاعه بالجمله واللي اريده مقابل عموله له طبعا ..

وهذي المحلات انا سألتهم لما كنت أتمشى مع ولدي بشارع الكويتي وبالتوفيق حبوبه واذا تبين رقم المحل اللي يجيب بالجمله بعطيج




يزاج الله خير أم طلحة .. والله يبارك لج بولدج ويخليه لج ويرزقه وياج الجنة ..آمين ..

بالنسبة للتصوير .. حلوة .. بس صعبة شوي .. كيف أصور وفيه زباين ؟؟؟ وبعدين أحسها غير !! وممكن ريلي يعطيني طراج على ويهي .. ناس داشة وناس طالعة .. وأنا كأني صحفية بزماني !!! وأخاف يطفشون زباينة يخافون في شي مستوي بالمحل .. ونا شارلوك هولمز أدور على دلائل .. يمكن الطريقة تنفع حد غير ...

وبالنسبة للمحل اللي قلتي عنه رجاء أختي طرشيلي اسمه ورقمه على الخاص لو ما فيها كلافه " مع اني ما أدري اذا اني مفعلتنه أصلاً ولا لا مثل ما يقولون البنات أحياناً إذا ما قدروا يتواصلون عن طريق الخاص " ..
وفي ها المحل أنا أختار البضاعة وأقول له ييب لي من هذا النوع كم درزن مثلاً ؟؟؟!!! ولا هو بييب على ذوقه ؟؟ أخاف بعدين تطيح في كبدي !!!
والعمولة هاذي بحدود كم المفروض تكون تقريباً ؟؟ تراني غشيمة أول مرة أحاول .. وما أعرف شي بها السوالف !! وأبا أبدأ مع البنات بال 500 درهم وأجرب حظي .. وهذا المحل أسرع وأسهل حل مؤقتاً .. ويمكن يعجبني التعامل معاه وأستمر !!!

طيب والمحلات اللي بالشارجة ودبي اللي تبيع أصلاً بالجملة شو اسمها ؟؟ يمكن أمر في يوم من الأيام .. أكون عارفة وين أسير !!!

وبالنسبة للي ييبون بضاعة من الهند وبانكوك ؟؟ جلابيات، شنط ، جواتي " هذا اللي خاطري فيه من زماااااان " لازم يروحون بروحهم كل مرة ؟؟ صعبة لكن بضاعتهم واااايد حلوة ورخيصة بعد .. ترى الوالد يسير بين فترة والثانية وييب لنا أغراض حلوة بس ما له بارظ أنه ييب بالجملة .. وما يروح دووم عشان تعتمدين 100% على روحاته .. عطوني أسماء محلات مضمونة هناك وتبيع بالجملة .. عشان أقول له يمر مرة وييب لي أغراض على ذوقه .. ترى ذوقه موب هين ..وبعدين أخليهم يطرشولي بضايع بالشحن بعد ما أشوف بضاعتهم وجودتها وأتأكد أنها حلوة وتستاهل .. هل هذي الطريقة صحيحة ولا فيها غلط .. يمكن يطرشون لي بضاعة موب شي .. ما عارفة شو أسوي .. أتريا الخبيرات في هذا المجال ممكن تدلوني على الصح وين ... خلو بنات البلاد يتحركون شوي ..
ويزاكم الله خير مقدماً ...
عزيزتي ماث انتي مب مفعله الخاص روحي للوحة التحكم وفعليه
لووول ضحكتيني شارلك هولمز الصبح المكان فاضي مافيه ناس وبعد ممكن تستخدمين تلفون بو كاميرا يعني ما بيعرفون خلق الله بيتحسبون انج يالسه تشوفين مسج والا شي ..

المحل بعطيج رقمه بس فعلي الخاص علشان اقدر اتواصل معاج لأن ممنوع احط ارقام بالعام
العموله ما اعتقد انها وايد يعني بتحصلين ربحج من وراه لأنه يعرف انج تبين تبيعين وتشترين .. هو اساسا يبيع ملابس وشنط واكسسوارات وعطورات وشباصات يعني كوكتيل انتي ممكن تدخلين المحل تشوفين الاشياء اللي تعجبج تسألينه على كم علشان يعطيج سعر السوق وحاولي تساومين وياه علشان تشوفين اقل سعر يعطيج .. وبعدها اسأليه بالجمله على كم وهو بيقول لج .. بس انتبهي حددي الاشياء اللي بخاطرج واسألي عن سعر العادي كأنج بتشترين حبه والا ثنتين .. علشان تشوفين الفرق .. وهو يبيع بالدرزن يعتبرها بالجمله ..

وبالنسبه لمحلات الجمله ممكن تحصلين في دبي على ما اعتقد اسمه دراجون مول ؟ مادري بالضبط .. وتقدرين تروحين سوق عكاظ تسألين هناك تشوفين الجلابيات ..

والريال يقول لي انه ياخذ الأغراض من مكاتب بالشارجه يعني مب محلات الجمله ..

تدرين وانا رايحه من الشارجه لراس الخيمه مره لمحت محل بدربي مادري بعجمان على ما أظن يبيع ملابس بالجمله عاد الله اعلم كيف الملابس وشو ؟ لأني ما نزلت وكنا طايفين بالسياره .




لا خلا ولا عدم أختي أم طلحة .. أعتقد اني فعلت الخاص !!! لا تنسين طرشيلي اسم المحل ورقمه .. عشان أسير له بأقرب فرصة .. البنات بيبتدون باجر ...

وعن البضاعة اللي تنياب من الهند وبانكوك .. محد بيفيدني فيها !!! .. ياااالله .. مشكورين على كل حال ...


الساعة الآن 09:57 .