اقولها ضرس العقل يوجعني راحت حفرت سني اللي قدام وسبب لي ورم .. دعواتكم

السلام عليكم بنات

مو عارفه من وين ابدأ .. هذي اول مره اكتب موضوع شخصي بالعادة احضر كل شي بالوورد

وبعدين انزله بالمنتدى .. بس المره هذي راح اكتب لكم بدون تحضير

قبل سنه تقريباً ركبت تقويم وكان المكان اللي حددته بالحمر فيه فتحه وحولني دكتور التقويم عند دكتوره علشان تعالجه






رحت عند الدكتوره وعالجته وكملت علاج التقويم .. بعدها صار وجهي ينتفخ من جهه الانف لحد الشفه

يعني فتحته خشمي اليسار صار اكبر من اليمين ونص الشفه العلويه منفوخ معاها وكنت احس

في شي داخل .. كان يضل يوم ويختفي وكان شكلي مضحك




قبل كم شهر قعد الانتفاخ حوالي يومين ورحت عند دكتور وشيك على اسناني وقال احتمال ورم

رحت عملت الاشعه ورجعت له وشاف الاشعه وقال فعلا ورم .. وقال الدكتورة اللي عملت لك سنك حشته لك بدون تنظيف والعصب صار ميت ماراح تحسين فيه ..فاراح الدكتور وفعمل لي فتحه

بسني القاطع من ورى لانه هو خلاص صار ميت وبدأ يطلع الورم ( هو كتله خراج وانتم بكرامه )



بعد ماخلص ونظفه سد الفتحه بقطنه وحط شوية حشوه علشان القطن مايطيح لانه خايف الاكل يدخل

وقالي اسوي موعد علشان يعالجه نهائي .. عملت الموعد .. ورجعت البيت


رجع وجهي طبيعي .. اليوم الثاني طاحت الحشوه والقطنه .. وكنت اكل واشرب وبحياته ما التهب حتى الورم ماعاد شفته .. بعدها ضرسي العقل انكسر نصه والتهب علي




رحت المستشفى من الصبح وحجزت رقم وودوني عند دكتورة .. دخلت عندها وقلت لها ضرسي يوجعني

قالت انا ما اخلع بس بشيك على باقي اسنانك .. طاحت عينها على سني ابو فتحه وسألتني عنه

قلت لها السالفه قالت طيب بعالجه لك قلت لها طيب وياليتني ماقلت



راحت زادت الفتحه زيادة على فتحتة الدكتور وصار السن من ورى مفتوح بالكامل .. ودخلت فيه مثل المويه مدري قاعدة تغسل اللثه من جوى ولا ايش



المهم


بعد ماخلصت حشت سني وعبته حشوه من جوه .. قالت راح تحسين بألم بالسن بس عادي

يوم او يومين وبيروح ولا كتبت لي دواء او مسكن .. وعملت لي موعد بعدها بيوم علشان

دكتور الجراحه يخلع ضرس العقل

خلصت من عندها العصر .. رجعت البيت ومو قادرة المس سني احس مثل الكهرب

حتى غداء ماتغديت يادوب سوت لي امي شوربة



على لليل بديت احس وجهي ينتفخ وقلت لامي وجهي انتفخ صح .. طالعت امي بوجهي وقالت لا

بعد ما فرشت اسناني وانا اتألم من سني تمضمضت بمويه وملح من باب الاحتياط

نمت .. قمت اليوم الثاني طالعت بالمرايا والمفاجأة





رجع انتفخ وجهي مره ثانية وشكلي مضحك عاد انتم تخيوا شكلي بس

فتحة خشمي اليسار اكبر من اليمين لان الانتفاخ جنب الخشم وممتد حتى الشفه

يعني صارت نص الشفه العلويه اكبر من الثانيه .. امي اخترعت يوم شافتني وقالت مره ثانيه ؟



طبعاً لاقدرت اشرب ولا اكل شي .. يوم كامل وانا على عصير او حليب اللي بالمصاص

والشوربه قاعده اشربها على جنب



رحت المستشفى مره ثانيه لانه كان موعدي مع دكتور الجراحه

نادوني .. ودخلت غرفة العيادة وتفاجأت انها نفس الدكتورة .. قلت لها انا موعدي مع دكتور الجراحه

فقالت لي الدكتور مو موجود فرجعوك عندي .. بغيت اقولها لا خلاص انا ابغى دكتور

بس قلت خليها تشوف الحفله اللي صارت بوجهي .. كشفت الغطاء عن وجهي

وطالعت فيني باستغراب وشرحت لها وش صار فيني .. فقالت ارتاحي خليني اشيك

وبصراحه انا ماكنت مطمنه .. فاستودعت الله نفسي واسناني



طالعت بالورم وقالت السن عندك التهب .. بغيت اقولها ماجبتي شي جديد بس سكت

وقالت اشوف لو تروحين مستشفى ثاني افضل علشان المواعيد هنا تطول

انا حسيت من كلامها كأنها تقول ترى ما اعرف اعالجك بس شكلها ما تبغى تحرج نفسها


المهم


شالت الحشوه كلها وحطت شي لونه احمر وقالت كل ما بغيتي تاكلين او تشربين سدي الفتحه بقطن

وقالت لي تعالي لي اليوم الثاني علشان اسدالفتحه قلت لها طيب وانا بقلبي اقول ولا ما ارجع


رجعت البيت وقلت لابوي وامي اللي صار وحلفت لابوي يمين عظيم ماعاد اتعالج عند دكتورة



وصرت كل ما ابغى اكل او اشرب سديت الفتحه بقطن


اليوم الثاني رجعت للمستشفى مره ثانيه ولان ابوي مشغول نزلني وراح دوامه

رحت الاستقبال وعطيتهم البطاقه وقلت لهم ابغى دكتور مش دكتورة .. فقالوا لي طيب

بعدها بساعه نادتني ممرضه سعوديه انا يوم شفتها عرفت ان موعدي مع دكتوره

رحت معاها لغرفة العيادة اتاكد وسألتها دكتور ولا دكتورة .. فقالت لي دكتورة

قلت لها معليش انا طلبت دكتور .. دخلت الدكتورة وقالت تفضلي ارتاحي .. قلت لها معليش

انا طالبه اتعالج عند دكتور فقالت لي براحتك .. اخذت ملفي مع الممرضه ورجعنا الاستقبال

وقلت لهم انا طالبه دكتور .. فقالوا لي ممكن تتأخرين ..قلت لهم عادي ماعندي مشكله

قالوا خلاص




رجعت الانتظار وبعد ساعة ونص نادتني ممرضه سعوديه وسألتها واحنا لسه بالانتظار

قلت لها دكتور ولا دكتورة ... قالت لي دكتورة ... قلت لها انا طلبت دكتور وهذي ثاني مره ارجع فيها الملف

ورحت معاها علشان اخذ الملف بنفسي وقالت لي الممرضه جربيها يمكن تعجبك

قلت لها ما ابغى اجازف بأسناني ..


دخلنا عند الدكتورة وهي فاتحه ملفي وقالت لي ارتاحي .. قلت لها انا جايه اخذ ملفي

لاني طلبت دكتور .. سكرت الملف وعطتني اياه وقالت براحتك



رجعت الاستقبال وقلت لهم هذي ثانية مره اليوم ارجع لكم الملف .. انا طالبه دكتور مش دكتوره

قالوا لي طيب بس اي دكتور .. قلت عاي اي دكتور بس يكون شاطر .. روحي ارتاحي بالانتظار لمن يخلص الدكتور




رجعت الانتظار وبعدها بربع ساعه نادوني بالمكبرات رحت عندهم وقالوا لي الغرفه رقم كذا كذا



رحت الغرفه وفتحت الباب والحمد لله لقيته دكتور وهو بالاصل دكتور الجراحه اللي المفروض انه يخلع لي ضرس العقل



المهم


شرحت له السالفه من طقطق لسلام عليكم ( من ايام التقويم حتى الفتحه الكبيره اللي صارت واني صرت لمن اكل او اشرب اسد الفتحه بقطن )




شاف السن ابو فتحه واستغرب وقال الفتحه جدا جدا كبيره .. وقال ماراح اخلع لك ضرس العقل

راح اعالج لك الفتحه لانه لازم يتعالج بسرعه بعدها تعالي لي بأي يوم واخلع لك ضرس العقل




قبل ما يعالج لي سني سألني اذا متزوجه ومرضعه فقلت له لا انسه

وسألني اشتكي من امراض .. فقلت له مجرد فقر دم

وسألني اخذ ادويه قلت له لأ


بعدها بدأ يعالج سني وطول وهو يشتغل واشوفه يدخل شي ويطلع شي ومدي كم ابره دخلها

المهم حسيته يشتغل بضمه وضمير



بعد ماخلص حشى لي السن حشوه وقالي لي انا دخلت لك باللثه مضاد حيوي

وهذا مايعتبر علاج نهائي .. تعالي لي بأي وقت وراح اشيل لك ضرس العقل واشيك على بقية الاسنان

واذا خلصنا نرجع للسن ونعالجه علاج نهائي

قلت له مافي موعد .. قالي لأ بس روحي للأستقبال وقولي لهم عندي خلع من الدكتور ( فلان )

وصرف لي مسكن علشان ضرس العقل





رجعت البيت وشرحت لابوي وامي اللي صار

و احس اني مصومه .. سني كأنه جديد الحشوه من ورى مضبوطه تمام

ملمسها نفس ملمس باقي الاسنان حتى السن ماصار يوجعني وثقلها صار نفس ثقل باقي اسناني


لان اول كنت احسه خفيف حتى الدكتور حذرني لا اكل اي شي ثقيل عليه

فقال ابوي في دكتور قالي افضل اطباء الاسنان رجال

بس لان السعوديات عندهم خصوصيه فمايحبون يتعالجون عند دكتور







بس المشكله اللي ابغى اسألكم عنها



الحين فوق السن اللي عالجه الدكتور مثل الكوره الصغيره بس مضايقتني

واحس اني مو مرتاحه .. اعتقد انها مليانه مضاد حيوي لانه من يوم حط المضاد الحيوي

وهو نفس الحجم ماتغير وصغير بس احس اني متضايقه منها

مره فكرت افتحها بالابره بس خايفه من المجازفه واتورط

جربت المضمضه بمويه وملح والمضمضه اللي بالنعناع لالتهاب اللثه ولا في فايده





المشكله الثانيه بضرس العقل


المسكنات ماعاد تفيد فيني بعض الاحيان افكر اخلعه بنفسي >>> متهوره

حتى القرنفل ماعاد يجيب فايده

انا بغيت اروح اليوم للدكتور بس في وحده هنا خرعتني

قالت ضرس العقل مو اي دكتور يشيله .. لازم دكتور جراح .. لانه يمكن يأثر علي متستقبلاً


العضوه اللي قالت هالكلام عضوه جديده ارسلت لها على الخاص ترجع للموضوع

وتشرح لي كيف يأثر بس ماعاد رجعت


وانا الحين خايفه ابغى اعرف كيف يأثر مستقبلاً وليش عمليه

مو هو ضرس حاله حال الاسنان ؟!.. دورت بقوقل بدون فايده




امي تهاوشني علشان ارجع للدكتور بس انا ابغى اعرف ويكون عندي صورة كامله عن اللي يصير




ياليت اللي تعرف تعلمني





مع العلم ان ضرس العقل مايوجعني الا اذا جيت انام مدري ليه

حتى النوم ماصرت ارتاح فيه صار نومي متقطع





ياليت اللي تعرف تجاوبني ولاتنسوني من الدعوات


و اسفه على الاطاله بس حبيت تكونون بالصورة جزاكم الله خير